1 Gwakeka sa mɛ di ekwyɛl ɛlɛɛ ɛ́: Dáa ye di náá mɔn lyak dinaa mɔɔ dhyeeb ɛ, nyɛ tok nɛ mbɛk nɛ kwom mot, ye nakoozobɛ náá nyɛy ɛ́ di nakuma esa e lyak. 2 Tin, nyɛ gwak ɛ́ nɛ bot ɛ di ewyel nyɛ ɔ, dɔɔ nɛ bot ɛ di ebaal esa bɛ ɔ, deenek, kɛkum ɛwala ɛ sɛɛg nakwyɛl ɛ. 3 Tyee wat nɛ menabɛlka djas, é ghɛŋ mena nadika dhatyee bɔɔ dhyeeb ɛ, mena nadika ɛ́ ekwom si bhel embee esisim ee di kɔ bɔs'ak ɛ. 4 Tin, dáa ɛwala ɛ Zɛɛb nakoobal ɛ nakadjala ɛ, Zɛɛb naazɛdhis Mɔn'ɛ. Moma ɛ́ nabya mɔn tak, nyɛ nawyelaa ɛ́ si etsi e Moiiz, 5 étɛp nyɛ neepɛk bot ɛ nadi si bhel etsi ɔ, dɔɔ nɛ ɛsa náá mena dika bɔn ɛ Zɛɛb.

6 Deenek, ye neelyaal nɛ tsɛɛtsɛ náá, bi ɛ́ bɔn bɛ, Zɛɛb eedhis tɔ ebhum elyem binaka Sisim Mɔn'ɛ, Sisim di etuud: «Abha», ye kwyɛl ɛlɛɛ ɛ́ Saagam. 7 Deenek, wɔ tokapɛ kwom, wɔ moo ɛ́ mɔn, dáa ye di náá, wɔ ɛ́ mɔn'ɛ ɛ, Zɛɛb ɛ́ waadjɛ wɔ esa e lyak nyɛ nakwom étɛp bɔn bɛ ɛ.

8 É sok bi nadi bi dinaa ààgu Zɛɛb ɛ, bi nabɛ ɛ́ ekwom e bɛzɛɛb ɛ di náá, nɛ tsɛɛtsɛ bɛ tok bɛtɛtɛ ɛ bɛzɛɛb ɛ. 9 Nenak, bi eezegu Zɛɛb, nɛghu náá, Zɛɛb eezegu bin. Haaa ye kabaasa dáa, bi baasik si bhel embee esisim ee di kɔ bɔs'ak ɛ, esisim ee di náá, ye tok nɛ mɛtaŋ, ààbɛ nɛ mɛbwala ɛ? Bi baakwyɛl ɛ́, bi baabula si ekwom bɔɔ? 10 Bi nɛ kwyɛl ɛduwal ɛ mɛlu, nɛ bɛngɔn, nɛ edhiiti mɛwala, baazɛnɔɔ edhiiti membu. 11 Mɛ ɛ́ nɛ kɛŋ nɛ nen, etɛɛ náá, mezuk mɛ mɛ nazuk nɛ nen ɛ, yɛ ɛ́ zɛkɛgwyɛ gwyes.

12 Bɔn-nyɛɛg bam, mɛ ɛpedjaala nɛ nen, dika dáa mam, etɛɛ náá, mam pe, mɛ moo ɛ́ dáa biyɔ. Bi nabɛ ɛ́ ààsa mɛ ɛbiyo. 13 Bi nɛ gu ɛnyɔɛpe náá, mɛ nagoola bin Mbɛɛ Bhaadal é sok mɛkɛn ɛ, mam ebɛ́. 14 Dáa bi nabee nyel'am ekpaŋ ɛ, ye nabɛ ɛ́ ààsa bin bwoo. Bi nabɛ ɛ́ ààbyen mɛ, ààtsin mɛ, tin, bi naamyaal mɛ dáa fofop ɛ Zɛɛb nɛghu dáa Yezu Klisto. 15 Deenek, mɛmyaala mɛ bi nadi nɛ yɛ sok ɛ moo wo? Mɛ ɛ́ nɛ ghwyil ɛlɛɛ bin nɛ tsɛɛtsɛ, yɛ ɛ́ pe di ɛ́ di esael ɔɔ, pe bi naadis mis men, djɛ mɛ. 16 Nenak mɛ moo mos ɛ́ mot mɛbhuka men, etɛɛ náá, mɛ nɛ lɛɛ bin etsɛɛtsɛ?

17 Yɛ ɛ́ nɛ bɛdhiiti bot ɛ di ewa lyem nɛ nen, bela náá, tɔ ɛwa lyem tak, ye tok nɛ etsɛɛtsɛ. Tin, bɛ saŋ ɛ́ mena bɛkaka, etɛɛ náá bi neewa lyem nɛ nɔɔ. 18 Ɛnyɔ náá, mot wa lyem tɔ embɛɛ esesɛɛ é mɛwala djas. Deenek, sa yɛ ààzodi é sok mɛ di sama wat nɛ nen ɛ. 19 Bɔn bam, mɛ ɛpebaazuk kɔ ɛsu ɛ len dáa mezuk mɛ moma di suula étɛp nyɛ neebya ɛ, kɛkum dwoo Klisto aabe di tɔ len ɛ. 20 É ɛwala ɛlak, mɛ bɛ ɛ́ nɛ gwyes ɛdi é di wat nɛ nen, étɛp mɛ neelii dáa di egoka ɛ. Etɛɛ náá, mɛ ààgu dáa mɛ di egoka nɛ ɛsa nɛ nen ɛ.

21 Lɛɛka mɛ, biyɔ bot ɛ di ekwyɛl ɛdi ɛ́ si etsi ɔ: Bi ààgwak sa etsi di elɛɛ ɛ? 22 Etɛɛ náá, Ekwyala lɛɛ ɛ́ náá, Abalaam naabya bɔn bɛbá. Ngɔt, nyɛ nabya nyɛ ɛ́ bɛ nɛ Aghaad kwom moma, dhiiti bɛ nɛ Saala moma nadi ààdi kwom ɔ. 23 Tin, mɔn nyɛ nabya bɛ nɛ moma kwom ɔ, nabyel ɛ́ nɛ ɛkwosak ɛ elyem e bot. Yɛ kaabɛ mɔn nyɛ nabya bɛ nɛ moma nadi ààdi kwom ɔ, nyɛ nabyel ɛ́ dáa Zɛɛb nakɛk ɛ.

24 Tin, tɛp'enek ɛ́ nɛ dhiiti ɛsulel ɛ sis, etɛɛ náá, boa binɔk bɛbá lyaal ɛ́ mɛbhɛŋ mɛmbá. Wat ɛ́ ɛbhɛŋ ɛ ɛtsok ɛ Sinayi, bɔn byel penek ɔ, bɛ ɛ́ ekwom: yɛ ɛ́ Aghaad. 25 Bela náá, Aghaad ɛ́ ɛtsok ɛ Sinayi di pɛ kyee dik Aalabi ɛ. Ye kwyɛl ɛlyaal ɛ́, ghaada Yeluzalɛm di mos'aak. Etɛɛ náá, ghaada Yeluzalɛm nɛ bot djas di tɔ tak ɔ, bɛ ɛ́ tɔ ekwom. 26 Tin, ghaada Yeluzalɛm di tɔ gwoo ɛ, ye tok tɔ ekwom, yɛ ɛ́ nyɛy ɛ di nyɛɛg'ena. 27 Etɛɛ náá, Ekwyala lɛɛ ɛ́ náá:

«Dia tɔ mɛmyaala, wɔy kwyiid moma,

wɔy moma di ààbya ɔ!

Tsima etsim e mɛmyaala,

wɔy mot di ààgu mɛkpaa mɛ ɛbɛl ɔ.

Etɛɛ náá, bɔn ɛ moma zepɛɛaa ɔ,

bɛ ɛpebu dhaa bɔn ɛ moma di é ɛba ɔ✝.»

28 Yɛ kabɛ biyɔ, bɔn-nyɛɛg bam ɔɔ, bi ɛ́ bɔn nabyel tɔ ekɛk e Zɛɛb, tyee wat nɛ Izak ɔ. 29 Tin, yɛ ɛ́ dáa ye nadi sok ɛ, mɔn nabyel tɔ ɛkwosak ɛ elyem e bot ɔ, nadi etiig mɔn nabyel dáa Sisim Zɛɛb nalɛɛ ɛ. Yɛ ɛ́ tyee wat nɛ dáa ye di esael é dwoo ɛ lak mos ɛ. 30 Tin, Ekwyala lɛɛ dáa? Ekwyala lɛɛ ɛ́ náá «Sɔa kwom moma nɛ mɔn'ɛ, etɛɛ náá, mɔn ɛ kwom moma ààgoka nɛ ɛkaa esa e lyak bɛ nɛ mɔn ɛ moma di ààbɛ kwom ɔ*.» 31 Deenek, bɔn-nyɛɛg bam, mena tokeka bɔn ɛ kwom moma, menaka ɛ́ bɔn ɛ moma di ààdi kwom ɔ.