1 Vana vangu, ndikuvasimbila lukani ulu, mbihile kugita sambi. Ila peihumila munu agitile sambi, tugehe na yumwi yeakutusukila kwa Daada, ndi Yesu Kilisito yeagita gyegakumkelasa Nguluvi. 2 Mwene Kilisito ndi usembe yeikutuhechela sambi chetu, kangi sesambi cha nefwe hela, ila sambi cha vanu vonda.

3 Petukwidikila malagilicho gya Nguluvi, suwe, twiwesa kulonga kwa undakyene kuva tukumchela. 4 Munu peilonga kuva akumchela Nguluvi, ila seikolela malagilicho gyake, munu uyo ndi mdesi, kangi seakuuchela undakyane. 5 Ila munu yeyonda yeikwidikila Njowo lya Nguluvi, uyo ndi munya lukelo va undakyene va Nguluvi mugati lyake. Ndeni ndi twivesa kuva na undakyene kuva tugehe pamwi na mwene. 6 Munu yeyonda yeilonga kuva agehe na umwi na Nguluvi, ing'ang'wa kwikala ngita peakalile Yesu Kilisito.

7 Vaganja vangu, lagilicho ili lyendikuvasimbila sealagilicho miya ndi lagilicho lulula lya pamwandi lyemkali nalyo kuhuma pamwandi. Lagilicho ilyo lya pamwandi ndi lukani lula lyempulike. 8 Kangi, lagilicho iyi lyendikuvasimbila ndi lagilicho miya na undakyene vake wiwoneka mugati mwa Kilisito na mugati lyetu ndeni. Kwakuva kisi liyaganika na welu va undakyene uvangile kung'alicha.

9 Yeyonda yeilonga kuva akwikala mu welu, ila akumvipila lukolo vake, munu uyo ave agehe mukisi. 10 Munu yeyonda yeakumkela muyage, akwikala muwelu, kwihela kyokyonda mugati lyake kyekikumgita munu yungi kuvipa. 11 Ila yeakumvipila muyage, akwikala mukisi, igenda mukisi na seichela kweihelela, kwakuva kisi limgitile abihile kulola.

12 Ndikuvasimbila nyenye vana kwakuva sambi chenu chihechilwe kwa litawa lya Kilisito. 13 Ndikuvasimbila nyenye va daada, kwakuva mukumchela Kilisito yeakali kuvangila pamwandi. Ndikuvasimbila nyenye vadimi kwakuva mumwesile yula Muwofu.

14 Ndikuvasimbila nyenye vana kwakuva mkumchela Daada. Ndikuvasimbila nyenye va daada kwakuva mkumchela mwene yeakali kuvangila pamwandi. Ndikuvasimbila nyenye vadimi kwakuva mgehe na ludali, luchowo lwa Nguluvi ligehe mugati lyenu na mumwesile yula Setani.

15 Mbihile kukela makani mawofu gegagehe muinyi vala kyokyonda kya muinyi. Munu yeakugakela makani mawofu ga inyi, lukelo va Daada sewiwesa kwikala mugati lyake. 16 Makani mawofu gegagehe muinyi ndi ludoboko lihafu cha muvili na kidada kya finu fyetunafyo vanu na kufidoboka na kwidumbila finu fyongofu fyeugehe nafyo. Finu fyonda ifyo sevihuma kwa Daada, ila fihuma muinyi. 17 Inyi pamwi na finu fyake fyonda fya kudobocheka fichumba, ila munu yeigita kyeikela Nguluvi, ikwikala figono fyonda ngajila mwiso.

18 Vana vangu vendikuvakela, mwiso ugehe pepi! Mkapulike suwe, kuva mpinja va Kilisito ekwacha na nondee vapinja volofu va Kilisito vafikile suwe, ndena twichela kuva mwiso ugehe pepi. 19 Vanu avo vahumie kwa nefwe, ila sevakali na umwinga va undakyene na nefwe. Kwakuva ngita ngavavechile pamwi na nefwe ngavasigiye kwa nefwe. Ila vakahegile, neke iwoneke wachi kuva sevakali na umwi na nefwe.

20 Ila nyenye mgavilwe Muhe va Nguluvi na Kilisito, ndena mwichela undakyene. 21 Suwe, ndikuvasimbila sekwakuva semwichela undakyene, ila kwakuva mukuwuchela undakyene. Kangi mwichela kuva udesi vovonda sewihuma muundakyene.

22 Mdesi ndi ani? Ndi yula yeilema kuva Yesu se Kilisito. Munu va ndeni ndi mpinja va Kilisito, kwakuva akumlema Daada na Mwana. 23 Kwakuva munu yeyonda yeakumlema Mwana, akumlema na Daada na yeyonda yeakumwidikila Mwana, akumwanuka Daada.

24 Suwe, unanzi ugu vemuupulike kuhuma pamwandi na ukale munumbula chenu. Ngita unanzi uwo vemuupulike kuvangila pamwandi peukala mugati lyenu, suwe, na nyenye vonda figono fyonda damwikala muumwinga na Mwana na Daada. 25 Jangile lyealongile ndi ili damwikwanuka wumi va figono fyonda ngajila mwisho.

26 Ndivasimbilie lukani ulu, kukyanya lya vanu vala yevisaka kuvachanga nyenye. 27 Ila nyenye Nguluvi avagaviye Muhe va Nguluvi. Ngita Muhe uyo ikwendelela kwikala mugati lyenu, semwing'ang'wa kuwulanichwa na munu yoyonda. Kwakuva Muhe akuvawulanicha kila kinu na mawulanicho gake ndi gaundakyene, sega udesi. Suwe mukolele mawulanicho gya uyo Muhe na muvecha muumwi va Kilisito.

28 Suwe, vana vangu, mwikale muumwai na kilisito, neke chipindi peiwuya kangi tuveche vakangafu na tubihile kwifiya kwa soni kigono kya kutang'ana na mwene. 29 Mwichela kuva Kilisito akagitile gyegakumkelesa Nguluvi, suwe, mwing'ang'wa kuchela kuva kila munu yeigita gyegakumkelesa Nguluvi ndi mwana va Nguluvi.