1 Nondee, ndigehe na lukani lwa kuvalongela vavaha vevagehe mu lipinga lyenu vevamdikiye Kilisito, nene ndeni ndi mvaha na nene ndi mswida yendikali pamwi mu magudo gya Kilisito na dandivecha mu ukomi daugubutulwa kwa nefwe, 2 muveche vakwamila lila lipinga lya Nguluvi, lyemgavilwe mulikwamile se kwa kuswitilichwa, ila kwa kukela, ngita ndeni Nguluvi peikela mugite. Mugite ndeni kwakuva mukela kugumanikila na se kwa kukela sendi. 3 Mubihile kuvalongocha kwa ludali ava yevagehe panyi lya udima venu, ila muveche uwano kwa ilyo lipinga lya Nguluvi. 4 Neke Mkwamila Mkomi daigubutulwa, mwanuke ingela yeigehe na ukomi na yeseiyagila unofu vake.

5 Ndeni ndeni nyenye vadimi, ndigehe na lukani lwa kuvalongela, mwing'ang'wa kuvapulikicha vavaha. Kila yumwi venu ing'ang'wa kukwika panyi kwa yungi, kwakuva, "Nguluvi akuvapinja vala vene kidada, ila akuvagavila lufunyo vala vevikwika panyi." 6 Suwe, mwike panyi paliwoko lwa Nguluvi munya ludali, neke avakang'iche chipindi chake. 7 Mugavile Nguluvi utatala venu vonda, kwakuva mwene ndi akuvakumbanikila.

8 Muveche meho, mwilole! Kwakuva mchwindama venu, Ibilisi, ichungutilachungutila ngita simba yeibuma akisaka munu amunyopolenyopole. 9 Mugangamale unofu mu udikilo venu na kumpinja mwene, mukichela kuva lukolo venu vonda ku inyi vakupatila magudo gyegiwana na ago. 10 Pemugudika kwa chipindi chidodo, Nguluvi va uvangilo va usanzi vonda, yeavahaguwe mwingile mu ukomi vake va mbepali kwa kwiwunga na Kilisito, mwene davakuvagavila ludali na dakuvatanga na kuvakolela mbihile kuhogoseka. 11 Umwimike vonda ndi vake Mbepali. Ndakyene.

12 Ndivasimbiliye baluwa iyi ndodo kwa utanga va Silivanusi, mkolo yemukumchela na kumdikila. Ndisaka kuvanamacha na kuvalongela kuva iyi ndi usangi va undakyene va Nguluvi. Mwime kwa kugangamala mu usangi vake.

13 Lipinga lya vanu vevamdikiye Nguluvi va ukoya ku Babeli lyelihaguliwe na Nguluvi, vekuvahungila. Ndeni ndeni Maliko yegehe ngita mwana vangu, akuvahungila. 14 Muvahungile kwa kimanyilo kwa lukelo va Kilisito pemutang'ana.

Lutengamaso iveche kwa nyenye yemugehe mugati lwa Kilisito.