1 Frats sh-surãri a melji pistimenji tu Domnul a nostru mãritu, Isus Hristos, s-nu tsãnets cu hãtãri. 2 Macã un om intrã tu adunãrili a voastri cu un nelu di furii shi stranji scumpi, sh-un om niavut cu stranji lãvushiti, 3 sh-voi lj-bãgats oarã atsilui om cu stranji scumpi shi lj-dzãtsets: "Tini apunãti aoa, tu loclu ma bun," shi a niavutlui lj-dzãtsets: "Tini shedz aclo pi cicioari," icã: "Apunãti aclo mpadi, la cicioarili a meali," 4 nu avets faptã diferentsã namisa di voi, fãcãnda ashã ca giudicãtori cu minduiri arali? 5 Ascultats, frats sh-surãri a melji vruts! Nu lji aleapsi Dumnidzãlu niavutsilji a lumiljei tra s-hibã avuts tu pisti sh-mushtinitori a amirãriljei, tsi elu lã-u tãxi atsilor tsi lu vor? 6 Ma voi nu lu avets tinjisit niavutlu. Nu suntu avutslji atselji tsi vã domneascã sh-vã tragã azvara tu giudicatã? 7 Nu suntu atselji tsi blastimã numa atsea buna atsilui tsi vã acljimã? 8 Macã mplinits legea amirãreascã dupã Scritura: "Su vrei aproapilu a tãu ca cum ti vrei tini," ma fãtsets ghini. 9 Ma macã fãtsets diferentsã, voi fãtsets amãrtii sh-legea vã condamnã ca cãlcãtor di lege. 10 Caitsido tsi respecteadzã tutã legea, ma u-calcã tu un singur ordin, s-fatsi cãbatar la tuti. 11 Cã atsel tsi dzãsi: "S-nu caltsi curuna," tutashã dzãsi: "S-nu vatsãnji." Trã atsea, macã tini nu u caltsã curuna, ma tini vatsãnj, tini eshti cãlcãtor a legiljei. 12 Trã atsea si zburãts shi s-fãtsets ca atselji tsi va hibã giudicats dit legea tsi da libertati. 13 Cã giudicata va hibã fãrã njilã di atsel tsi nu ari aspusã njilã. Sh-njila amintã pristi giudicata.

14 Tsi bunã easti, frats sh-surãri a melji, macã un dzãtsi cã ari pisti, ma nu ari fapti? Poati elu s-ascapã cu aestã pisti? 15 Sh-macã un frati icã unã sorã va hibã disvãscuts shi lipseashti mãcarea di cathi dzuã, 16 shi un di voi lã dzãtsi a lor: "Adutsets-vã tu pace! Ncãldzãts-vã shi fãnãtits-vã!", sh-nu lã da a lor lucrili di cai elji au ananghi ti truplu, tsi hãiri ari? 17 Tutashã pistea, macã nu ari fapti, easti moartã tu nãsã. 18 Ma un altu dzãtsi: "Tini ai pisti, ma mini am faptili." Aspunã-nji a njia, cã macã vãrã poati s-aibã pisti fãrã fapti sh-mini va sã aspunã pistea a mea cu faptili a meali. 19 Tini pistipseashti cã ari un Dumnidzã. Ghini fats! Demonjlji pistipsescu shi s-cutreamburã. 20 Vrei tini provã, om gol, cã pistea fãrã fapti easti moartã? 21 Abrahamul, tatãl a nostru, nu s-ndriptã prit faptili a lui, cãndu lu bãgã pri altar hiljiu a lui, Isac? 22 Tini vedz cã pistea lucra deadun cu faptili, shi prit faptili pistea a lui s-featsi perfectã. 23 Ashã si mplini Scritura tsi dzãtsi: "Abrahamul lj-pistipsi a Dumnidzãlui shi aestã lji si lugursi ca ndreptati." Elu s-acljimã oaspilu al Dumnidzãu. 24 Voi videts tsi un om s-ndripteadzã prit faptili sh-nu mash prit pistea. 25 Tutashã, sh-putana Rahaba, nu s-ndriptã sh-ea di faptili a ljei, cãndu lji ashtiptã pitricutslji shi li cãlãuzi tu unã altã cali? 26 Cã, ashã cum truplu fãrã duh easti mortu, ashã sh-pistea fãrã fapti easti moartã.