1 Ndeni ndeni, nyenye vadala muvapulikiche vagosi venu, neke ata vala vevilemile kugawanuka mawulanicho gya Nguluvi, vayovelechwe na kudikila kuhumila na namuna pemwikwikala, ata ngita dasemulonga kyokyonda, 2 kwakuva davaulola kyanda kyenu ngita vanu vevahaguliwe kwajili lya Nguluvi na vakumginya Nguluvi. 3 Kwilembecha kwa nyenye mbihile kwilembecha kwivihala hela, ngita fila kubota fwili cha mitindo na kufwala malembecho gya sahabu na kufwala myenda gyeging'anyima, 4 ila kwilembecha kwa nyenye kuve kwa mugati weseuhega ha, ambavo ndi unofu va muhe yene ufokomasi na uyigale, ambagyo gikumkelisa hilo Nguluvi. 5 Yendee ndeni vadala vevahaguliwe kwajili lya Nguluvi va pamwandi pevilembechile kwa kumgumbanikila Nguluvi na kuvapulikicha vagosi vawo. 6 Ngita ndeni Sala akampulikiche Ibulahimu, mgosi vake na kumkemela mtwa vake. Na nyenye vadala ndi vana va Sala, ngita pemwigita gegagehe manofu bila kogopa kinu kyokyonda.

7 Ndeni ndeni, nyenye vagosi ikuvang'ang'a kwikala na vadala venu kwa ng'asi lya unginyange mkichela kuva vawo ndi vasosuvafu kuchumba nyenye, mkiwonesa uginyange ngita vahala pamwi na vene va usangi va uwumi, mugite ndeni neke kubihile kuvecha na kinu kyokyonda kya kukanila masuko gyenu.

8 Luchowo lwa kumalila nde ilyi, nyenye vonda mwing'ang'wa mwikale pamwi kwa kupulikichana na muwonelane lusungu na mukelane na muveche vasanzi na vachika. 9 Mubihile kuhomba unjanganifu kwa unjanganifu awu liligo kwa liligo, ila muveche vanu va kuvagavila vangi lufunyo, kwakuva iyi nyenye mukemeliwe na Nguluvi muwese kuwanuka lufunyo. 10 Masimbo ga Nguluvi gilonga,

"Munu yeikela kwikala,

na kulola figono fyolofu fya lufunyo,

ing'ang'wa kukanila lulimi lwake kulonga unjanganifu,

na milomo gyake ibihile kulonga udesi. 11 Ing'ang'wa aleke kugita uhofu na agite manofu,

ing'ang'wa mus ake lutengamaso na kwendelela kwikala kwa lutengamaso. 12 Kwakuva meho gya Mtwa gilola vala vevagehe na usanzi,

na masigicha gyake gipulika masuko gyawo,

ila Mtwa akuvapinja vala vevigita mahofu."

13 Ani davalemacha nyenye, ngita mwigangamaliche kwa kugita manofu? 14 Ila ata ngita ikuvang'ang'a kugudika kwakuva lya kugita manofu, Nguluvi dakuvafunya nyenye. Ila mubihile kumkogopa munu yeyonda na mbihile kuhogoseka. 15 Ila mumnjume Kilisito ngita Mtwa munumbula chenu. Chipindi chonda muveche suwe kumhiga munu yeyonda dayeisaka uganulo kutigila luhuvililo lyenu, 16 ila vahigile kwa ufokomasi na kwa uginyange kwajili lya Nguluvi. Muveche na natilo nofu, neke pemuligwa, vala vevilonga unjanganifu mukyanda kyenu nofu ngita vanu vevamdikie Kilisito, valole nyoni. 17 Kwakuva ndi ngiba kugudika kwa kugita manofu ngita Nguluvi peikela kuchumba kugita manjanganifu. 18 Kwakuva Yesu akafuwe mala imwi ng'ani ngajila lya sambi, yeihela sambi na akafuwe kwajili lya vanu vene sambi, neke avakwege kwa Nguluvi, ila akafuwe mu mvili, ila akagitilwe wumi mu muhe, 19 na kwa ng'asi lya muhe akahelele kuchidalikila muhe chechigehe mukihopo, 20 chila chechikali sechimdikile Nguluvi kuhuma pamwandi, chipindi Nguluvi akali ihuvulila figono fya Nuhu peakali igelanicha Lisafina. Nde vanu vakefu hela vevakali vanu va nane hela na vevalowilwe mu lilava, 21 na malenga gala ndi ngita uwano va ubatiso, ambavo ata nyenye ukuvalowa kuchumbila kuchulubuka kwa Yesu kuhuma kwa vanu vevafuwe. Se kuogofechwa kwa kuhechwa uhafu mu mvili. Ila ndi ngita lilagano lya natilo nofu kwa Nguluvi. Ubatiso ugu ndi ukuvalowa kuchumbila kuchulubuko kwa Yesu Kilisito, 22 yula yeahele kuluhano kwa Nguluvi na akalile palubali lya liwoko lya ndewo va Nguluvi na ndumindumi na vakomi na vene ludali vagehe panyi lyake.