1 Nyenye wakomi muvagitile vasutu venu makani gyekumkelesa Nguluvi, kwakuva na nyenye mugehe na Mtwa kuluwano.

2 Mbihile kuleka kusuka ng'odo, muvese meho kwa lyolyonda mukusuka na kumuhongecha Nguluvi. 3 Ndeni ndeni, mtusukile na nefwe neke Nguluvi atugavile fwasi lya kudalika na kulandula unanzi va Kilisito weufihile dahile na nene ndiwopilwe kwa nogwa lya kudalika Njowo chake. 4 Suwe, mundisukile kwa Nguluvi neke ndivese kudalika ngita peing'ang'wa kudalika neke vanu vawese kuchela wachiwachi. 5 Chipindi mugehe na vanu sevanuidikiye Kilisito muwonese kyanda nofu kangi mutumile chipindi ikyo kuvatanga. 6 Njowo cheni chiveche chinofu na ndeni ndeni muchele kuvahiga vanu unofu.

7 Lukolo vetu Tikiko yetumkeliye, mnyigendwa mwidikila na mnyigendwa mukasi lya Mtwa, daakuvalongela makani gyangu gyonda. 8 Ndimulagiliche kwa nyenye, neke kuvalongela makani gyenu neke avanamiche numbula chenu na kuvagita muveche na lukeduko. 9 Ikwacha pamwi na Onesimo lukolo vetu yetumkeliye na mwidikilwa, mwene nde mweyetu awo davakuvalongela makani gyonda gyegigitwa baha.

10 Alisitaliko yeagehe pamwi na nene mukiwopo, Maliko lukolo vake Balinaba. Mupulike suwe, makani gyake peikwacha kwa nyenye mumuwanuke. 11 Yoshuwa yeikemelwa Yusito, akuvahungila. Mugati lya Vayawudi vevawanuke udikilo avo ng'ani ndi vigita kasi pamwi na nene kwakuva lya ung'achale va Nguluvi. Navo vavechile lutango mkomi kwa nene. 12 Epafula muyenu na mnyigendwa va Kilisito Yesu, akuvahungila. Chipindi chonda akuvasukila nyenye kwa lugangamaso neke muveche vakangafu muudukilo neke muveche kwima kwa kugangamala, mwigangamale na muveche vakangafu mumakani gyonda gyeisaka Nguluvi. 13 Ndikumchela kuva igita kasi kwa lugangamalo kwakuva lya nyenye na kwakuva lya vanu va Leodikea na Hielapoli. 14 Luka yula mlami yetumkeliye akuvahungila ndenindeni na Dema akuvahungila. 15 Muvahungile vakolo vevagehe ukoya Leodekia. Mumuhungile mhacha vetu Nimfa muudikilo na lipinga lya vanu vevamuidikiye Kilisito vevitang'ana mu kaye lyake. 16 Pemwisinda kwimba baluwa iyi, mung'ang'wa kuvagavila mapinga gangi gya vanu vevamuidikiye Kilisito va ukoya Leodekia navo vikwimba baluwa iyi. Na nyenye mwing'ang'wa kwimba baluwa yendivagavile vene. 17 Mumlongele Alikipo kuva aigite unofu yila kasi yeagavilwe na Mtwa kuimala. 18 Nene Paulo ndisimba luhungilo ulu kwa liwoko lyangu.

Mundiwiwuke kuva ndigehe mukiwopo, ndikuvasukila lusungu lwa Nguluvi uveche na nyenye.