1 ଇତାର୍‌ ହଃଚେ ଜିସୁ ତିବିରିଆ ସଃମଃନ୍ଦ୍ କଃଣ୍ଡାୟ୍‌ ଚେଲାମଃନ୍‌କେ ଆରେକ୍‌ ଦଃକାୟ୍‌ ଅୟ୍‌ଲା । ସେ ଇରଃକମ୍‌ ଦଃକାୟ୍‌ ଅୟ୍‌ଲା; 2 ସିମନ୍ ପିତର୍‌, ତମା, ଜାକେ ଦିଦୁମ୍‌ ବଃଲି କଃଉତି, ଗାଲିଲିର୍‌ କାନା ଗାଉଁଆର୍‌ ନିତନିଏଲ୍‌, ଜେବଦିର୍‌ ହୟିସିମଃନ୍ ଆର୍‌ ତାର୍‌ ଚେଲାମଃନାର୍‌ ବିତ୍ରେ ଦୁୟ୍‌ଲକ୍‌ ଗଟେତଃୟ୍‌ଁ ରୁଣ୍ଡି ରିଲାୟ୍‌ । 3 ✝ସିମନ୍ ପିତର୍‌ ସେମଃନ୍‌କେ କୟ୍‌ଲା, "ମୁୟ୍‌ ମାଚ୍ ଦଃରୁକ୍‌ ଜଃଉଁଲେ ।"

ସେମଃନ୍ ତାକ୍‌ କୟ୍‌ଲାୟ୍‌, "ଅଃମିମଃନ୍‌ ହେଁ ତର୍‌ ସଃଙ୍ଗ୍ ଜଃଉଁନ୍ଦ୍ ।" ସେମଃନ୍ ବାରାୟ୍‌ ଜାୟ୍‌ ଡଙ୍ଗାୟ୍‌ ଚଃଗ୍‌ଲାୟ୍‌, ଆର୍‌ ସେ ରାତି କାୟିରି ହେଁ ଦଃରୁ ନଃହାୟ୍‌ଲାୟ୍‌ । 4 ମଃତର୍‌ ସଃକାଳ୍‌ ଅୟ୍‌ଲା ହଃଚେ ଜିସୁ କଃଣ୍ଡାୟ୍‌ ଟିଆ ଅୟ୍‌ଲା, ଅୟିଲେକ୍ ହେଁ ସେ ଜିସୁ ବଃଲି ଚେଲାମଃନ୍ ଜାଣୁ ନଃହାୟ୍‌ଲାୟ୍‌ । 5 ଜିସୁ ସେମଃନ୍‌କେ କୟ୍‌ଲା, "ହିଲାମଃନ୍ ତୁମାର୍‌ ଲଃଗେ କାୟିରି ମାଚ୍ କାଉଁକେ ଆଚେ ?"

ସେମଃନ୍ ତାକ୍‌ କୟ୍‌ଲାୟ୍‌, "ନାୟ୍‌, କାୟିରି ହେଁ ନାୟ୍‌ ।"

6 ✝ଜିସୁ ସେମଃନ୍‌କେ କୟ୍‌ଲା, "ଡଙ୍ଗାର୍‌ କାତା ବାଟ୍ୟା ଜାଲ୍‌ ହଃକାଉଆ, ଆର୍‌ ତୁମିମଃନ୍ ହାଉଆସ୍‌ ।" ସେତାକ୍‌ ସେମଃନ୍ ଜାଲ୍‌ ହଃକାୟ୍‌ଲାୟ୍‌, ଆର୍‌ ଜାଲେ ଅଃତେକ୍‌ ମାଚ୍ ଲାଗ୍‌ଲାୟ୍‌ ଜେ, ସେମଃନ୍ ଜାଲ୍‌ ଜିକୁକ୍‌ ସଃକ୍ତି ନଃକେଟ୍‌ଲି ।

7 ସେତାକ୍‌ ଜିସୁ ଜୁୟି ଚେଲାକେ ଲାଡ୍‌ କଃର୍ତିରିଲା, ସେ ଜହନ୍‌ ପିତର୍‌କେ କୟ୍‌ଲା, "ଏ ତ ମାପୁର୍ ।" ସିମନ୍ ପିତର୍‌ ଏ ତ ମାପୁର୍ ବଃଲି ସୁଣି ଡୁମ୍‌ଣ୍ଡା ଅୟ୍‌ରିଲାକ୍‌ ଅଃହ୍‌ଣାର୍‌ ଆଙ୍ଗି ହିନ୍ଦି ସଃମ୍‌ନ୍ଦେ ଡଃଗାୟ୍‌ଲା; 8 ମଃତର୍‌ ବିନ୍‌ ଚେଲାମଃନ୍ ମାଚ୍ ବଃର୍ତି ଅୟ୍‌ରିଲା ଜାଲ୍‌ ଜିକି ଜିକି ଡଙ୍ଗାକ୍‌ କଃଣ୍ଡିଏ ଆଣ୍‌ଲାୟି, କାୟିତାକ୍‌ବଃଲେକ୍‌ ସେମଃନ୍ କଃଣ୍ଡାୟ୍‌ ହୁଣି ଅଃଦିକ୍‌ ଦୁରିକ୍‌ ନଃରିଲାୟ୍‌, ଅଃକାୟ୍‌ ହଃକାହାକି ଦଃସ୍‌ କଳି ଆତ୍‌ ଦୁରିକ୍‌ ରିଲାୟ୍‌ । 9 ସେମଃନ୍ କଃଣ୍ଡିଏ ଉତ୍ରି ସେତି ଇଙ୍ଗ୍ରାଜୟ୍‌ ଉହ୍ରେ ମାଚ୍ ଆର୍‌ ରୁଟି ସଃଙ୍ଗାୟ୍‌ ରିଲାର୍‌ ଦଃକଃଲାୟ୍‌ । 10 ଜିସୁ ସେମଃନ୍‌କେ କୟ୍‌ଲା, "ତୁମିମଃନ୍ ଅଃବେ ଜୁୟି ମାଚ୍ ଦଃରି ଆଚାସ୍‌, ସେତିର୍‌ କଃତିଗଟ୍ ଆଣା ।"

11 ସିମନ୍ ପିତର୍‌ ଜାୟ୍‌ ସାତ୍‌କଳି ତେର ଗଟ୍ ବଃଡ୍‌ ବଃଡ୍‌ ମାଚ୍ ବଃର୍ତି ଅୟ୍‌ରିଲା ଜାଲ୍‌ କଃଣ୍ଡିଏ ଜିକି ଆଣ୍‌ଲା; ଆର୍‌ ଅଃତେକ୍‌ ମାଚ୍ ରିଲାକ୍‌ ହେଁ ଜାଲ୍‌ ନଃଚିଡ୍‌ଲି । 12 ଜିସୁ ସେମଃନ୍‌କେ କୁଦିକଃରି କୟ୍‌ଲା, "ଆସି କାହା ।" ଚେଲାମଃନାର୍‌ ବିତ୍ରେ କେଏ ହେଁ ତୁୟ୍‌ କେଏ ବଃଲି ତାକ୍‌ ହଃଚାରୁକ୍‌ ସାସ୍‌ ନଃକେର୍ତି ରିଲାୟ୍‌, କାୟିତାକ୍‌ବଃଲେକ୍‌ ସେ ଜେ ମାପୁର୍ ଇରି ସେମଃନ୍ ଜାଣି ରିଲାୟ୍‌ । 13 ଜିସୁ ଆସି ରୁଟି ନଃୟ୍‌ ସେମଃନ୍‌କେ ଦିଲା, ଆର୍‌ ସେବାନ୍ୟା ମାଚ୍ ହେଁ ଦିଲା ।

14 ମଃଲା ଲକାର୍‌ ବିତ୍ରେ ଉଟ୍‌ଲା ହଃଚେ ଜିସୁ ଚେଲାମଃନ୍‌କେ ଆର୍‌ ସଃଙ୍ଗ୍ ତିନିତର୍‌ ଦଃକାୟ୍‌ ଅୟ୍‌ଲା ।

15 ସେମଃନ୍ କାୟିଲା ହଃଚେ ଜିସୁ ସିମନ୍ ପିତର୍‌କେ ହଃଚାର୍ଲା, "ଏ ଜହନାର୍‌ ହୟିସି ସିମନ୍, ତୁୟ୍‌ କାୟି ମକ୍‌ ଇମଃନାର୍‌ ତଃୟ୍‌ହୁଣି ଅଃଦିକ୍‌ ଲାଡ୍‌ କଃରୁଲିସ୍‌ ?"

ସେ ତାକ୍‌ କୟ୍‌ଲା, "ହେଁ ମାପୁର୍, ମୁୟ୍‌ ଜେ ତକ୍‌ ଲାଡ୍‌ କଃରୁଲେ, ସେରି ତୁୟ୍‌ ଜାଣି ଆଚ୍‌ସି ।"

ଜିସୁ ତାକ୍‌ କୟ୍‌ଲା, "ମର୍‌ ମେଣ୍ଡା ହିଲାମଃନ୍‌କେ ଚଃରାଉ ।" 16 ଜିସୁ ଆରେକ୍‌ ଇତାର୍‌ ସଃଙ୍ଗ୍ ଦୁୟ୍‌ତର୍‌ ତାକ୍‌ ହଃଚାର୍ଲା, "ଏ ଜହନାର୍‌ ହୟିସି ସିମନ୍, ତୁୟ୍‌ କାୟି ମକ୍‌ ଲାଡ୍‌ କଃରୁଲିସ୍‌ ?"

ସିମନ୍ ତାକ୍‌ କୟ୍‌ଲା, "ହେଁ ମାପୁର୍, ମୁୟ୍‌ ଜେ ତକ୍‌ ଲାଡ୍‌ କଃରୁଲେ, ସେରି ତୁୟ୍‌ ଜାଣି ଆଚ୍‌ସି ।"

ଜିସୁ ତାକ୍‌ କୟ୍‌ଲା, "ମର୍‌ ମେଣ୍ଡାମଃନାର୍‌ ଜଃତୁନ୍‌ କଃର୍‌ ।" 17 ଜିସୁ ଇତାର୍‌ ସଃଙ୍ଗ୍ ତିନିତର୍‌ ତାକ୍‌ ହଃଚାର୍ଲା, "ଏ ଜହନାର୍‌ ହୟିସି ସିମନ୍, ତୁୟ୍‌ କାୟି ମକ୍‌ ଲାଡ୍‌ କଃରୁଲିସ୍‌ ?" ତୁୟ୍‌ କାୟି ମକ୍‌ ଲାଡ୍‌ କଃରୁଲିସ୍‌ ? ଇରି କୟ୍‌ ସେ ତିନିତର୍‌ ପିତର୍‌କେ ହଃଚାର୍ଲାକ୍‌ ପିତର୍‌ ଦୁକ୍‌ ଅୟି ତାକ୍‌ କୟ୍‌ଲା, "ମାପୁର୍, ତୁୟ୍‌ ସଃବୁ କଃତା ଜାଣି ଆଚ୍‌ସି; ମୁୟ୍‌ ଜେ ତକ୍‌ ଲାଡ୍‌ କଃରୁଲେ, ସେରି ତୁୟ୍‌ ଜାଣି ଆଚ୍‌ସି ।"

ଜିସୁ ତାକ୍‌ କୟ୍‌ଲା, "ମର୍‌ ମେଣ୍ଡାମଃନ୍‌କେ ଚଃରାଉ ।

18 ସଃତ୍‌କଃରି ମୁୟ୍‌ ତକ୍‌ କଃଉଁଲେ, ବେଣ୍ଡ୍ୟା ରିଲାବଃଳ୍‌ ତୁୟ୍‌ ଅଃହ୍‌ଣାର୍‌ ଅଃଟା ବାନ୍ଦି ଅୟି ଜୁୟି ହାକ୍‌ ମଃନ୍‌, ସେ ହାକ୍‌ ବୁଲ୍‌ତି ରିଲିସ୍‌, ମଃତର୍‌ ବୁଡା ଅୟିଲେକ୍ ଅଃହ୍‌ଣାର୍‌ ଆତ୍‌ ଲାମାଉସି ଆର୍‌ ବିନ୍‌ ଲକ୍‌ ତର୍‌ ଅଃଟାକ୍‌ ବାନ୍ଦି ଜୁୟି ହାକ୍‌ ତର୍‌ ମଃନ୍‌ ନଃରେୟ୍‌, ସେ ହାକ୍‌ ତକ୍‌ ନଃୟ୍‌ ଜାୟ୍‌ଦ୍‌ ।" 19 ପିତର୍‌ କଃନ୍‌କଃରି ମଃର୍ନ୍‌ ବଗ୍ କଃରି ଇସ୍ୱରାର୍‌ ଜଃଜ୍‌ମାନ୍ କଃରେଦ୍‌, ସେ କଃତାକ୍‌ ଦଃରି ଜିସୁ ଇରି କୟ୍‌ଲା । ଇରି କୟ୍‌ଲା ହଃଚେ ଜିସୁ ତାକ୍‌ କୟ୍‌ଲା, "ମର୍‌ ହଃଚେ ଆଉ ।"

20 ✝ଜିସୁ ଜୁୟି ଚେଲାକେ ଲାଡ୍‌ କଃର୍ତିରିଲା ଆର୍‌ ଜେ ରାତ୍ୟା କାତାବଃଳ୍‌ ତାର୍‌ ବୁକେ ଡେରାୟ୍‌ ଅୟି, ମାପୁର୍, ତକ୍‌ କେଏ ସଃତ୍ରୁ ଆତେ ସଃହ୍ରି ଦଃୟ୍‌ଦ୍‌ ବଃଲି ହଃଚାରିରିଲା, ସେ ଚେଲାକେ ପିତର୍‌ ଉଲ୍‌ଟି କଃରି ହଃଚେ ଆସ୍ତିରିଲାର୍‌ ଦଃକ୍‌ଲା । 21 ପିତର୍‌ ତାକ୍‌ ଦଃକି ଜିସୁକେ ହଃଚାର୍ଲା, "ମାପୁର୍, ଇମାନାୟ୍‌ର୍‌ ବିସୟେ ତୁୟ୍‌ କାୟିରି କଃଉଁଲିସ୍‌ ?"

22 ଜିସୁ ତାକ୍‌ କୟ୍‌ଲା, "ମୁୟ୍‌ ଆରେକ୍‌ ଗଟ୍‌ତର୍‌ ଆସ୍ତା ଦିନ୍‌ ହଃତେକ୍‌ ସେ ରେଉଅ ବଃଲି ମୁୟ୍‌ ଜଦି ମଃନ୍‌ କଃରିନ୍ଦ୍‌, ତଃବେ ତର୍‌ କାୟିରି ଆଚେ ? ତୁୟ୍‌ ମର୍‌ ହଃଚେ ଆଉ ।"

23 ସେତାକ୍‌ ସେ ଚେଲା ଜେ ନଃମେରେ, ଇ କଃତା ବାୟ୍‌ମଃନାର୍‌ ବିତ୍ରେ ଉର୍ଜି ଅୟ୍‌ଲି, ମଃତର୍‌ ସେ ନଃମେରେ ବଃଲି ଜିସୁ ତାକ୍‌ କୟ୍‌ନଃରିଲା, ମଃତର୍‌ ମୁୟ୍‌ ଆରେକ୍‌ ଗଟ୍‌ତର୍‌ ଆସ୍ତା ଦିନ୍‌ ହଃତେକ୍‌ ସେ ରେଉଅ ବଃଲି ଜଦି ମୁୟ୍‌ ମଃନ୍‌ କଃରିନ୍ଦ୍‌, ତଃବେ ତର୍‌ କାୟିରି ଆଚେ ବଃଲି କୟ୍‌ରିଲା ।

24 ଜେ ଇ ସଃବୁ କଃତା ସାକି ଦେଉଁଲା ଆର୍‌ ଇ ସଃବୁ ଲେକି ଆଚେ, ଇରି ସେ ଚେଲା; ଆର୍‌ ତାର୍‌ ସାକି ଜେ ସଃତ୍‌, ସେରି ଅଃମିମଃନ୍‌ ଜାଣୁ ।

25 ଆରେକ୍‌, ଜିସୁ ଗାଦେକ୍‌ ଗାଦେକ୍‌ କାମ୍‌ ହେଁ କଃରିରିଲା; ସେସଃବୁ ଜଦି ଗଟେକ୍‌ ଗଟେକ୍‌ କଃରି ଲେକା ଅୟ୍‌ରିଲେକ୍‌, ତଃନ୍‌ଅୟ୍‌ଲେକ୍‌ ଅଃତେକ୍‌ ପୁସ୍ତକ୍‌ ଲେକା ଅୟ୍‌ଲି ହୁଣି ଜେ, ମର୍‌ ବାବ୍‌ନାୟ୍‌ ଜଃଗତ୍‌ଜାକ ହେଁ ସେସଃବୁ ସଃଙ୍ଗାଉଁକ୍‌ ଟାଣ୍ ନୟ୍‌ଲି ହୁଣି ।