1 Nyenye vanu va Vagalatia vapufi! Ndia ani yeavahaviye? Njowo cha kuvambilwa pakipindilihicho kwa Yesu Kilisito chihumulilwe wachi pautalo lyenu. 2 Ndisaka kuchela kinu kimwi kuhuma kwa nyenye. Wuli, mukamuwanuke Muhe va Nguluvi kwa kukolela malagilicho awu kwa kuchidikila Njowo Nofu chemupulike? 3 Wuli, nyenye ndi vapufi ndeni? Nyenye mukavangile kwa utango va Muhe va Nguluvi, wuli musaka kumalila kwa ludali lwenu mwavene? 4 Wuli, makani gyonda gala gemugawanuke gikali gahela ng'ani? Hamu segakali gya hela! 5 Wuli, Nguluvi akuvagavila Muhe vake na kugita umanyitu pagati lyenu kwakuva mukolela malagilicho awu kwakuva mupulika Njowo Nofu na kwidikila?

6 Masimbo ga Nguluvi gisimbilwe ndeni, "Ibulahimu amudikiye Nguluvi na Nguluvi akamdikila ngita munu yeagita masanzi." 7 Nondee, muchele kuva vale vanu vevamudikila Kilisito, avo nde vana va Ibulahimu. 8 Masimbo ga Nguluvi gasimbilwe kuva na mwene Nguluvi davagita vanu se Vayawudi kwa ng'asi lya ludikilo, akalonguwe kumlongela Ibulahimu Njowo chinofu, "Kuchumbila veve vanu va inyi chonda davafunywa." 9 Suwe, vala vonda yemdikile Nguluvi vifunywa pamwi na Ibulahimu yeadikile.

10 Ila vonda yevahuvilila hela kugita geging'ang'wa na malagilicho ga Nguluvi geamgavile Musa, vakotoliwe. Masimbo ga Nguluvi gasimbilwe, "Yeyonda yeseikolela na kugita gyonda gala gegisimbilwe mu kiganulo kya malagilicho, akotoliwe!" 11 Ndakyene kwihela munu yeyonda yeigitwa msanzi pautalo lya Nguluvi kwa kukolela malagilicho ga Nguluvi, kwakuva Masimbo ga Nguluvi gasimbilwe, "Munu yeakwikala kwa kudikila dakwikala." 12 Ila malagilicho ga Nguluvi geamgavile Musa segihuvilila ludikilo, ila masimbo ga Nguluvi gasimbilwe, "Munu yeikolela malagilicho daipata uwumi kwa kudikila malagilicho ago."

13 Kilisito atukombuwe kuhuma muukotolo lya malagilicho ga Nguluvi yeamgaviye Musa kwa kutegula ukotolo uwo, kwakuva lyetu. Masimbo ga Nguluvi gasimbilwe, "Yeyonda yeavambilwe pakipindilihicho, akotoliwe." 14 Akatukombuwe neke lufunyo lweagavilwe Ibulahimu luvafikiye vanu se Vayawudi kwa kuchumbila Kilisito Yesu, neke kwa ludikilo tuwese kuwanuka yila jangila lya Muhe va Nguluvi.

15 Vakolo vangu, ndisaka ndivalongele mufanu va uwumi va kila kigono. Ngita fila kwihela munu yeiwesa kugalambula awu kongelecha kinu mulilagano lya vanu lyevapatine kwa kusimba. 16 Suwe, Ibulahimu akagavilwe jangila, mwene pamwi na ulelo vake. Masimbo ga Nguluvi segilonga, "Na valelo vake," Kuwonesa vanu volofu, ila kwa ulelo vako kuwonesa munu yumwi, ndi Kilisito. 17 Kyendisaka kulonga ndi kuva, Nguluvi agitile liagano na Ibulahimu, likagitilwe kwa chipindi chitali pegave kwacha malagilicho gyake gyeamgavie Musa, chikaachile miyaka mia na chitai na selasini pambele, suwe malagilicho ago sedagiwesa kugalambula jangila lya Nguluvi. 18 Kwakuva ngita fupo lya Nguluvi ihuvilila malagilicho ga Nguluvi geamgavile Musa, suwe seihuvilila kangi jangila, ila Nguluvi kwa usanzi vake akamgavile Ibulahimu fupo kwakuva akajangile.

19 Nondee, kwa liki kuveche na malagilicho ga Nguluvi cheamgavile Musa? Chikavikilwe neke kuwonesa uhanangifu ndi kinu liki, mbaka peakwacha yula yeatambuchwe mujangila. Malagilicho ga Nguluvi chikaletilwe na ndumindumi vake na Musa ichengakaya vanu na Nguluvi. 20 Ndakyene, mchengakaya seing'wang'wa kunjengakaya na munu yuwmi hela ngita munu yungi asupali, ila Nguluvi ndi yumwi.

21 Wuli, malagilicho chipinjana na jangila cha Nguluvi? Hamu! Suwe, ngita malagilicho ga Nguluvi ngaihecheliwe ngaiwesa kuvagavila vanu uwumi, suwe kila munu ngaivesa kugitwa msanzi pautalo lya Nguluvi kwa ng'asi lya malagilicho. 22 Ila masimbo ga Nguluvi gasimbilwe suwe vanu vonda vagehe panyi lya ludali lwa sambi, neke gala gejangilwe kwa ng'asi lya kumdikila Yesu Kilisito gawese kugavilwa vala vevadikila.

23 Peyave kwacha ludikilo, tukali tuvikilwe panyi lya malagilicho, tudindilwe mbaka yila ludikilo igubutuliwe. 24 Ndeni, malagilicho ga Musa gakali gakutulongocha ngita mlelo vetu, mbaka Kilisito peachile, neke tuwese kugitwa vasanzi pautalo lya Nguluvi kwa ludikilo. 25 Ila nondee kumdikila Kilisito kwachile suwe, setulongochwa kangi na malagilicho ga Musa.

26 Kwa kumdikila Kilisito, nyenye vonda muvechile vana va Nguluvi kwa kwiwunga na Kilisito Yesu. 27 Kwakuva nyenye vonda yemubatisilwe mwiwungine na Kilisito, muvecha ngita mumfwalile Kilisito. 28 Suwe, kwahela kangi tofwauti pagati lya Muyawudi na Mugiliki, msutu awu munu yealekeliwe pekesu, mgosi vala mdala, kwakuva vonda muvechile kinu kimwi kwa kwiwunga na Kilisito Yesu. 29 Kwakuva nyenye ndi vanu va Kilisito, suwe, nyenye ndi valelo va Ibulahimu na vahala, damuwanuka fila fyajangile Nguluvi.