1 Vakolo vangu, ngita muyenu akigita sambi, suwe, nyenye yemulongochwa na Muhe va Nguluvi mumlakilila munu uyo kwa ufokomasi neke aleke sambi, ila muyilolele neke na nyenye mubihile kugita sambi. 2 Ngita yumwi venu ngaipata utatala mwitange, kwa kugita ndeni mukigita ngita peing'ang'a malagilicho ga Kilisito. 3 Ngita munu akwiwona kuva mwene ndi ngiba kuchumba mweyage na kuno sendeni, akwichanga mwene. 4 Ila kila munu yumwi ayilolele unofu kyanda lyake, ngita nofu suwe iwesa kwinjuma ngajila kwiwananisa na munu yungi. 5 Kwakuva, kila munu daihombwa kwa gala gyeagitile.

6 Suwe, yeiwulanichwa luchowo lwa Nguluvi ing'ang'wa kumlongela manofu muwalanichi vake.

7 Mubihile kwichanga, kwihela munu yeiwesa kufiya kyokyonda pautalo lya Nguluvi. Kwakuva kila cheivyala munu nde daibena. 8 Ngita ugita ludobeko lwako cha inyi daubena kufuwa. Ila ngita dawifata gala gye ikela Muhe va Nguluvu dawipata uwumi va mbepali. 9 Suwe, petugita manofu ngajila kufwaila na petubihila kutwenyeka numbulau, datwibena mabenolo kwa chipindi kyake. 10 Kila petupatila fwasi tuvagitile vanu vonda makani ganofu, hilo kwa vala vevamudikile Kilisito ngita nefwe.

11 Mulolele pendikuvasimbiliya masimbo makomi kwa liwoko lyangu yune! 12 Vala veving'ang'a vawonike vanofu kwa makani ga inyi, avo vakuvang'ang'a nyenye mudumulwe bina. Vigita ndeni, neke vene vabihile kugudika kwakuva lya kipindilihicho kya Kilisito. 13 Ata vala vevadumulwe bina sevadikila malagilicho ga Nguluvi geamgavile Musa, ila vakuvang'ang'a nyenye mudumulwe bina neke vapate kwinjuma kwa makani gya mivili gyenu. 14 Ila nene sendikwidumbila kinu kyokyonda ng'odo, ila ndikudumbila kufuwa kya Mtwa vetu Yesu Kilisito pakipindilihicho, kwakuva lya kufuwa kwamwene makani gyonda gya inyi iyi se kinu kwa nene na uwumi vangu va daila gafuwe pamwi na mwene pakipindilihicho. 15 Kwakuva kudumula bina awu ngajila kudumula bina sekinu, ila kinu kuvecha kiwumbe kimiya. 16 Lutengamaso na lusungu yeihuma kwa Nguluvi iveche na vanu vonda vevakufwata undakyene ugo avo nde vanu va Nguluvi.

17 Suwe, nondee munu yeyonda abihile kunigudisa kangi, kwakuva nene ndigehe na migumba mumvili vangu kwakuva lya kumgumbanikila Yesu.

18 Vakolo vangu, usanzi va Mtwa vetu Yesu Kilisito uveche pamwi na nyenye vonda. Ndakyene.