1 Voi glari Galatsenji! Cai vã zurli a voauã? Nãintea a ocljilor a voastri Isus Hristolu si zugrãfsi crutsisit. 2 Mash aestã voi s-aduchescu di la voi: Lu loat Duhlu prit faptili a legiljei, icã prit pistipsirea tsi avdzãt? 3 Voi hits ahãt zurlji? Dupã tsi apãrnjit tu Duh, tora vrets s-bitisits prit faptili a truplui? 4 Nacã traptã arãu di vãnat? Nãdãescu s-nu hibã di vãnat. 5 Vã ntreb nãpoi, Dumnidzãlu vã da a voauã Duhlu a lui sh-fatsi lucri thãvmãsiti namisa di voi prit faptili a legiljei, icã prit pistea tu evanghelu tsi ascultat? 6 Ashãtsi sh-Abrahamul lji pistipsi a Dumnidzãlui sh-aestã lji si-lugursi ca ndriptati.✝ 7 Aduchits atumtsea, cã atselji tsi au pisti, suntu cilimenjlji al Abraham. 8 Scritura prividzu cã Dumnidzãlu va lji ndripteadzã pãngãnjlji prit pistea, sh-lji hãbãrsi ma nãinti al Abraham evanghelu: "Tuti fãrili va hibã ghinicuvãntati prit tini."✝ 9 Ashãtsi atselji tsi pistipsescu suntu ghinicuvintats deadun cu Abrahamul, omlu a pistiljei. 10 Tuts atselji cai s-andoapirã tu faptili a legiljei suntu sum blãstem, cum easti scriat: "Blãstimat s-hibã atsel tsi nu fatsi itsido tsi easti scriat tu Cartea a Legiljei."✝ 11 Easti limpid cã vãrã nu s-fatsi ndreptu prit legea nãintea al Dumnidzãu, cã "ndreptul va s-bãneadzã prit pisti."✝ 12 Legea nu easti dit pistea, ma: "atsel tsi li featsi, va s-bãneadzã prit nãsi."✝ 13 Hristolu nã arãscumpãrã dit blãstemlu a legiljei, cã elu idyiul s-featsi blãstem trã noi, cum easti scriat: "Blãstimat easti caitsido tsi si spindzurã pri un lemnu."✝ 14 Elu nã arãscumpãrã noi cu nãeti tsi ghinicuvintarea al Abraham s-yinã la pãngãnjlji prit Hristolu Isus, tsi prit pistea noi s-putem s-lom tãxirea a Duhlui.

15 Frats shi surãri, vã zburãscu ca om. Vãrã nu poati s-lji mutã icã s-lji avdagã tsiva a unei pisti-ligãturã umineascã dupã tsi aestã s-hibã vulusitã. 16 Tãxirili suntu aspusi al Abraham sh-a simintsãljei a lui. Scritura nu dzãtsi "sh-a simintsãlor", tsi va s-dzãc multsã oaminji, ma "a simintsãljei a ta", tsi va s-dzãc un om, tsi easti Hristolu. 17 Tora mini ma dzãc aestã: Legea tsi vini patru suti treidzãtsi di anji ma nãpoi, nu lu nãpãrteadzi pisti-ligãtura vulusit di ma nãinti di la Dumnidzãlu shi s-li aleapid tãxirili a lui.✝ 18 Macã mushtinirea yini dit legea, atumtsea nu va yinea di tãxirea, ma Dumnidzãlu tu harul a lui lj-u-deadi atsea al Abraham prit tãxirea. 19 Cãtse si deadi legea atumtsea? Legea si deadi s-aspunea tsi eara cãlcãrili a legiljei, pãnã cãndu s-yinea siminãtura a cui lj-si eara faptã tãxirea. Legea s-dimãndã prit anghilji sh-lji si pistipsi a unui anamisãtor. 20 Un anamisãtor nu easti mash di unã parti, iarã Dumnidzãlu easti un. 21 Atumtsea easti legea contra a tãxirilor? Pute s-nu hibã. Cã, macã va eara datã unã lege tsi poati s-da banã, atumtsea dealihea ndriptatea va yinea di la legea. 22 Ma Scritura dzãtsi cã itsido lji easti sumbãgat a amãrtiiljei, ashãtsi sh-tãxirea s-da prit pistea tu Isus Hristos atsilor cai pistipsescu. 23 Nãinti tsi s-yinea pistea, noi nã tsãneam hãpsãnits sum putearea a legiljei, ashtiptãnda pistea tsi va s-discupirea. 24 Ashãtsi legea s-featsi vigljitorlu a nostru pãnã tu vinita a Hristolui, tra s-nã ndriptam prit pistea. 25 Tora tsi pistea ari vinitã, noi nu him ma sum un vigljitor. 26 Cã tu Hristolu Isus tuts voi hits hiljilji a Dumnidzãlui prit pistea. 27 Tuts tsi vã pãtidzat tu Hristolu, hits nviscuts cu Hristolu. 28 Nu ari ma Iudeu icã Elin, nu ari ma sclav icã liber, nu ari ma mascur icã theamin, cã tuts voi hits fapts un tu Hristolu Isus. 29 Macã voi hits a Hristolui, atumtsea voi hits siminãtura al Abraham sh-mushtinitori dupã tãxirea.