1 Frats sh-surãri, macã videts vãrã om tu amãrtii, voi tsi bãnats tu Duh prindi s-lu ndriptats atsel om cu frunimeatsã. Ma afirits-vã tra s-nu cãdets sh-voi tu cãrteari. 2 Tsãnets sartsinili a unui-alantu, sh-ashãtsi voi mplinits legea a Hristolui. 3 Macã vãrã mindueashti cã easti tsiniva, cãndu nu easti tsiva, elu idyiul s-arãdi. 4 Cathiunu sã sitãxeascã faptili a lui sh-deapoea idyiul elu si s-alãvdã shi s-nu s-undzeascã cu vãrã altu. 5 Cã caitsido prindi s-poartã sartsina a lui. 6 Cai ljea nvitsãtura a zborlui, prindi mpartsã cu nvitsãtorlu a lui tuti bunili.

7 Nu vã arãdets: Dumnidzãlu nu s-pizueashti. Un om seatsirã atsea tsi ari siminatã. 8 Caitsido tsi seaminã tra s-lji arseascã a truplui a lui, va seatsirã aspãrdzeari di truplu a lui. Caitsido tsi seaminã di Duh, va seatsirã di Duhlu bana eternã. 9 S-nu nã curmãm trã fãtseari ghini, cã tu chirolu tsi prindi noi va s-adunãm sitsirari macã nu nã curmãm. 10 Trã atsea, cãt s-putem s-fãtsem ghini a tutulor, ma multu a oaminjlor pistimenji.

11 Videts cu tsi gramati mãri vã scriai a voauã cu mãna a mea. 12 Atselji tsi vor si s-veadã ghini tu trup, atselji vã stringu s-vã anvãrliga-tãljeats, mash tra s-nu si priaĝuneascã tra itia a crutsiljei a Hristolui Isus. 13 Nitsi atselji cai suntu anvãrliga-tãljeats nu u tsãnã legea, cu tutã atsea elji vor tsi voi s-vã anvãrliga-tãljeats, tra si s-alavdã cu anvãrliga-tãljearea a voastrã tu trup. 14 Di partea a mea, nu voi pute s-mi alavdu, di cãt mash cu crutsea a Domnului a nostru Isus Hristos, prit cai lumea easti crutsisitã trã mini, sh-mini trã lumea. 15 Nu axizescu nitsi anvãrliga-tãljearea sh-nitsi nianvãrliga-tãljearea, ma axizeashti fãptura atsea noaua. 16 Pace sh-njilã trã voi tuts tsi urmats aestu ordin sh-trã Israelul al Dumnidzãu.

17 Di tora sh-nclo vãrã s-nu mi cãrteascã, cã mini portu seamnili al Isus tu truplu a meu.

18 Harul a Domnului a nostru Isus Hristos s-hibã cu duhlu a vostru, frats sh-surãri. Amin.