1 Mulole Daada peakutukela mbaka tukemelwa vana va Nguluvi! Ndakyene ndi tugehe ndeni. Vanu se vakumwidikila Nguluvi sevakutuchela kuva nefwe nde vanu va Nguluvi. 2 Vaganja vangu, nondee nefwe tu vana va Nguluvi, ila Nguluvi seatuwonise dapetwivecha chipindi kyekikwacha. Ila twichela kuva chipindi Kilisito dapeiwuya kangi, datwiwana nave, kangi datukumlola ngita aviye. 3 Suwe, munu yeyonda yeihuvila kwa Kilisito, aying'alichwe, neke aveche ngita Kilisito aviye.

4 Munu yoyonda yeigita sambi seikwidikila malagilicho gya Nguluvi, kwakuva sambi ndi kuleka kudikila malagilicho ga Nguluvi. 5 Mwichela kuva Kilisito akachile kuhecha sambi chetu kwakuva mwene Kilisito seakali na sambi yeyonda. 6 Ndeni, yeyonda yeikwendelela kwikala muumwi na Kilisito seigita sambi, ila kila yeikwendelela kugitile sambi seakamchela kangi seakummanya Kilisto ndi ani.

7 Suwe, vana vangu munu yoyoda abihile kuvachanga. Munu yeigita makani gyegakumkelesa Nguluvi ndi ikwidikilwa na Nguluvi ngita fila Kilisito peidikilwe na Nguluvi. 8 Ila munu yeigita sambi ndi va Setani, kwakuva Setani akagitile sambi kuhuma pamwandi. Ila mwana va Nguluvi achile muinyi kwananga kasi lya Setani.

9 Kila yeagehe mwana va Nguluvi seigita sambi, kwakuva kyanda kya Nguluvi ugehe mugati lyake, seiwesa kugita sambi kwakuva agehe na wumi umwiya weagavile na Nguluvi mugati lyake. 10 Ila munu yoyonda yeseigita makani gyegakumkelesa Nguluvi na yeseakumkela muyage, mwene semwana va Nguluvi. Ndeni, nde ng'asi lya kuvachela ani mwana va Nguluvi na ani mwana va Setani.

11 Njowo chemchipilike kuhuma pamwandi ndi ichi, twing'ang'wa kwikela. 12 Tubihile kuvecha ngita Kaini kwa kulongochwa na Setani, akamdochile lukolo vake Abeli. Wuli, akamdochile? Akamdochile kwakuva magito gyake Kaini gakali mawofu, ila ga lukolo vake Abeli gakamkelise Nguluvi.

13 Nondee, vaganja vangu, mbihile kududuva ngita vanu va muinyi vakuvavipila nyenye. 14 Nefwe twichela kuva tuhumile muludali lwa kufuwa na kwingila mu wumi kwakuva tukuvakela vayetu. Munu yeseakumkela muyage husigala mukufua. 15 Kila munu yeakumvipila muyage mwene ndi mdocha vanu, nyenye mwichela kuva mdocha yoyonda yula ihela wumi va figono fyonda mugati lyake. 16 Nefwe tuchelile lukelo ndi liki, kwakuva Kilisito akahechile wumi vake kwa nefwe. Kangi na nefwe ndeni ndeni twing'ang'wa kuhecha wumi vetu kwakuva lya vanu vangi. 17 Ngita munu ndi mmosi va finu na akomlola muyage ihela kinu, ila seakumtanga, iwesa wuli, kulonga kuva akumkela Nguluvi? 18 Vana vangu, tubihile kwikwela kwa njowo hela, ila twikela undakyene kwa kwigitila manofu.

19 Ndena ndi twiwesa kuchela kuva nefwe ndi vanu vake ndakyane na setwivecha na wogofi pautalo lya Nguluvi. 20 Ngita tukwihiga munumbula chetu tugitile na sambi, twave na tugehe na lutengamaso pautalo lya Nguluvi, kwakuva twichela kuva Nguluvi ndi mkomi hilo kuchumba numbula chetu na mwene ichela kila kinu. 21 Vaganja vangu, ngita numbula chetu sechikutuwonesa kuva tugitile nogwa, suwe, tugehe na vakakatima pautalo lya Nguluvi, 22 na kwanuka kyokyonda kwa mwene kyetusuka, kwakuva tukugadikila malagicho gyake na kugita gala gegakumkelicha. 23 Lulagilicho lwake ndi ulu, kumwidikila Mwana vake Yesu Kilisito na kwikela ngita peatulagiche. 24 Munu yeidikila malagilicho gya Nguluvi ikwikala muumwi na Nguluvi na Nguluvi akwikala muumwi na mwene. Nefwe twichela kuva Nguluvi akwikala muumwi na nefwe, kwa ng'asi lya Muhe yeatugavie.