1 Kwakuva lya ago, nene Paulo nde muwopwa kwakuva lya Kilisito Yesu, ndikuvasukila nyenye vanu se Vayawudi. 2 Kwa undakyene, mpulike suwe kwa usanzi vake Nguluvi akandigavile kasi iyi ndigite kwa kuvatanga nyenye. 3 Nguluvi akandigubutulila nene lupwepo lwake. Ndisimbile kwa ludodo lukani ulu, 4 na nyenye ngamwikwimba gala gyendikavasimbiliye, damwivesa kuchela kuva ndikuimanya unofu lupwepo ulo lwa Kilisito. 5 Dahile vanu sevakalongilwe lupwepo ulo, ila nondee Nguluvi avalongile vanjagila na vavichi va Nguluvi kwa kuchumbila Muhe vake. 6 Lupwepo lwene nde ulu, kuchumbila Njowo Nofu vanu se Vayawudi davipata pono lyao pamwi na vanu Vayawudi mulufunyo chila cha Nguluvi. Vene nde fiwungo fya muvili wulwwula na vivecha pamwi mu njagila yiyila yeagitile Nguluvi kwa ng'asi lya Yesu Kilisito.

7 Nene ndigitilwe kuvecha mnyigendwa va Njowo Nofu kwa usanzi vake Nguluvi weanigaviye Nguluvi na umwimike vake mkomi. 8 Nene ndo mdodo kuchumba vanu vonda va Nguluvi. Ila andigavile usanzi vake, neke ndivadalikile vanu se Vayawudi umosi ukomi va Kilisito, 9 na kuvagita vanu vonda vachele lupwepo lwa Nguluvi veufyamile. Nguluvi yeawumbile finu fyonda akafihile lupwepo lwake kuhuma daha, 10 Nguluvi ing'ang'a vanu vonda vevakumdikila Kilisito vawonese kila munu peagehe na uginyange wonda. Ing'ang'a filongochi na vatavala vevagehe muinyi lya kimuhe vachele ndeni. 11 Ndeni nde natilo lya Nguluvi kuhuma daha na Mtwa vetu Yesu Kilisito nde yeagitile ago. 12 Suwe, kwa kwiwugana na Kilisito kwa kumdikila mwene, nefwe twigecha kumuhelela Nguluvi kwa luhuvililo. 13 Ndeni ndikuvasuka mbihile kudenyeka numbula kwakuva lya magudo gyendikugapata kwakuva lya uginyange venu.

14 Kuhumila na natilo ilyo lya Daada ndifugama kuvasukila nyenye, 15 mwene ndeawumbila kila kinu kyekigehe kuluhano na muinyi. 16 Ndikumsuka Nguluvi avagite muveche vakakatima kwa kuvagavila ludali munumbula chenu kwa ng'asi lya Muhe vake kwa wolofu va ukomi vake, 17 neke Kilisito akale munumbula chenu kwa ng'asi lya kumdikila mwene kangi ndikumsuka avatange muveche vakakatima hilo mulukelo lwake, ndena lukelo lwake uvecha ngita midadikwa na kitamika kya wumi venu, 18 Nguluvi avagavile nyenye pamwi na vanu vake vonda umwimike va kuchela kuva Kilisito atukeliye. Mwene atukeliye kwa lukelo weuhela mwiso. 19 Ndisuka muvese kuchela lukelo ugo ingava seiwesekana kuchela hilo namuna peugehe mkomi Ena, muvese kuchela lukelo lwa Kilisito peugehe mkomi, baho nde kyanda kyenu dauwana na Daada.

20 Kwa mwene kwa ludali lwake lwelugita kasi mugati lyetu ivecha kugita makani makomi hilo kuchumba gala gye tuvesa kusuka au kugahocha, 21 Tung'ang'a vanu voda va Nguluvi vachele kuva Nguluvi ndi mkomi, kila munu yeakumdikila Kilisito na amnjume mwene mbepali na mbepeli! Ndakyene.