1 Biyɔ bot ɛ Ghalasi, bi ɛpelyet é! Ɛzɛ zeseeb bin? Bela náá, bɛ nalyaal bin popoopwon dáa Yezu Klisto nabemaa é mɛlaaba ɛ. 2 Mɛ kwyɛl ɛ́ ɛdji bin náá: Yɛ ɛ́ kɔ ɛsu ɛ ɛlooba nɛ etsi ɛ bi nabela Sisim na Dɛɛ ohoo, nɛghu yɛ ɛ́ etɛɛ náá, bi naagwak Mbɛɛ Bhaadal, da dum koŋ nɛ yɛ? 3 Étɛp yé bi di elyet deenek? Sa bi nakan nɛ Sisim Zɛɛb ɛ, bi kakwyɛl ɛsilal yɛ ɛ́ nɛ ghwyil epuud é? 4 Bi zebee mbi yenek etuŋ ɛ́ gwyes é? Deenek, ye tok nɛ ghwyil ɛdi yii gwyes. 5 Zɛɛb mot di edjɛ bin Sisim nɛ ɛbaasa endem e mɛbwala tɔ len ɔ, bi ke ɛ́ náá, nyɛ sa yɛ ɛ́ etɛɛ náá, bi nɛ looba nɛ etsi ohoo, nɛghu etɛɛ náá, bi nɛ gwak Mbɛɛ Bhaadal ɛdum ɛ koŋ nɛ Zɛɛb?

6 Dáa ye di náá, Abalaam naadum koŋ nɛ Zɛɛb ɛ, Zɛɛb naadjɛ nyɛ di epiki. 7 Ye goka ɛ́ bi gu náá, yɛ ɛ́ bot ɛ di edum koŋ nɛ Zɛɛb ɔ di bɛtɛtɛ ɛ bɔn Abalaam. 8 Ye nabɛ ɛ́ Ekwyala naaloozelɛɛ náá, Zɛɛb ɛ́ waadjɛ di epiki nɛ bot ɛ di ààbɛ bot ɛ mbyak eYuda ɔ, kɔ ɛsu ɛ ɛdum ɛ koŋ ɛ lɔɔ nɛ nɛ. Deenek, Ekwyala naaloozelɛɛ Mbɛɛ Bhaadal tak nɛ Abalaam náá: «Bot ɛ membyak djas ɛ́ waasɛɛaa mɛtel kɔ ɛsu ɛ lɔ.» 9 Deenek, Abalaam naadum koŋ nɛ Zɛɛb, nyɛ naasɛɛaa mɛtel, yɛ ɛ́ tyee wat nɛ bot ɛ di edum koŋ nɛ Zɛɛb ɔ, bɛ eesɛɛaa mɛtel dáa Abalaam.

10 Bot ɛ di ewa lyem tɔ ɛsa sa etsi di elɛɛ ɛ, bɔɔ djas ɛ́ kala. Etɛɛ náá, Ekwyala lɛɛ ɛ́ náá: «Mbee baka nɛ mot di ààlooba nɛ etɛp djas di kwyala tɔ mɛkana mɛ etsi ɔ.» 11 Deenek, yɛ ɛ́ tsɛɛtsɛ náá, mot tok nɛ ghwyil ɛdi mot epiki é mis ɛ Zɛɛb kɔ ɛsu ɛ ɛlooba nɛ etsi. Etɛɛ náá, Ekwyala lɛɛ ɛ́ náá: «Mot di mot epiki kɔ ɛsu ɛ ɛdum ɛ koŋ nɛ Zɛɛb ɔ, nyɛy ɛ́ paabela tsik*.» 12 Bela náá, ye tok etsi di edjɛ bot ɛdum ɛ koŋ nɛ Zɛɛb. Ghuna, ye baakwyalel ɛ́ náá: «Mot di ekɛ dáa mɛtiŋ mɛ etsi di elɛɛ ɔ, nyɛ aadi nɛ tsik kɔ ɛsu ɛ tak.»

13 Tin, yɛ ɛ́ Klisto ɛ pɛk mena tɔ mbee baka etsi. Nyɛy nyɛ ɛmet naabela baka kɔ ɛsu ɛ lena. Etɛɛ náá, Ekwyala lɛɛ ɛ́ náá: «Mbee baka nɛ mot di egóaa tsela é le ɔ.» 14 Yɛ ɛ́ deenek, bot ɛ di ààbɛ bot ɛ mbyak eYuda ɔ, bɛ eebela esɛɛa e mɛtel mɛ nakɛkaa Abalaam kɔ lo ɛ Yezu Klisto ɛ. Tin, yɛ ɛ́ é ɛdum ɛ koŋ ɛ mena aabela Sisim Zɛɛb nakɛk ɛ.

15 Bɔn-nyɛɛg, gwakeka, mɛ pookonɔɔ bin dhiiti geka tyee bot di ezeezyɛ nɛ ɛsa ɛ: Yɛ bɛ náá, mot eekwyal mɛkana mɛ mɛlik mɛ ɛnyɔɛpe ɔɔ, dhiiti mot sis tokapɛ nɛ ghwyil ɛkabaazyɛ zɛdis sonok, nɛghu ɛkɛl dhiiti mɛkpa tɔ tak. 16 Yɛ ɛ́ dhatyee ekɛk e Zɛɛb pɛ daa Abalaam nɛ dha yɛ. Ekwyala ààlɛɛ náá: «Dɔɔ nɛ bɛdha bɛ», dhatyee náá, ye lii ɛ́ nɛ bot ɛbuɛpe. Tin, ye zolii ɛ́ nɛ mot ngɔt, dáa ye di kwyala ɛ: «Nɛ dha'ɔ.» Dha tak kwyɛl ɛlyaal ɛ́ Klisto. 17 Gwakeka sa mɛ di ekwyɛl ɛlɛɛ ɛ́: Mɛkana mɛ mɛlik mɛ Zɛɛb naloozekwyal ɛnyɔɛpe ɛ, ye tokapɛ nɛ ghwyil ɛbaazɛsaabel nɛ etsi di náá, ye nazɛsael ɛ́ bhii membu bɛdhet-ɛná nɛ mɛkam-mɛlɛl (430) ɛ. Yɛ bɛ deenek ɔɔ, ekɛk e Zɛɛb aadi ɛ́ yii gwyes. 18 Tin, yɛ bɛ náá, esa e lyak Zɛɛb di edjɛ ɛ belaaa ɛ́ dum nɛ etsi ɔɔ, é di'enek, yɛ aanàkabaadi kɔ ɛsu ɛ ekɛk. Ghuna yɛ ɛ́ dum nɛ ekɛk ee Zɛɛb nasa enɛm nɛ embɛɛ bɛ nɛ Abalaam ɛ.

19 Tin, mɛsa mɛ etsi ɛ́ yé? Etsi nabɛ ɛ́, na ghɛl, étɛp ɛsa náá, mesyem mɛ bot neenyen popoopwon, kɛkum dwoo dha ɛ Abalaam aabyel ɛ, mot ekɛk bak nasael kɔ ɛsu ɛ lɛ ɔ. Etsi tak, Zɛɛb nadjɛ yɛ ɛ́, é mɛmbɔ mɛ efofop, tin, efofop ɛboodjɛ yɛ nɛ mot, étɛp nyɛ neekɛgoola yɛ pɛ daa bot. Mot tak nabɛ ɛ́ Moiiz. 20 Ngoola-ngoola di ɛ́ pak bot ɛbá. Tin, é ghɛŋ Zɛɛb nadjɛ ekɛk nɛ Abalaam ɛ, nyɛ nadi ɛ́ nyɛ ɛmet, ye nabɛ ɛ́ ààbɛ nɛ ngoola-ngoola.

21 Ye kakwyɛl ɛlyaal ɛ́ náá, etsi nɛ ekɛk e Zɛɛb ààkɛ ze wat é? Ye tok deenek! Yɛ ɛpedi náá, etsi ɛpedjɛ bot tsik'ɔɔ, pe yɛ ɛpesa náá, bot di epiki kɔ ɛsu ɛ etsi. 22 Tin, Ekwyala lɛɛ ɛ́ náá, bot djas ɛ́ si bhel mesyem, etɛɛ náá, ekɛk e Zɛɛb neesael nɛ bot ɛ di edum koŋ nɛ Yezu Klisto ɔ.

23 Ɛsok nɛ ɛwala ɛ ɛdum ɛ koŋ nɛ Zɛɛb kum, mena nadika ɛ́ si bhel etsi, ebwood náá, ɛdum ɛ koŋ nɛ Zɛɛb tak nyen. 24 É di'enek, etsi nadi ɛ́ mbaalel yenaka, kɛkum ɛwala ɛ ɛzyɛ ɛ́ Klisto, etɛɛ náá, mena needika bot ɛ epiki kɔ ɛsu ɛ ɛdum ɛ koŋ nɛ Zɛɛb. 25 Dáa ye di mos náá, ɛwala ɛ ɛdum ɛ koŋ nɛ Zɛɛb eezekum ɛ, mena tokapɛ si mɛko mɛ dhiiti mbaalel.

26 Etɛɛ náá, biyɔ djas moo ɛ́ bɔn ɛ Zɛɛb tɔ ɛdum ɛ koŋ nɛ Yezu Klisto. 27 Tin, biyɔ djas, bot ɛ zeduwa Zɛɛb pɛ tɔ Yezu Klisto ɔ, bi moo ɛ́ dáa Klisto. 28 Tin, ye tokapɛ nɛ mbɛk pak mot mbyak eYuda nɛ mot mbyak eGhɛlɛk, pak kwom mot nɛ mot di ààdi kwom ɔ, pak moma nɛ motom, etɛɛ náá, biyɔ djas, bi moo ɛ́ mot ngɔt tɔ ɛgwakel nɛ Yezu Klisto. 29 Yɛ bɛ náá, bi ɛ́ bot ɛ Klisto ɔɔ, deenek bi ɛ́ pe ɛ́ bɛdha ɛ Abalaam, tin, bi ɛ́ waabela esa e lyak ee Zɛɛb nakɛk ɛ.