1 Nyenye ipo pamwandi mukali ngita mufuwe kwakuva lya nongwa na sambi chenu. 2 Chipindi chila mukakaliye kufwatila makani mawofu ga muinyi iyi, mukali mukumdikila Setani mkomi va mahoka va luhano, uyo Setani igita kasi mugani lya vanu sevakumdikila Nguluvi. 3 Ipo pamwandi, nefwe tukali ngita vene, twikalile kuhumila na ludobeko lwa inyi na kugita makani gala gegikelise mivili na luhala lwetu, nefwe ndeni ndeni tukang'ang'wa kuhigwa na Nguluvi ngita vanu vangi vesevakumdikila Nguluvi.

4 Ila Nguluvi nde munya lusungu cholofu, akatukeliye kwa lukelo mkomi, 5 ata ngita tukali tukafuwe ngajila lya sambi. Akatugitile wumi pamwi na Kilisito. Kwa usanzi va Nguluvi nyenye mutulowolwe. 6 Kwa kuvecha pamwi na Kilisito Yesu, Nguluvi akatuchulubucha pamwi na mwene, neke tutavale pamwi na mwene kuluwano. 7 Neke chipindi kekikwacha aveche kuwonesa wolofu va usanzi vake veseugelwa, veugubutuliwe kwa nefwe kwa kwiunga na Kilisto Yesu. 8 Kwakuva kwa usanzi va Nguluvi mulowilwe kwa ng'asi lya kudikilo. Lukani ulu semahumilo gya magito gyetu ila ndi fupo lya Nguluvi. 9 Seakavalowola kuhumila na magito gyenu manofu, ndeni munu yoyonda abihile kwidumba. 10 Nefwe ndi fiwumbe fya Nguluvi kwa kwiwunga na Kilisto Yesu, akatuwumbile neke twikale kwa kugita makani manofu gyeatugitile tugagite.

11 Kwa ndeni, mwiwuke kuva nyenye pamwandi mkali vanu sevayawudi vemukemelwa "Sevadumilwe bina" na Vayawudi vevikwikemala, "Vevadumilwe bina" Ndeni, kudumula bina yeigitwa mumvili va munu kwa mawoko gya munu. 12 Pamwandi mkali mwihela Kilisito, se mukali vanu va Isilaeli. Mukali vagenji na semkali na pono lya gala malagano lyeajangile Nguluvi. Mukali mwihela luhuvililo nde ngita vanu sevamchele Nguluvi baha muinyi. 13 Ila nondee kwa kwiwuga na Kilisito Yesu, nyenye pamwandi mukali kutali na Nguluvi nondee muhegelichwe kwa kufuwa kwa Kilisito pakipindilihicho. 14 Kwakuva Kilisito mwene atuletiye lutengamaso kwa kuvagita Vayahudi na Vanu se Vayahudi kuvecha pamwi. Kwa mvili vake akatunyuwe wula lukanji veukavahang'anise na kuvagita vachundwama. 15 Kilisito peafuwe pala pakipindilihicho Akaechile ludali lwa lagilicho, kwa kugita ndeni akavagitile avo Vayawudi na se Vayawudi viwunge na Yesu na ndeni akaletile lutengamaso kwa vanu vonda. 16 Kwa ng'asi lya kufuwa pakipindilihicho, akauhecha uchwindama vao Vayawudi na se Vayawudi na kuvavika lipinga limwi. Kangi akavavika vonda kuva va Nguluvi. 17 Suwe Kilisito akachile akadalike Njowo nofu lya lutengamaso kwa nyenye vanu se Vayahudi vemkali kutali na Nguluvi, kangi kwa Vayawundi vevakali pepi na Nguluvi. 18 Ndeni, kuchumbila mwene Kilisito, nefwe vonda Vayawudi na vanu se Vayawudi, twivecha kumuhegelela Daada kwa Muhe umwi yula yula.

19 Suwe, nyenye sevagenji vala vanu se Vayawudi. Nyenye nde vanu pamwi na vanu va Nguluvi na nde vanu va kaye lya Nguluvi. 20 Nyenye muvechile ngita kaye yeichengilwe pakyanya lya kitamiko na kitamiko ikyo nde vanjagila na vavichi, Kilisito Yesu mwene nde liganga likomi lya kitamiko ikyo. 21 Mwene nde vakuhimilicha kaye yonda na kuligita liveche kaye lya Nguluvi kwakuva lya Mtwa. 22 Kwa kwiwunga na mwene, nyenye kangi mwichengwa pamwi na vangi vonda neke mveche kaye lya Nguluvi yeakwikala mugati lyake kwa ng'asi lya Muhe vake.