1 Ndikela muchele pendigita kasi kwa kugangamala kwajili lyenu na kwakuva lya vanu va Leodekia na kwa vanu vonda vesevaniwonile kwa meho. 2 Ndigita ndeni, neke ndivangangamiche na kusigala muukelo, neke vaveche na luchelo lwelukuvagavila undakyene ndena vachela lukani lwa Nguluvi chechigehe mulupwepo, mwene ndi Kilisito. 3 Mugati lyake gafihilwe manofu gyonda gya uginyange na luchelo.

4 Ndikuvalongela makani aga, neke munu yeyonda abihile kuvachanga ata ngita makani manofu hilo. 5 Ndilonga ndeni ata ngita ndigehe patali na nyenye, ila mawocho gangu gagehe pamwi na nyenye. Ndekeduka kuwakuva ndikuwulola wumwi venu peugehe ukangafu mu Kilisito.

6 Nondee, kwakuva nyenye mumwidikiye Kilisito kuva ndi Mtwa, suwe, mwendelele kumufwata mwene. 7 Mwendelele kuvecha ukangafu mukudikila hilo unanzi va Kilisito, kangi mwendelele kwiwulanicha hilo kumchela mwene. 8 Mwilolele munu yeyonda abihile kuvachanga kwa mawulanicho gya udesi, gyegihuvilila mumawanuko gya vanu na mawulanicho gya mahoka na se gya Kilisito. 9 Kwakuva mugati lyake Kilisito ngita munu, Nguluvi akwikala mugati lyake, 10 nyenye mugavilwe wumi vonda kwa kwiwunga na Kilisito, mwene ndi mkomi hilo pakyanya lya filongochi na vatavala na ukomi vonda na umwimike gonda. 11 Kwa kwiwunga na Kilisito nyenye mkadumulwe bina, ila sekwakudumulwa bina kwakugitwa na vanu, ila yeigitwa na Kilisito mwene na kuwalowola mumuvili va sambi. 12 Pemukabatiswe mukasilwe pamwi na Kilisito kangi mukachulubuke pamwi na mwene, kwakuva mukaidikile muludali lwa Nguluvi yeamchulumbuchwe Kilisito kwa vanu vevafuwe. 13 Pamwandi nyenye mukali mufuwe kwa makani gya ki muhe kwakuva lwa sambi chenu, kangi mukali vanu va inyi yingi. Ila Nguluvi avagavile wumi pamwi na Kilisito. Nguluvi atuhechilile sambi chetu chonda. 14 Nguluvi akatigiliche lila lihati lyelisimbilwe nogwa chetu kwa kukong'elewa pakipindilihicho. 15 Pala pakipindilihicho Kilisito akanyagile ludali chawo avo mahoka na vatavala, akavagitile vawone nyoni kwa kuvakwega ngita vasutu mulugendo lwa usindi.

16 Suwe, mbihile kudikila munu yeyonda avavikile malagilicho kutiya kyakuliya awu kinyuwo awu kigono kya lihungu awu lihungu lya mwechi mumiya awu Kigono kya Kutulula. 17 Makani agyo ndi kinyigi kya makani gyegikwacha, ila makani gya undakyene giwoneka kwa Kilisito yuwene. 18 Mubihile kumpulikicha munu yeyonda yekwidumba kuva ndi msanzi kwa mfokomasi va udesi na kuvafunya ndumindumi va kuluhano kwa Nguluvi kuno ukela kugalonga gala gyevihocha kuva Nguluvi avawonesile. Munu ngita uyo abihile kuvahechela fupo lyenu yemvikilwe lya figono fyonda. Mwene ndi mpufi kwa mahocho gya manjanganifu gya muinyi, 19 kangi uyo ayinegile na Kilisito yeilongocha vanu vake ngita mutuwe peukuwulongocha muvili. Kuhuma kwa Kilisito, muvili vondo ugavilwa kyakuliya na kukula kangi akuwunganiswa pamwi na fiwungo na misipa, ndena nde ikela Nguluvi.

20 Mukafuwe pamwi na Kilisito na kulowolwa kuhuma muludali cha mahoka vevitavala inyi iyi. Wuli, mwikwikala ngita vanu va inyi iyi? Wuli, mwidikila malagicho aga? Ngita ndeni, 21 "Mbihile kukolela iki" "Mbihile kugecha iki" "Mbihile kubyalisa iki"? 22 Makani ago gonda ndi pakyanya lya finu fyefihanagika pegitumilwa, ago ndi malagicho na mawulanichi gya kimunu hela. 23 Ndakyene vanu vevifwata malagicho ago viwoneka kuva na uginyange. Vifwata namuna lya kumfunya Nguluvi gyevivikiye vavene, ufokomasi na kutavala muvili kwa ung'ali. Ila malagilicho agyo gyevavikiye segiwesa kukanila ludoboko chawo cha mivili.