1 Ndeni, mwikale kwa kumwigilicha Nguluvi, kwakuva nyenye ndi vana vake yeavakeliye. 2 Mwikale kwa kukelana ngita fila Kilisito peatukeliye na akaihechile yumwene ngita litambiko lyeligehe na manung'unilo manofo na usembe va kumkelesa Nguluvi.

3 Kwakuva nyenye ndi vanu va Nguluvi, suwe usasi na uhafu vovonda ula awu uwimi ubihile kutambuchwa mugati lyenu. 4 Kangi mbihile kulonga machowo lya nyoni na gaupufi awu kidada, Ila mumhongeche Nguluvi chipindi chonda. 5 Kwa njowo lya makani aga aveche msasi yoyonda awu muhafu awu mwimi, munu uyo ndi ngita injuma ling'omong'omo. Na munu yoyonda yeagehe ngita uyo seipata kyokyonda muung'achale va Kilisito na va Nguluvi.

6 Mbihile kuchangwa na munu kwa njowo njanganifu, kwakuva kwa makani ngita ago luvipo lwa Nguluvi ikuvafikila vonda sevakumwidikila. 7 Suwe, mbihile kuvecha pamwi navo. 8 Pamwandi nyenye mkali mukisi, ila nondee nyenye mgehe muwelu kwa kwiwunga na Mtwa. Mwikale ngita vana va muwelu, 9 vanu vevagehe muwelu vigita njowo nofu na masanzi na ga undakyene chipindi chonda. 10 Mugeche kusaka gala gye gakumkelesa Mtwa. 11 Mbihile kugagita magito gyegigitwa na vanu vevagehe mukisi, ila muvalongele vanu kuva makani ago semanofu. 12 Kwakuva makani gyegigitwa kwa lupwepo na vanu vawofu ndi nyoni ata kugalonga. 13 Ila welu uwonesa wachi kuva makani ago se manofu, 14 na kila kyekiwoneswa wachi kivecha welu. Gasimbilwe mumasimbo ga Nguluvi,

"Lamwike veve yeuvasile,

uchulubuke kuhuma kwa vevafuwe,

nave Kilisito daakukung'alichila welu vake."

15 Suwe, mulolele pemukwikala. Mbihile kwikala ngita vapufi, ila ngita vene uginyange. 16 Mwitumile unofu muda vemugehe navo kwakuva figono ifi ndi chauwofu 17 Ndeni, mbihile kuvecha vapufi, ila ing'ang'wa msake gala Mtwa ikela mugagite.

18 Mbihile kugala ugimbi kwakuva iyo daikugita ugite makani gya nyoni, ila mumemechwe Muhe va Nguluvi. 19 Mulonge kwa machowo gya sabuli, lusambo na tensi cha Muhe va Nguluvi, mumusomoliye Mtwa kwa kumunjuma Mtwa munumbula chenu. 20 Figono fyonda, mumuhongeche Nguluvi Daada kwa makani gyonda, kwa umwimike va Mtwa Yesu Kilisito.

21 Kila yumwi amginye mweyage kwakuva lya uginyage vemugehe navo kwa Kilisito.

22 Vadala vavaginye vagosi vao ngita pemukumdikila Mtwa. 23 Kwakuva mgosi ndi kilongochi va mdala vake, ngita kilisito peagehe kilongochi pakyanya lya lipinga lya vanu vevamuidikiye Kilisito. Nave Kilisito yumwene akulikombola lipinga lya vanu vevamuidikiye Kilisito, mwene ndi muvili vake. 24 Ngita fila lipinga lya vanu vevamwidikie Kilisito, pelikumdikila Kilisito, ndeni ndeni vadala vavadikile vagosi vawo mumakani gyonda.

25 Na nyenye vagosi muvakele vadala venu ngita Kilisito peakalikeliye lipinga lya vanu vevamwidikie Kilisito, akayihechile yumwene usembe kwakuva lya mwene. 26 Akagitile ndene, neke kwa luchowo lwake aling'aliche lipinga lya vanu lyelikumwidikila Kilisito kuvecha vanu va Nguluvi, kwa kuwogoficha na malenga, 27 neke ipatile lipinga lya vanu vevamuidikie Kilisito vevagehe unofu hilo, lipinga lya vanu vevamwidikie Kilisito vevihela uvifyi awu nongwa awu kyokyonda kya namuna ilyo. 28 Suwe, vagosi ving'ang'wa kuvakela vadala vawo ngita mivili gyawo, munu yeakumkela mdala vake akwiikela yumwene. 29 Kwihela munu yeukuvipila mvili vake yumwene, ila akuwugavila kyakula na kuuvika unofu. Ngita Kilisito peakuvavika unofu vanu vevamuidikiye kilisito, 30 kwakuva nefwe ndi fiwungo fya mvili vake. 31 Ngita masimbo ga Nguluvi pegilonga, "Ndeni mgosi akumleka daada vake na maye vake, daakwiwunga na mdala vake, navo vavili davivecha mvili umwi." 32 Njowo ichi chigehe na lupwepo lukomi, ila nene ndilonga makani gya Kilisito na lipinga lya vanu vevamwidikie Kilisito. 33 Ila na nyenye ndikuvalongela vonda kuva, mgosi ing'ang'wa kumkela mdala vake ngita peikwikela yumwene na mdala ing'ang'wa amginye mgosi vake.