1 Klisto napɛk mena ɛ́, étɛp mena needi ààbaadi ekwom e etsi eYuda. Lyelka bham, yɛ ààgoka náá, bi baabula si bhel ekwom.

2 Gwakeka, mam Pɔl, mɛ lɛɛ bin ɛ́ náá, yɛ bɛ náá, bi eemyaal ɛniigelaa beka ɔɔ, ye kwyɛl ɛlɛɛ ɛ́ náá, Klisto tokapɛ dhiiti vaŋ mot étɛp'en. 3 Mɛ ɛpebaalɛɛ nɛ bot djas di emyaal náá, bɛ niigal bɛ beka ɔ náá, bɛ goka ɛ́ nɛ ɛlooba nɛ etsi djas. 4 Bi naazebɛka nɛ Klisto, biyɔ bot ɛ di ekwyɛl ɛsaŋ ɛ náá, bi di bot ɛ epiki é mis ɛ Zɛɛb kɔ ɛsu ɛ ɛlooba nɛ etsi ɔ. Enɛm nɛ embɛɛ e Zɛɛb tokapɛ nɛ nen. 5 Yɛ kabɛ menabɛlka ɔɔ, mena waka ɛbwaalel ɛ lena ɛ́ nɛ Zɛɛb, nyɛy mot di esa náá, bot di piki é mis mɛ ɔ. Yɛ ɛ́ sa mena di ebwoodka nɛ ghwyil mɛbwala mɛ Sisim na Dɛɛ di enyen tɔ ɛdum ɛ koŋ ɛ lena nɛ Zɛɛb ɛ. 6 Etɛɛ náá, mot ɛ di tɔ ɛgwakel nɛ Yezu Klisto ɔɔ, ɛni ɛ beka nɛghu ɛdi ààni beka tok nɛ dhiiti mɛtaŋ, tin, sa di nɛ mɛtaŋ ɛ, yɛ ɛ́ ɛdum ɛ koŋ nɛ Zɛɛb di enyen tɔ kwyɛl ɛ.

7 Ye nabɛ ɛ́ bi eekan ɛsum kaab ɛnyɔɛpe! Haaa ɛzɛ kala bin ze, étɛp bi needi ààlooba nɛ etsɛɛtsɛ e Zɛɛb? 8 Mbi mɛlyo menek ààpadus pɛ daa Zɛɛb, mot nadjóo bin ɔ. 9 Bi ɛ́ kobaka! Ba mɔɔ leviid batsa nɛ sa náá, tsim faalin di esaaa mapa nɛ yɛ ɛ, ghamta. 10 Dum nɛ Ghɛŋ, mam, mɛ ɛ́ nɛ ɛbwaalel nɛ nen, mɛ nɛ gu náá, bi tok nɛ dhiiti esiiza sis. Deenek, mot di esa ɛzɛm tɔ len ɔ, nyɛ aawaaa é feŋ, ye nakoozodi zɛ.

11 Yɛ kabɛ mam ɔɔ, bɔn-nyɛɛg, yɛ ɛpedi náá, mɛ ɛpebaagoola bot bhaadal ɛni ɛ́ beka ɔɔ, haaa yɛ ɛ́ kɔ mɛsɔ mɛ yé mɛ baadi etiigaa? É di'enek, ɛgoola bot ɛsyee ɛ Klisto kɔ mɛlaaba aanàbaakpaa bot elyem! 12 Tin, bot ɛ di ekus ɛghuub tɔ len ɔ, bɛ gheetetɔ́ nɛ ɛsa embee mɛsa mɔɔ: Bɛ dis bhum ekaad bɔɔ.

13 Bɔn-nyɛɛg bam, bi nadjóoaa ɛ́ étɛp bi needi ààbaadi é ekwom. É di'enek, sa bi ààkasa náá, mɛpɛka mɛ bi zepɛkaa ɛ, di nɛ nen tyee gham étɛp ɛlooba nɛ ɛkwosak ɛ epuud. É di'enek, ye goka ɛ́ náá, bi bet náá, kwyɛl djɛɛd bin, étɛp bi neekwyeel pak'en. 14 Etɛɛ náá, etsi djas ɛ́ sɛɛga tɔ mɛkpa mak: «Ye goka ɛ́ wɔ kwyɛl sɔ'ɔ mot dáa wɔ di ekwyɛl nyel'ɔ met ɛ✝.» 15 Tin, yɛ bɛ náá, bi ɛpekwaalel nɛ ɛdyaadel pak'en dáa bɛtit ɔɔ, bi ɛ́ kobaka, bi ɛ́ zɛkɛgónel pak'en.

16 Tin, mɛ lɛɛ bin ɛ́ náá: Betka náá, Sisim na Dɛɛ djɛɛd bin, é di'enek, bi aanàkabaasa ɛkwosak ɛ epuud. 17 Etɛɛ náá, egwyes e epuud ɛ́ nɛ zyaala nɛ egwyes e Sisim. Tin, egwyes e Sisim ɛ́ nɛ zyaala nɛ egwyes e epuud. Deenek, yɛ ɛ́ nɛ zyaala pak'ɔɔ, tyee náá, bi needi ààbɛ nɛ ghwyil ɛsa sa elyem bin di kwyɛl ɛsa ɛ. 18 Tin, yɛ bɛ náá, Sisim ɛ di edjɛɛd bin ɔɔ, deenek, bi tokapɛ si bhel etsi.

19 Bela náá, mɛsa mɛ epuud nyen ɛ́ tɔ mɛzɔ, tɔ dɔɔb, tɔ embee mɛfulu, 20 tɔ ɛduwal ɛ bɛnaghisɛ, tɔ ɛlyeeb, tɔ mbee lyem, tɔ mɛwɔ, tɔ zok, tɔ ɛbuk, tɔ bhyen ɛdi ɛ́ sama nɛ bɔɔ bɛsɔ, tɔ swaka, 21 tɔ embee egwyes, tɔ elangi, tɔ mɛbyoŋ mbɛs zɛnɔɔ edhiiti mesyem di enɔŋel nɛ yenek ɛ. Nenak, mɛ ɛpedul bin mɛlɔ, dáa mɛ nadul bin yɛ sok ɛ: Bot ɛ di esa deenek ɔ, bɛ aanàkwaabela di tɔ Ɛyoŋ ɛ Zɛɛb.

22 Yɛ kabɛ esa e Sisim na Dɛɛ di edjɛ ɔɔ, yɛ ɛ́: mɛkwyɛla, mɛmyaala, egwyem, ɛmaad ɛ lyem, embɛɛ, enɛm esa, nɛ esosoob, 23 mɛtela, ɛdil ɛ lyem. Ye tok nɛ tsi wat di ebyen mbi etɛp binek. 24 Bot ɛ di bot ɛ Yezu Klisto ɔ, naazebem epuud bɔɔ nɛ mɛkwosak mɔɔ, zɛnɔɔ embee egwyes bɔɔ kɔ mɛlaaba.

25 Dáa ye di náá, tsik'enaka ɛ́ tsik Sisim ɛ, betka náá, mena kɛka tɔ Sisim. 26 Sa mena ààdika nɛ ɛghɛɛa nyel, djhookatka ebeme pak'enaka, sa mena ààdi nɛ zok pak'enaka.