1 ଇରଃକମ୍‌ ସାକିମଃନ୍‌ ଅଃତେକ୍‌ ଲକ୍‌ ଅଃମାର୍‌ ଚାରି ହାକ୍‌ ଆଚ୍‌ତି ସେତାକ୍‌ ଆସା ଜୁୟି ସଃବୁ ବିସୟ୍‌ ଅଃମିକ୍‌ ବାଦା ଦେଉଁଲି ଆର୍‌ ଜୁୟି ସଃବୁ ବିସୟ୍‌ ଅଃମିମଃନ୍‌କେ ହାହେ ଜିକି ନେଉଁଲି ସେ ସଃବୁ ଚାଡି ବିସ୍ୱାସେ ଅଃଟୁଆ ରଃୟ୍‌ ଅଃମାର୍‌ ହାୟ୍‌ଁ ତିଆର୍‌ ଅୟ୍‌ରିଲା ବାଟେ ଜାତି ରେଉଁଆ । 2 ଜିସୁ ଅଃହ୍‌ଣାର୍‌ ମୁଏଁ ରିଲା ସଃତ୍‌ ସଃର୍ଦା ଗିନେ ଲିନ୍ଦାକ୍‌ ନଃମାନି କଃରି ସଃମ୍ବାଳି କଃରି କ୍ରୁସ୍‌ଉହ୍ରେ ମଃର୍ନ୍‌ ବୟଃଗ୍ କଃଲା, ଆରେକ୍‌ ଇସ୍ୱରାର୍‌ ସିଙ୍ଗାସଣାର୍‌ କାତା ବାଟ୍ୟା ବଃସି ଆଚେ ।

3 ତୁମିମଃନ୍ ଜଃନ୍‌କଃରି ଅଃହ୍‌ଣା ଅଃହ୍‌ଣାର୍‌ ମଃନେ ନଃତାକାସ୍‌; ଇତାର୍‌ ଗିନେ ହାହିମଃନାର୍‌ ତଃୟ୍‌ହୁଣି ଅଃହ୍‌ଣାର୍‌ ବିରୁଦେ କଃଡେକ୍‌ ବିରଦ୍‌ ହାଣ୍ ସଃମ୍ବାଳ୍‌ଲା, ତାର୍‌ ବିସୟେ ବାବି ଦଃକା । 4 ତୁମିମଃନ୍ ହାହ୍‌ ବିରୁଦେ ଜୁଜ୍‌ କଃରି ଅଃବେ ହଃତେକ୍‌ ତୁମାର୍‌ ବଃନି ଜାତା ହଃତେକ୍‌ ବାଦା ନଃଦିଆସ୍‌ । 5 ଆର୍‌ ହିଲାମଃନାର୍‌ ହର୍‍ ତୁମିମଃନାର୍‌ ଗିନେ ଲେକା ଅୟ୍‌ଲା ଇ ସଃର୍ଦାର୍‌ କଃତା ହାସ୍ରି ଆଚାସ୍‌,

"ଏ ମର୍‌ ହଅ, ମାପୁରାର୍‌ ସାସନ୍‌କେ ଉସାସେ ନେ ନାୟ୍‌,

କି ତାର୍‌ ତଃୟ୍‌ହୁଣି ଉଣା ସୁଣ୍‌ଲେକ୍‌ ତାକା ନାୟ୍‌ ।

6 କାୟିତାକ୍‌ବଃଲେକ୍‌ ମାପୁର୍ ଜାକେ ଲାଡ୍‌ କଃରେଦ୍‌, ତାକେ ସାସନ୍ କଃରେଦ୍‌,

ଆରେକ୍‌ ଜୁୟି ହିଲାକ୍‌ ନିଜାର୍ ବଃଲେଦ୍‌, ତାକେ ଡଃଣ୍ଡ୍‌ ଦଃୟ୍‌ଦ୍‌ ।"

7 ସାସନାର୍‌ ଗିନେ ତ ତୁମିମଃନ୍ ଦୁକ୍‌ ସଃମ୍ବାଳୁଲାସ୍‌; ଇସ୍ୱର୍‌ ତୁମିମଃନାର୍‌ ସଃଙ୍ଗ୍ ହଅ ହର୍‍ ବେବାର୍‌ କଃରୁଲା, କାୟିତାକ୍‌ବଃଲେକ୍‌ ଉବା ଜାକେ ସାସନ୍ ନଃକେରେ, ଇବାନ୍ୟା ହଅ କେଏ ଆଚେ ? 8 ମଃତର୍‌ ଜୁୟି ସାସନାର୍‌ ସଃବୁ ବାଗ୍‌ହାୟ୍‌ଲାର୍‌, ଜଦି ତୁମିମଃନ୍ ସେତିର୍‌ ବାଗି ନାୟ୍‌, ତଃବେ ତୁମିମଃନ୍ ହଅ ନାୟ୍‌, ବିନ୍‌ ଅଃଣ୍ଡ୍ରା ତଃୟ୍‌ହୁଣି ଜଃଲମ୍‌ ଅୟ୍‌ଲା ହିଲା । 9 ଆରେକ୍‌ ହେଁ, ଅଃମିମଃନାର୍‌ ସାସନ୍‌କାରି ଅଃମିମଃନାର୍‌ ଗଃଗାଳାର୍‌ ଉବାମଃନ୍‌କେ ଅଃମିମଃନ୍‌ ମାନ୍‌ତି କଃରୁଲୁ; ତଃବେ ଆତ୍ମିକ୍‌ ଉବାର୍‌ କଃତେକ୍‌ ଅଃଦିକ୍‌ କଃରି ତାର୍‌ ତଃଳେ ରଃୟ୍‌ ଜିବନ୍ ନଃହାଉଁ ? 10 ଅଃମିମଃନାର୍‌ ଜଃଗତାର୍‌ ଉବାମଃନାର୍‌ ଆକାୟ୍‌ ଜାୟ୍‌ରି ନିକ ସେ ହଃର୍କାରେ ସେମଃନ୍ ଅଃଳକ୍‌ ଦିନାର୍‌ ଗିନେ ଅଃମିମଃନ୍‌କେ ସାସନ୍ କଃଲାୟି; ମଃତର୍‌ ଅଃମିମଃନ୍‌ ଜଃନ୍‌କଃରି ତାର୍‌ ପବିତ୍ର ତଃୟ୍‌ ବାଗିଦାରି ଅଃଉଁନ୍ଦ୍‌, ଇତାର୍‌ ଗିନେ ସେ ଅଃମିମଃନାର୍‌ ବଃଲାର୍‌ ଗିନେ ସାସନ୍ କଃରେଦ୍‌ । 11 ସାସନ୍ ଅଃବେ ସଃର୍ଦାର୍‌ ବଃଲି ଜାଣା ନଃହେଳି ଦୁକାର୍‌ ବଃଲି ଜାଣା ଅୟ୍‌ଦ୍‌; ଅୟିଲେକ୍ ଜୁୟି ଲକ୍‌ମଃନ୍‌ ସେତାର୍‌ ତଃୟ୍‌ ସିକ୍ୟା ହାୟ୍‌ଁ ଆଚ୍‌ତି, ସେରି ହଃଚେ ସେମଃନ୍‌କେ ସୁସ୍ତାର୍‌ ହଃଳ୍‌ ହର୍‍ ଦଃର୍ମି ଦଃନ୍ ଦଃୟ୍‌ଦ୍‌ ।

12 ବଃଲେକ୍‌, ତୁମିମଃନାର୍‌ ତାକ୍‌ଲା ଆତ୍‌ ଆର୍‌ ନିଗାଳ୍‌ ମାଣ୍ଡିକ୍‌ ସଃକାତ୍‌ କଃରା । 13 ଆରେକ୍‌ ସଃଳ୍‌କ୍‌ ବାଟେ ଇଣ୍ଡାବୁଲା କଃରା, ଜଃନ୍‌କଃରି ଚଟା ଗଡ୍ ଅଃଦିକ୍‌ ମଃଳୁ ନଃହେଳି ଉଜ୍‌ ଅୟ୍‌ଦ୍‌ ।

14 ସଃବୁ ଲକାର୍‌ ସଃଙ୍ଗ୍ ସୁସ୍ତାୟ୍‌ ରେଉଁକ୍‌ ଚେସ୍ଟା କଃରା, ଆର୍‌ ପବିତ୍ର ରଃୟ୍‌ ଜିବନ୍ କାଟୁକେ ଚେସ୍ଟା କଃରା ବଃଲେକ୍‌ ସେରି ନୟ୍‌ଲେକ୍‌ ଇସ୍ୱର୍‌ କେଏ ଦଃକୁ ନାହାରାସ୍‌ । 15 କଃନ୍‌ସ୍‌ ଅୟିଲେକ୍ କେକେ ଇସ୍ୱରାର୍‌ ଦଃୟାୟ୍‌ ହୁଣି ଦୁରିକ୍‌ ଅଃଉତି କି କୁୟି ହିତାର୍‌ ମୁଳ୍‌ ଆକରି କଃରି ବାଡି ତୁମିମଃନ୍‌କେ ନାସ୍‌ କଃରେଦ୍‌, ଆର୍‌ ସେତାର୍‌ ଗିନେ ଗାଦେକ୍‌ ଲକ୍‌ ବିଟାଳ୍‌ ଅଃଉତି । 16 କି କେଏ ଅଃଦଃର୍ମି, କି ତରେକାର୍‌ କାଦିର୍‌ ଗିନେ ଅଃହ୍‌ଣାର୍‌ ବଃଡ୍‌ ହିଲା ଅଃଉତା ଅଃଦିକାର୍‌ ବିକୁ ଜେ ଏସାଉ, ତାର୍‌ ହର୍‍ ଅଃଦଃର୍ମି ଅୟ୍‌ଦ୍‌, ଇ ବିସୟେ ଅଃଦିକ୍‌ ଜଃଗ୍ରାତ୍‌ ଅଃଉଆ । 17 ତୁମିମଃନ୍ ତ ଜାଣି ଆଚାସ୍‌, ହଃଚେ ସେ ଆସିର୍ବାଦାର୍‌ ଅଃଦିକାରି ଅଃଉଁକେ ମଃନ୍‌ କଃଲାକ୍‌ ହେଁ ମାନ୍‌ତି ନଃହାୟ୍‌ଲା, ଆରେକ୍‌ ନିଜାର୍ ଦଃସ୍‌ ମାନ୍‌ତା ଗିନେ କାନ୍ଦିକଃରି ଜଃତୁନେ ଚେସ୍ଟା କଃଲାକ୍‌ ହେଁ ସେରି ଆରେକ୍‌ କଃରୁକେ ବାଟ୍‌ ନଃହାୟ୍‌ଲା ।

18 କାୟିତାକ୍‌ବଃଲେକ୍‌ ତୁମିମଃନ୍ ଚୁୟ୍‌ଲା ସିନୟ୍‌ ହର୍ବାତ୍‌ ଆର୍‌ ଲାଗ୍‌ତା ଜୟ୍‌ ଲଃଗେ ଆରେକ୍‌ ବୁଆଳ୍‌ ମେଗ୍, ଅଃନ୍ଦାର୍‌, ବଃତାସ୍‌, 19 ତୁରିର୍‌ ସଃବ୍‌ଦ୍‌ ଆର୍‌ ବାକ୍ୟର୍‌ ସଃବ୍‌ଦ୍‌ ଲଃଗେ ନାୟ୍‌ଲାସ୍‌; ସୁଣ୍‌ତା ଇସ୍ରାଏଲ୍‌ ଲକ୍‌ ସେ ସଃବ୍‌ଦ୍‌ ସୁଣି ଜଃନ୍‌କଃରି ସେମଃନ୍‌କେ ଆରେକ୍‌ କୁୟି କଃତା କଃଉଆ ନଃଜାୟ୍‌ଁ, ଇରି ଗଃଉଆରି କଃରି ରିଲେ । 20 "ଜୁୟ୍‌ତାର୍‌ ଗିନେ କୁୟି ଜଃତୁ ହେଁ ଜଦି ସେ ହର୍ବାତ୍‌ ଚୁୟ୍‌ଦ୍‌, ତଃବେ ସେ ଟେଳାର୍‌ ମାଡେ ମାରା ଅୟ୍‌ଦ୍‌," ଇ ଜୁୟି ଆଦେସ୍‌ ଦିଆ ଜାୟ୍‌ରିଲି, ସେରି ସେମଃନ୍ ସଃମ୍ବାଳୁ ନଃହାୟ୍‌ଲାୟ୍‌ । 21 ଆର୍‌ ସେ ଦଃକ୍‌ତାର୍‌ ଇରଃକମ୍‌ ବୟ୍‌ଙ୍କାର୍‌ ରିଲି ଜେ, ମସା ହେଁ କୟ୍‌ଲା, "ମୁୟ୍‌ଁ ବେସି ଡିର୍‌ଲେ ଆର୍‌ ତଃର୍‌ତଃରୁଲେ ।"

22 ମଃତର୍‌ ତୁମିମଃନ୍ ସିଅନ୍ ହର୍ବାତ୍‌ ଆର୍‌ ଜିବନ୍ ଇସ୍ୱରାର୍‌ ଗଃଳ୍‌, ବଃଲେକ୍‌ ସଃର୍ଗାର୍‌ ଜିରୁସାଲମ୍‌, ଅଲେକାର୍ ଦୁତ୍‌ ବାହିନିର୍‌ ହଃର୍ବ୍‌, 23 ସଃର୍ଗେ ଲେକା ଅୟ୍‌ଲା ହଃର୍ତୁ ଜଃଲମ୍‌ ଅୟ୍‌ଲା ଲକ୍‌ମଃନାର୍‌ ମଣ୍ଡ୍‌ଳି, ସଃବୁଲକାର୍‌ ବିଚାର୍‌ କଃର୍ତା ଇସ୍ୱର୍‌, ହୁର୍ନ୍‌ ଅୟ୍‌ଲା ଦଃର୍ମି ଲକ୍‌ମଃନାର୍‌ ଆତ୍ମାମଃନାର୍‌ ତୟ୍‌ ଆସି ଆଚାସ୍‌ । 24 ନଃଉଆଁ ନିଅମାର୍‌ ମୁଳିକା ଜିସୁ, ଆରେକ୍‌ ଜୁୟି ଚିଚ୍‌ତା ବଃନି ହେବଲାର୍‌ ତଃୟ୍‌ହୁଣି ଅଃଦିକ୍‌ ନିକ କଃତା କୟ୍‌ଦ୍‌, ସେତାର୍‌ ଲଃଗେ ଆସିଆଚାସ୍‌ ।

25 ଜଃଗ୍ରାତ୍‌, ଜେ କଃତା କଃଉଁଲା, ତାକେ ମାନା; କାୟିତାକ୍‌ବଃଲେକ୍‌ ଜେ ହୁର୍ତିଏ ଆଦେସ୍‌ ଦିଲାକ୍‌, ତାକେ ନଃମାନ୍‌ଲାକ୍‌ ସେମଃନ୍ ଜଦି ବଚୁ ନାହାର୍ଲାୟ୍‌, ତଃବେ ଜେ ସଃର୍ଗେ ହୁଣି ଆଦେସ୍‌ ଦେଉଁଲା, ତାର୍‌ ତଃୟ୍‌ହୁଣି ଦୁରିକ୍‌ ଅୟିଲେକ୍ ଅଃମିମଃନ୍‌ ଜେ ବଚୁକେ ନଃହାରୁଆଁ, ଇରି ବାୟ୍‌ଦ୍‌ରେ ସଃତ୍‌ କଃତା । 26 ସଃଡେବଃଳ୍‌ ତାର୍‌ ଟଣ୍ଡ୍ ହୁର୍ତିବିକ୍‌ ଲଃଦ୍‌ବଃଦାୟ୍‌ଲି, ମଃତର୍‌ ଅଃବେ ସେ ସଃୟ୍‌ତ୍‌ କଃରି କୟ୍‌ଆଚେ, ଆରେକ୍‌ ଗଟ୍‌ତର୍‌ ମୁୟ୍‌ଁ ଜେ ଅଃବ୍‌କା ହୁର୍ତିବିକ୍‌ ଲଃଦ୍‌ବଃଦାୟ୍‌ନ୍ଦ୍, ସେରି ନାୟ୍‌, ମଃତର୍‌ ଅଃଗାସ୍‌କେ ହେଁ ତଃର୍‌ତଃରାୟ୍‌ନ୍ଦ୍ । 27 ଆରେକ୍‌ ଗଟ୍‌ତର୍‌ ବଃଲି କୟ୍‌ଲା ଗିନେ ଇରି ବୁଜା ହଃଳୁଲି ଜେ ଟଃଳ୍‌ମଃଳ୍‌ ନଃଉତା ବିସୟ୍‌ମଃନାର୍‌ ଗିନେ ଟଃଳ୍‌ମଃଳ୍‌ ଅଃଉତା ବିସୟ୍‌, ବଃଲେକ୍‌ ଉବୁଜ୍‌ଲା ସଃବୁ ବିସୟ୍‌ ବାଦ୍‌ଲେଦ୍‌ ।

28 ତଃବେ ଆସା ଅଃମି ମାପୁର୍‌କେ ଦନ୍ୟବାଦ୍‌ ଦେଉଁଆ ବଃଲେକ୍‌ ଅଃମି ଲଃଦ୍‌ବଃଦ୍‌ ନଃଉତାର୍‌ ରାଇଜ୍‌ ହାୟ୍‌ଆଚୁ, ସେତାର୍‌ଗିନେ ଅଃମି ଦନ୍ୟବାଦ୍‌ ଦେଉଁଆ ଆର୍‌ ବକ୍ତି ଆର୍‌ ଡିର୍‌ ସଃଙ୍ଗ୍ ଇସ୍ୱରାର୍‌ ସଃର୍ଦାର୍‌ ଲକ୍‌ ଅୟି ତାର୍‌ ହୁଜା କଃରୁଆଁ । 29 କାୟିତାକ୍‌ବଃଲେକ୍‌ ଅଃମିମଃନାର୍‌ ଇସ୍ୱର୍‌ ନାସ୍‌କାରି ଜୟ୍‌ ହର୍‍ ।