1 Tukuvalunduchila njowo cha yula, Njowo lya wumi akali kuhuma pamwandi. Nefwe tukampulika na kumlola kwa meho gyetu, tukali tukumlola na kumbyalisa kwa mawoko gyetu. 2 Ena, mwene yeagehe wumi peakahumile kwa nefwe. Tukamlolile na ndeni, tuwesa kuvalongela vanu vangi kutigila mwene. Nondee kuvalongela njowo chake mwene ndi wumi va figono fyonda ngajila mwiso yeakali pamwi na Nguluvi Daada na akawonekine kwa nefwe. 3 Tukuvaladalikila njowo cha Yesu uyo, yetukamwonile na kumpulika, neke muveche pamwi na nefwe muumwinga wetugehenavo na Nguluvi Daada na Mwana vake na Yesu Kilisito. 4 Tukuvasimbila nyenye lukani ulu neke tuhekelele hilo.

5 Suwe, lukani lwetupulike kwa Yesu na yetukuvadalikila ndi iyi, Nguluvi ndi welu na kwihela kisi mugati lyake. 6 Petulonga kuva tugehe na umwi na mwene kuno tukwendelela kwikala mukisi, tulonga udesi na setukwikala kwa undakyane kwa njowo na magito. 7 Ila petukwikala mu welu, ambamo Nguluvi yumwene ndi welu, suwe, twivecha na umwinga nefwe kwa nefwe. Danda lya Yesu Kilisito na Mwana vake, yeikutung'alicha sambi chonda.

8 Ngita tulonga kuva twihela sambi, tukwichanga vavene na undakyene kwihela mugati lyetu. 9 Ila, ngita tukwidikila na kulonga kuva tugitile sambi, Nguluvi akutuhechela sambi chetu na kutung'alicha uwofu vonda, kwakuva mwene ndi akwidikilwa ugita gala gyeging'ang'wa. 10 Petulonga kuva setugitile sambi, twivecha tukumgita Nguluvi kuva mdesi, kangi nefwe tukanile njowo lyake.