1 Suwe, Nguluvi avachulubuchwe pamwi na Kilisito, mugasake makani gegagehe kukyanya kweagehe Kilisito akalile lubali lwa liwoko lya ndewo lya Nguvuli. 2 Mugahochele gegagehe kukyanya kwa Nguluvi na mbihile kugahocha ga baha painyi. 3 Kwakuva nyenye mufuwe na uwumi venu ufihilwe pamwi na Kilisito mu Nguluvi. 4 Chipindi Kilisito nde uwumi venu mwene dapeiwuya, ndeni nyenye damwanuka pamwi na mwene na kuvecha muukomi.

5 Suwe, muleke kutumila mivili gyenu kwa makani gya muinyi ambafyo ndi usasi na uhafu na ludobokelo luhafu na mahocho mahafu na kudobokela na kufunya ling'omong'omo. 6 Kwakuva lya njowo icho luvipo lwa Nguluvi ikuvachila vanu vevigita sambi. 7 Nyenye pamwandi mukali mwigita makani ago, pemukali mwikwikala mu makani ago. 8 Ila nondee mwing'ang'wa kuleka makani ago. Luvipo na ludoboko na uwafu na madusi gabihile kuhuma mumilomo gyenu. 9 Mubihile kulonga udesi, kwakuva nyenye mulekile wumi venu va dahile pamwi na magito gyonda, 10 mufwalile umunu umiya. Nguluvi awuvikile umunu miya mugati lyenu na kuvagita muwane hilo na mwene, neke mumchele hilo. 11 Ndena kwihela tafwauti lya Muyawudi na munu yeseagehe Muyawudi yeadumulwe bina awu yeseadumulwe bina, yeimbile na yeseimbile, msutu na munu semsutu. Kilisito ndeyeagitile gyonda kangi agehe mugati lya vonda.

12 Nyenye ndi vanu va Nguluvi, mwene yeavakeliye na kuvahagula. Ndeni muveche na lusungu na usanzi na udedevu na ufokomasi na kuhuvilila. 13 Mwihuvilile na mwihongiche. Munu ngaamgitile mweyage nongwa lyolyonda mwing'ang'wa kuhongechana ngita Mtwa peavahongeche nyenye. 14 Kuchumba ago gyonda mwing'ang'wa kuvecha na lukelo, kwakuva lukelo ukuvavika pamwi vanu vonda mu umwi va undakyene. 15 Na lutengamaso va Kilisito uveche numbula chenu. Nyenye muvechile muvili umwi ndena mukemelile kwikala kwa lutengamaso, kangi muveche vanu vemukumuhongecha Nguluvi. 16 Unanzi va Kilisito ukale kwa wongofu mugati lyenu. Mwiwulaniche na kulakilila kwa uginyange. Musomole msambo na tensi cha munumbula. Mumusomoliye Nguluvi munumbula chenu kwa kuhongecha. 17 Kokyonda kyemlonga awu kyemugita mgite kwakuva lya Mtwa Yesu na kumuhongecha Nguluvi Daada kwa kuchumbila mwene.

18 Nyeye vadala muvapulikiche vagosi venu, ndi ying'ang'wa kwa vanu vevakumdikila Mtwa.

19 Nyenye vagosi muvakele vadala venu, mbihile kuvalakilila.

20 Nyenye vana muvapulikiche valelo venu figono fyonda kwakuva ago ndegakumkelesa Mtwa.

21 Nyenye valelo mbihile kuvavipisa vana venu vivecha kudenyeka numbula. 22 Nyenye vasutu muvaginye vakomi venu va muinyi mumakani gyonda. Mubihile kugita ndeni pevakuvalola, neke kuvawonesa muvanofu. Ila mugite ndeni kwakuva lya kumginya Mtwa. 23 Kila kyemugita mugite kwa numbula yonda, ngita vanu vemukumgitila Mtwa na sekwakuva lya munu. 24 Muwiwuke kuva Mtwa Kilisito yemgumbanikile daakuvagavila fupo yila yeavavikile vanu vake. 25 Yeigita manjanganifu daihombwa kuumana na unjanganifu vake, kwakuva Nguluvi ihela umwilila.