1 Frats sh-surãri, nu vã fãtsets mults di voi nvitsãtori, shtinda cã va lom unã giudicatã ma aspru. 2 Noi tuts alãtipsim tu multi lucri. Macã tsiniva nu alãtipseashti tu zbor, atumtsea elu easti un om perfectu sh-axiu ti domniri tut truplu a lui. 3 Cãndu noi bãgãm fãrnul tu gura a caljilor, tra s-nã avdu, ndriptãmu ashã tut truplu a lor. 4 Videts sh-pamporlji, cu tut cã suntu ahãnti mãri shi s-pingu di vimturi vãrtoasi, s-ndripteadzã di un timon njic aclo iu va timonierlu. 5 Ashã sh-limba easti parti njicã a truplui, ma s-alavdi multu. Ia, un foc njic aprindi un pãduri mari. 6 Sh-limba easti foc, lumea a nindriptatiljei. Limba easti bãgat namisa di mãdularili a truplui, lãvusheashti tut truplu, aprindi roata a banãljei shi s-aprindi di Gehena. 7 Cã itsi agrimii, pulji, azvãrnitori shi creaturi a amariljei suntu imiripsitã shi sumbãgati di fara umineascã, 8 ma limba vãrã om nu poati su imiripseascã. Ea easti un arãu disfãrnat, mplinã di fãrmac tsi adutsi moarti. 9 Cu limba noi ghinicuvãntãm Domnul shi Tatãl, sh-cu atsea noi blãstimãm oaminjlji cai suntu fapts dupã undzearea a Dumnidzãlui. 10 Di unã gurã easi ghinicuvintarea sh-blãstimarea. Frats sh-surãri a melji, nu prindi s-eara ashã. 11 Poati dit un izvur s-easã sh-apã dultsi sh-apã amarã? 12 Poati hiclu s-facã masni, icã yita hits? Ashã, nu poati un izvur cu apã sãratã s-da apã dultsi.

13 Cai di voi easti mintimen shi shtiut? S-li aspunã cu purtari mushatã faptili a lui, cu inimã fronimã tsi yini di mintimeniljea. 14 Macã tu ininjli a voastri avets zilii amarã shi ambitsii egoistã, nu vã alãvdats sh-nu alipidats alihea. 15 Atsea mintimenilji nu yini di nsus, ma easti a loclui, easti nisufliteascã shi diavuleascã. 16 Cã aclo iu ari zilii shi ambitsii egoistã, aclo ari mintiturã sh-soi di soi di lucri arãi. 17 Ma mintimeniljea tsi yini dit nsus prota easti curatã, deapoea puituitã, moali, ascultãtoarã, mplinã di njilã sh-cu fruti buni, fãrã-hãtãri sh-fãrã-ipucrizii. 18 Frutlu a ndriptatiljei si seaminã cu pace di atselji tsi fac pacea.