1 Nene Simoni Peteli, mnyingendwa na mnjagila va Yesu Kilisito.

Ndikuvasimbiliya nyenye yemumdikiye Yesu Kilisito, kwa undakyene va Nguluvi vetu na Mlowa vetu Yesu Kilisito, muwanuke udikilo wulawula va galama ngomi yetuwanuke nefwe.

2 Ndikuvang'ang'ila usangi va Nguluvi na lutengamaso kwa kumchela Nguluvi na Yesu Mtwa vetu.

3 Kwa umwimike vake Nguluvi katugavila nefwe ahadi ngomi na figehe na galama yeatukemele kwa ukomi vake na usangi vake mwene. 4 Ndeni, atugavile ahadi lyake ngomi na lya galama, neke kwa kuchumbila ago muveche pamwi kwa kwikala kwa kumfwatila Nguluvi na muyiyepe kuhuma mu uyagilo va mu inyi kwakuva lya ludobokelo chihafu. 5 Kwa ndeni, mugangamale hilo mu usangi venu kuhongelecha usanzi venu na mu usanzi venu muhongeleche luhala, 6 na luhala venu muwese kuyilongocha mwavene na mu kuyilongocha mwongeleche uhuvililo na uhuvililo venu mwongeleche kwa kumchela Nguluvi, 7 na kumchela Nguluvi mwongeleche lukelo lwa ukolo na mulukelo lwa ukolo mwongeleche lukelo. 8 Makani aga gyonda pegivecha kwa nyenye kwa wolofu, semuvesa vagata na dayasevakanila kugita makani manofu mu kumchela Mtwa vetu Yesu Kilisito. 9 Ila munu yeihela finu ifyo seilola patali na abofwike meho na asemwile kuva ahechilwe sambi chake cha daha.

10 Suwe, vakolo vangu, mugangamale hilo kuwugita kukemelwa na kuhaguliwe na Nguluvi na pemwigite ndeni semuguwa ha, 11 na kwa kugita ndeni damwikwanukwa unofu na kwingila mu ung'achale va mbepali va Mtwa na Mlowa vetu Yesu Kilisito.

12 Ndeni, dandikuvawiwusa njowo ichi figono fyonda, ata ngita mwichela na mugehe vakangamafu mu undakyene vemuwanuke. 13 Ndihocha ndi lukani lunofu kwa nene, chipindi chonda chindikwikala baha painyi, 14 Kwakuva ndichela kuva chipindi cha kufuwa chigehe pepi, ngita Mtwa vetu Yesu Kilisito peandongiye wachiwachi. 15 Na nene dandigita kwa ukangamafu neke pendifua muwese kuwiwuka makani aga figono fyonda.

16 Chipindi petuvawulanicha ukomi vake Yesu Kilisito na kwacha kwa mwene, setukafwatile humulilo chechitungilwe kwa usugu, ili nefwe ndi vaswida va ukomi vake. 17 Kwakuva akapatile uginyange na ukomi kuhuma kwa Nguluvi Daada, chipindi lichwi pelimwachiye kuhuma kwa Nguluvi yeagehe na ukomi ikalongie, "Uyu ndi Mwana vangu yendimkeliye, yendikeliswa nave." 18 Na lichwi ilyo tukaipulike kuhuma kuluhano kwa Nguluvi petugehe pamwi na mwene kukyanya lya kila kidunda kya Nguluvi. 19 Ndeni ndeni, tugehe na njowo chevasimbile daha na vavichi va Nguluvi, gilonga undakyene, na nyenye ngamgita unofu ngita ngamupulikicha, ngita fila chibatali cheching'alika mukisi mbaka kukiye na nondwa lya pamilau ing'aliche munumbula chenu. 20 Pautalo lya njowo chonda wiwuke kuva kuhela uvichi mu masimbo gyegihumila na uganulo va ngita akela mvichi yumwene, 21 ila vanu valongile njowo icho chechihuma kwa Nguluvi ngita ndeni valongwichwe na Muhe va Nguluvi.