1 Pakahumie vavichi va udesi pagati pa vanu na pamwi na vawulanicha va udesi davahumila mugati lyenu. Vanu ava davaingicha mawulanichi gya udesi gya kuyagicha vanu na kumlema Mtwa yeavakombuwe na davakwiletela uhanango bahobaho vawo vavene. 2 Kangi vanu volofu davachifwata makani gyawo mahofu na kwakuva iyo vangi davachibeda ng'asi cha undakyene. 3 Mu ludoboko lyawo lya davayipatila mali kuhuma kwa nyenye kwa kuvalongela makani gya udesi. Kuhigwa nongwa kwavo kukalanduchwe kuhuma pamwandi na kuhanagwa kwavo kukuvachindila!

4 Ngita Nguluvi seavawonile lusungu vandumindumi pevagitile sambi, ila akavatagile mulyoto weseuchima na vawopilwe ndegeyi gya kyuma mukisi hilo vakichindila kigono kila kya kuhigwa nongwa. 5 Ndeni ndeni ngita Nguluvi seakaiwoniye lusungu inyi baho pamwandi, ila akaletile ulava likomi mu inyi lya vanu vikwikala bila kumuwidikila mwene, ila akamuwokola Nuhu yeakali akidalika undakyene pamwi na vanu vangi saba. 6 Ndeni ndeni Nguluvi akachitovile vanu va mwani gya Sodoma na Gomola kwa kuginyanya lyoto, iveche kimanyilo kwa makani dachikuvapata vanu vevikwikala bila kumuwidikila mwene. 7 Akamlowa Lutu, munu msanzi, yeakali ing'ung'ulichwe hilo na makani gya ugoni gya vanu vahofu. 8 Kwakuva Lutu akali akwikala pamwi na vene, kila kigono akasugwime hilo mu numbula lyake yeihaguliwe kwajili lya Nguluvi na peapulike na kugalola makani gyao mahofu. 9 Ngita ndeni, Mtwa achela namuna lya kuvalowa vanu vevikwikala kwa kumuwidikila mwene kuhuma mumagecho na namuna lya kuvavika vawofu mumagudo neke akavatove kigono kya kuhigwa nongwa, 10 hilo vala vanu vevifwata ludoboko luhafu lwa mvili na kubeda mamulaka gya Nguluvi.

Vanu ava vasugu na vikwidumba, vakufiliga na sevakuvaginya fiwumbe fyefigehe na ukomi va kuluhano, 11 ila ata vandumindumi vana umwimike na ludali kuchumba avo vawulanichi va udesi, sevakuvaliga fiwumbe avo chipindi vakuvalata pautalo lwa Mtwa. 12 Ila vanu avo viliga kyokyonda kila sevakichela, ava ngita vang'oko vihela luhala ambavo vababwa neke vabatwe na kuhinjwa, vanu avo sevichela yula yevakumlinga na ndeni vihanangwa ngita vang'oko, 13 vihombwa magudo kwa gala magudo gyevavagitile vangi. Vavene vilola lya kuva nde unofu kuita ugoni pamunyi pee. Ndeni vawo ndi ngita mavifyu na vileta nyoni chipindi vikwiwunga na nyenye mu lihungu kuno vikwendelela na ng'asi chawo cha udesi. 14 Vidoboka ugoni, sevileka kugita sambi. Vekuvayovelecha vala vanu vevagehe vasosuvafu mbaka mumtego va sambi. Vavene ndi vanu vesevigwita na ndi kilelo kyekikotoliwe na Nguluvi. 15 Vavene nde valekile ng'asi nofu na vakafwatile ng'asi njanganifu, vakafwatile ng'asi yila yila lya Balamu, yeakali mwana va Bioli, yeakeliye kuhombwa kwa kugita unjanganifu, 16 ila alakiliwe kwajili lya uhofu vake. Lipunda yeseilonga, akalongile kwa lichwi lya munu, akaupecha lukwale lwa uyo mvichi.

17 Vanu avo ndi ngita kilwita chechigamile, ndi ngita mafunde gyegipugwa na litungu, vanu ava umalilo vawo ndi likisi totolo. 18 Vakwinjuma kwa njowo chechihela mana na kwa ludoboko chawo chiwofu vakuvahovelecha vala ambavo ndeni pepi vahumile mu vala vevigita magito mawofu. 19 Vawulanichi avo va udesi vakuvalongela vanu kuva davavecha pekesu, ila vawo vavene vawopilwe na sambi, kwakuva munu ndi msutu va finu fyonda fyefikumlongocha. 20 Ngita davayepile makani gya uwofu gya inyi iyi kwa kuhuma kwa kumchela Mtwa na Mlowa vetu Yesu Kilisito na kangi viwuya kwihanganisa na makani agyo na kulemwa na makani ago. Kyanda kyawo daivecha njanganifu hilo kuchumba lya pamwandi. 21 Ngaivecha ngiba kwa veni kuva sevangeichela ng'odo ng'asi lya undakyene, kuchumba pevaichelile vailemile lagicho lya Nguluvi gyevagavilwe. 22 Kyevagitile kiwana na ng'ombelo yeilonga, "Libuwa huwuya kuliya gala fyelokuwe" Na ng'ombelo yingi yeilonga, "Ngubi yeagofichwe pambele iwuya kangi kugalawuka mumadope."