1 Vaganja vangu, iyi ndi baluwa lya uvili yendivasimbiye. Baluwa chonda chivili ndigechile kuvawiwusa muveche na mahocho manofu gegikumkelesa Nguluvi. 2 Ndisaka mugavuviwuke njowo chechilongilwe na vavichi vevidikilwe pautalo lya Nguluvi na muwiwuke yila lagilicho lya Mtwa na Mlowa vetu gyemgavilwe kuchumbila kwa vanjagila vanu. 3 Kwanja muchele kuva figono fya mwiso davakwacha vanu vevilongochwa na ludoboko njanganifu, 4 vakilonga, "Akavalongiye kuva daiwuya! Nondee agehe kwiya? Kuhuma pevafuwe vakuuku vetu, finu fyendelie ndeni ndeni ngita pekikali kikwendelela kuhuma peiwumbilwe inyi." 5 Vanu ava kwa dadi lyao husemwa kuva daha Nguluvi alongile luchowo hela nacho luhano na inyi chikawumbilwe. Inyi ikawumbilwe kuhuma mu malenga, 6 na kangi kuchumbila kwa malenga ago gya ulava, inyi lya chipindi chila ikwanangilwe. 7 Ndeni luchowo ulo ulo lwa Nguluvi akavika lifunde na inyi lya nondee chivikilwe kwajili lya kigono kya kuhigwa nongwa na kudochwa kwa vanu vonda sevamdikiye Nguluvi.

8 Ila vaganja vangu, mubihile kusemuwa lukani limwi ilyi kuva kwa Mtwa kigono kimwi ndi ngita miyaka elufu yimwi na miyaka elufu yimwi ndi ngita kigono kimwi. 9 Mtwa seigita molemole kugita gala gyeavalongiye, ngita vanu vangi pevihocha kuva igita molemole. Ila Mtwa akuvahuvilila nyenye, kwakuva seikela ata munu venu ayage, ila huvakwega kwa mwene neke vahongeche.

10 Ila kigono daiwuya Mtwa, ngita muhichi peikwacha. Kigono ikyo, luhano chiyaga kwa mdilimo va lichwi likomi, fiwumbe fyonda fyefigehe pa lifunde finyanywa lyoto. Na inyi iyaga na finu fyonda fyefigehe mugati lyake fipiya na lyoto. 11 Ngita finu fyonda finyanywa kwa namuna iyo. Nondee, wuli nyenye mwing'ang'wa kuva vanu va namuna liki? Mwing'ang'wa kwikala maisa gegahaguliwe kwajili lya Nguluvi na kuwidikila mwene, 12 pemukukichindila kigono kila kya Nguluvi na kuigita ikwache kisatu, kwakuva kigono ikyo lifunde dalinyanywa lyoto na fiwumbe fyonda fyefigehe mu lifunde dafinyanywa na lyoto. 13 Ila ngita peakatulongie tukuichundila lifunde limiya na inyi miya ambapo vanu vigita hela gala gegakumkelesa Nguluvi.

14 Ndeni, vaganja vangu, pemugehe muchindila kigono kila, mugangamache hilo kuva vasanzi mubihile kuva na uvifyi vala nongwa na kuva na lutengamaso na mwene. 15 Mwing'ang'wa kuchela uhuvililo va Mtwa vetu nde ukuvagita vanu mulowolwe ngita ndeni likolo veyu yetukelie Paulo peavasimbiye kuhumila na uginyange weagavilwe, 16 ngita peilonga pakyanya lya makani aga mu baluwa chake chonda. Makani gangi mu baluwa ichi ndi ngakafu kuchela na makani ambagyo vanu vapufi na sevadikilwa, vanu ava uhecha mana lya kuvayagicha vanu kwa masimbo gangi. Ila kwa kugita ndeni vakwiyanangika vavene.

17 Vaganja vangu, muchelile suwe makani aga, ndeni muyidime. Vabihile kuvakwega na vanu ava vahofu sevifwata malagicho na mulemwe kukolela undakyene. 18 Ila mukule mu usanzi na kumchela Mtwa na Mlowa vetu Yesu Kilisito. Ukomi ndi vake, nondee na ata mbepali! Ndakyene.