Ɛdi tɔ ɛgwakel
1 Mam mot di mot membok, etɛɛ náá, mɛ ɛ́ mot-mɛsa ɛ Ghɛŋ ɔ, mɛ ɛpedjaala nɛ nen, biyɔ bot ɛ Zɛɛb nadjóo ɔ, kɛka tɔ embɛɛ mɛfulu dáa Zɛɛb di ekwyɛl ɛ. 2 Dika tɔ mɛsila, dika tɔ mɛtela, dika tɔ ɛmaad ɛ lyem. Djiselka pak’en nɛ kwyɛl djas. 3 Saka mɛghaaz étɛp ɛbaal ɛgwakel ɛ Sisim na Dɛɛ djɛ mena ɛ. Dika tɔ egwyem pak’en étɛp bi needi tɔ egwakel. 4 Nyel ɛ́ ngɔt, Sisim na Dɛɛ pe ɛ́ ngɔt. Yɛ ɛ́ tyee wat, ɛbwaalel yii Zɛɛb nadjóo bot tɔ tak ɛ pe ɛ́ ngɔt.
5 Yɛ ɛ́ nɛ Ghɛŋ ngɔt,
ɛdum ɛ koŋ nɛ Zɛɛb ɛ́ wat,
ɛduwa Zɛɛb ɛ́ wat.
6 Zɛɛb ɛ́ ngɔt, nyɛ ɛ́ Sɛɛg bot djas.
Nyɛ ɛ́ kɔ bot djas,
nyɛ ɛpesa mɛsa tɔ bot djas,
nyɛ ɛ́ tɔ menabɛlka djas.
7 Tin, mot nɛ mot pak’ena naabela yɛ enɛm nɛ embɛɛ, yii Klisto nadjɛ mot nɛ mot nɛ lyem wat ɛ. 8 Ekwyala na Dɛɛ lɛɛ ɛ́ náá:
«É ghɛŋ nyɛ nabyet tɔ́ pɛ tɔ gwoo ɛ,
nyɛ naatɔ́ nɛ bot ɛ nadi é ekwom ɔ,
nyɛ naadjɛ bot ɛ bɔs mɛkɛɛ4.8 Mɛd 68.19.»
9 Tin, ɛbyet tɔ gwoo kwyɛl ɛlɛɛ yé? Ye kwyɛl ɛlɛɛ ɛ́ náá, nyɛ naasul sok tɔ esum edi na dim-dim di kɔ bɔs ɛ. 10 Mot sul kɔ bɔs ɔ, yɛ ɛ́ pe ɛ́ mot byet tɔ gwoo di ɛvyɛɛgɛpe dhaa tyɛ ɔ. Etɛɛ náá, nyɛ neelwoodal bhwak djas. 11 Nyɛy ɛ́ nadjɛ bot mɛkɛɛ mɛ di esa náá, bɛdhiiti bot di bot ɛ lwoma, bɛdhiiti bɛngoolel ɛ Mɛkpa ɛ Zɛɛb, bɛdhiiti kadi ɛ́ bɛgoolel ɛ Mbɛɛ Bhaadal, bɛdhiiti bɛdjɛɛdel ɛ zɛɛga mendjaala, bɛdhiiti kadi ɛ́ bɛlyoel. 12 Yɛ ɛ́ deenek ɛ́, nyɛ nasa náá, bot ɛ zedum koŋ nɛ Zɛɛb ɔ, bela ghwyil ɛsa mɛsa mɛ, étɛp ɛbek ɛ nyel ɛ Klisto.