1 Suwe, kwakuva Kilisito akagudiswe mu mvili vake na nyenye ndeni mwing'ang'wa muyigangamaliche kwa natilo yila yila, kwakuva ngita mugudiswe mu mvili alekanile na sambi. 2 Kuhuma nondee, kwikala kwenu kwekusigaliye baha kuinyi mung'ang'wa kugita gala gyeisaka Nguluvi, se kufwata ludobokelo chihafu cha muinyi. 3 Kwakuva chipindi chechichumbile kitosile cha kukigita makani gyegigitwa na vanu sevamchele Nguluvi. Mukakalile mu ugoni na udobokelo cha uhafu na msutu va ugimbi na lihungu sechechikumkelesa Nguluvi na kugundamila ming'omong'omo chechikumvipisa Nguluvi. 4 Nondee, vanu avo sevamchele Nguluvi vakuvaduduva pevalolela kuva semugehe pamwi kwa kwikala kwa uwofu na vakuvaheya nyenye, 5 ila ving'ang'a kuhecha valilo lyao pautalo lya mwene yeagehe suwe kuhiga nongwa vala vevigehe uwumi na vala vevafuwe. 6 Nde mana Njowo Nofu chikadalikwe ata kwa avo vevafuwe, neke vahigwe nongwa mu mivili ngita pevihigwa nogwa vanu vangi, vakale mu muhe ngita peikela Nguluvi.

7 Umalilo va finu fyonda ugehe pepi. Ndeni mwing'ang'wa kuva na mipango munumbula chenu na ndeni mwilongoche mwavene neke muwese kumlumba Nguluvi. 8 Kugina ago gyonda, mukelane nyenye kwa nyenye kwa numbula lyonda, kwakuva lukelo ugubika sambi chongofu. 9 Mwiwanuke nyenye kwa nyenye mukaye chenu na kuliya kyakula kwa pamwi bila kung'ung'ulika. 10 Kila yumwi agumbanikile kipanji che agavilwe na Nguluvi kuvatanga vanu vangi ngita mwimilicha msanzi va vipanji vyevihumilana na Nguluvi. 11 Ikiva kipanji kyako kya kudalika njowo cha Nguluvi, njowo chako chive ngita gihuma kwa Nguluvi. Ikiva kipanji kyako ndi kugumbanikila, wing'ang'wa kugumbanikila kwa ludali cheakugavila Nguluvi. Neke mu njowo chonda, Nguluvi anjumwe kwa ng'asi lya Yesu Kilisito na ukomi na ludali ndi chake mbepali na mbepali! Ndakyene.

12 Vaganja vangu, mubihile kududuva kwakuva lya magudo gyemupata nondee, magudo ago gigecha udikilo venu. Mubihile kuhocha kuva lihumila kwa nyenye ndi lukani lwa umanyitu. 13 Ila mwing'ang'wa kukeduka kwakuva mukwiyunga na Kilisito neke mumemechwe lukeduka chipindi ukomi vake daugubutwa. 14 Mufunyilwe nyenye pevakuvaliga kwajili lya litawa lya Kilisito, kwakuva Muhe va ukomi va Nguluvi yeagehe Muhe va Nguluvi, agehe pamwi na nyenye. 15 Abihile kuvecha munu yeyonda yeing'ang'wa kupata magudo, ila mbihile kugudika kwakuva mudochile awu muhichile awu muwofu awu mugitile vanu vagite ndewo awu munu agechile kwingilila makani gya munu yungi. 16 Ila ngita munu akigudiswa kwakuva ndi Mkilisito, suwe abihile kulola nyoni, ila amnjume Nguluvi, kwakuva veve ndi Mkilisito.

17 Chipindi cha kuvanga kuhigwa nongwa kigehe pepi na kuhigwa nongwa kuvanga na vanu vake Nguluvi na ngita daivanga kwa nefwe, liki dakivahumila vala vevakanile Njowo Chinofu cha Nguluvi? 18 Ndeni ndeni,

"Ngita ndi ukangafu kwa vanu vasanzi kulowolwa,

dakihumila liki kwa yula yesemdikila Nguluvi na vene sambi?" 19 Kwa ndeni, vala vevigudika kwa kumkela Nguluvi, ving'ang'wa kumgavila Nguluvi uwumi vawo kwakuva mwene ndi va kuidikilwa yeavawumbile na kuyendelela kugita finu finofu.