1 Baho, pegichumbile miyaka kyumi na gitai, ndikahele kangi ku Yelusalemu pamwi na Balinaba na Tito. 2 Ndikahele kwakuva Nguluvi aniwonisile kuva nding'ang'wa kuhelela, neke ndikavalongile kwa ufiyo vala filongochi, unanzi va Njowo nofu chendidalike kwa vanu se Vayawudi. Ndikagitile ndeni, neke kasi lyangu yendikagitile na yila yendigita nondee chibihile kuyaga hela. 3 Ila ata muyangu Tito, mwene Mugiliki, filongochi avo sevamuswitiliche kudumula bina, 4 ata kukali na vakolo va udesi yevang'ang'ile adumulwe bina. Vanu ava vakaingile kwa lupwepo na kulolesa upekesu vetu tweunago kwa kwiwunga na Yesu Kilisito, neke vawese kutugita vasutu, 5 setukuvadikile, neke undakyene va Njowo Nofu chisigale kwa nyenye.

6 Na vanu ava yevachelwa kuva filongochi, kwa nene sekinu, kwakuva Nguluvi seilolela makani ga kwivala, vanu ava sevakali na mahocho ga kunihongechela. 7 Ila filongochi ava vakawene kuva Nguluvi akanigavile kasi lya kudalika Njowo Nofu kwa vanu se Vayawudi, ngita fila peamulagiche Peteli kudalika Njowo Nofu kwa Vayawudi. 8 Kwakuva, yula yeamgavile Peteli umwimike va kuvecha mnjagila kwa Vayawudi, nde yula yula yeandigavile umwimike va kuvecha mnjagila kwa vanu se Vayawudi. 9 Suwe, Yakobo na Kefa na Yohani, vakawonike kuva filongochi vakomi vakachele kuva Nguluvi andigavile usangi, vakatukolele mawoko nene na Balinaba ngita kimanyilo kya kuwonesa tugehe pamwi. Vakadikile kuva nefwe tuhelele kwa vanu se Vayawudi na vene vahelele kwa Vayawudi. 10 Vakatusukile kuva tuendelele kuvawiwuka vahangala, nde lukani lyendikali ndigangamala kuligita.

11 Ila Peteli peachile ku mwani va Anitiokia ndikampinjile pautalo lya vanu, kwakuva akali agitile nongwa. 12 Dahila, vanu vevahumile kwa Yakobo pevave kufika, Peteli akali iliya pamwi na vanu se Vayawudi. Ila avo vanu pevafikile akavangile kuyihecha na kuyinenga na vanu se Vayawudi, kwakuva akali akuvaogwipa vanu vevadumule bina. 13 Kangi Vayawudi vangi vakamdikile Peteli muufyangu ugo na Balinaba mwene akachangilwe na ufyangu ugo. 14 Pendiwene kuva sevagita ngita peing'ang'a Njowo Nofu, ndikamlongile Peteli pautalo lya vanu vonda, "Veve ndi Muyawudi, ila veve wikala ngita munu se Muyawudi. Wiwesa wuli kuvaswitilicha vanu se Vayawudi vakale ngita Vayawudi?"

15 Ndakyene, nefwe ndi Vayawudi kwa kubabwa na se ngita vanu va inyi yingi vene se Vayawudi vene sambi. 16 Ila nefwe tuchela kuva munu seigitwa kuva msanzi pautalo lya Nguluvi kwa kukolela malagilicho ga Nguluvi geamgavile Musa, ila ugitwa msanzi kwa kumdikila Yesu Kilisito. Na nefwe tukumdikila Yesu Kilisito neke tugitwe vasanzi pautalo lya Nguluvi kwa kuchumbila kumdikila Kilisito Yesu, vala se kukolela malagilicho, kwakuva kwa kukolela malagilicho kwehela munu daigitwa msanzi pautalo lya Nguluvi. 17 Ila petusaka kugitwa vasanzi pautalo lya Nguluvi kwa kwiwunga na Kilisito, nefwe tuwoneka kuva vene sambi, wuli lukani ulu liwoneka kuva Kilisito ndi mnyigendwa va sambi? Hamu! 18 Ila ngita ndichenga kangi kila kyenditunyule suwe, ndiwonesa kuva nene nde muhanganifu. 19 Kwakuva lya malagilicho ago, nene ndifuwe, neke ndiwese kwikala kwakuva lya Nguluvi. Nene ndivambilwe pakipindilihicho pamwi na Kilisito, 20 nondee se nene kangi yendikwikala ila Kilisito yeakwikala mugati lyangu. Nondee ndikala kwa kumdikila Mwana va Nguluvi, yeandikeliye na kuhecha uwumi vake kwakuva lya nene. 21 Sendiwesa kulema usanzi va Nguluvi. Ngita munu igitwa msanzi kwa kukolela malagilicho ga Nguluvi geamgavile Musa, suwe, Kilisito afuwe hela!