1 कुस्‌रु फारस देसेन राजु हतलु, कुर्‌सु राजान राज मां तीसरे साल दानीयल काजे ईनी वातेन बारामां मालुम हय गुयलो, दानीयलेन दीसरो नाव बेलतसस्‌सर हतलो, जी वात उजेंती हय गुय की, जी वात छाचली हतली की जां बेसकी मटी लड़ाय हवसे, दानीयल तीनी वात काजे जाणी लेदलु ने दानीयल काजे जी देखली वात समज मां आय गुय।

2 तीनी टेमे मां, मे दानीयल, तीन हाप्‌ता लक दुख झेलतु रयु। 3 हीनु तीन हाप्‌ता पुरा हवते लग, मे नी ते सवादो खाणो खादु, ने नी सीकार खादु, ने नी अंगुरेन रस मारा मुंहडाम नाख्‌यु, ने नी मारा डील मां तेल चुपड़्‌यु।

4 अळतेन मे पेहला महनान वीस ने चोवथे दाहड़े जत्‌यार मे हीदेकेल*10:4 तीगरीस नदी धड़े नावेन नदी धड़े हतलु। 5 तत्‌यार मे उपर भाळीन देख्‌यु, की सणेन पुथल्‌या पेहरी रह्‌लु, ने उफाज देसेन चुखला सनान पट्‌टु कमर मां बांदीन एक अदमी उबी रवलु। 6 तेरो डील मंहगला मणीन तसो हतलो, ने तेरो मुंहडो ईजळीन तसो हतलो, ने तेरा डुळा धपतेला दीवान तसा हतला, ने तेरी कमर मां ने पांय भबळतेला पीतळ्‌यान तसो हतलो, ने तेरा बुलेन अवाज मटली भीड़ेन अवाजेन तसी हतली।✝10:6 उजेंता बुले 1:13-15; 2:18; 19:12

7 तीनाक नीस्‌तु मे दानीयल अतरुत देख्‌यु, ने जे माणसे मार पुठ्‌ये हतला, चे काय नी देख्‌या, बाकुन चे बेसका थर-थर करने बाजी गुया। ने डुकायणे वाटे ढास गुया। 8 तत्‌यार मे एखलुत रयन जो बेसको मटो सपनो देखतु रयु, हेरेसी मारी ताकत जाती रय, ने बेसकु बीही गुयु, ने मेसेक कुय बी नी उळखी सक्‌या। 9 तेबी मे तीना माणसेन बुलेन आवाज सामळ्‌यु, ने जत्‌यार चु मेसेक सामळाय देदु, तत्‌यार मे मुंहडान ने भुरसे हीट पड़्‌यु, ने बेसकी नींद मां धरती पर उबडु हय्‌न पड़ गुयु। 10 पछेन काहनुक आपसे हाते करीन मारा डील काजे छीम्‌यु। ने मेसेक बठु करीन मांडान ने हातेन भुरसे थर-थर कापाड़तु जाय्‌न मेसेक उबु कर देदु। मे हय बी कापणे बाजी रवलु।

11 तत्‌यार चु मेसेक कह्‌यु, "ए दानीयल तु भगवानेन बेसकु लाटेकलु पुर्‌यु छे, जो बुल मे तुसेक सामळावो, तीनाक तु समजी जाजी, ने सुदु उबु रवजी, काहाकी हय मे तार धड़े मकली रयु" जत्‌यार चु मेसेक जो बुल सामळावलु, तत्‌यार मे उबु ते हय गुयु, बाकुन चु थर-थर कापणे बाजी गुयु।

12 तेरेमां चु मेसेक कह्‌यु, ए दानीयल, तु मां बीहे, काहाकी तु सपनान मतलब समजणेन काठी कुसीत कर्‌यु। जत्‌यार तु समजणे सुचणे मां मन लागाड़्‌यु ने आपसा भगवान अगळ आपसा काजे नीचळु कर्‌यु, तीनेत दाहड़े तारी दुवा सामळी लेदा ने तारी दुवान जपाप वाटे जां आय रयु। 13 फारस राजेन मुख्‌यु वीस ने एक दाहड़ु तक मार साते लड़ाय करतु रयु, बाकुन मीकायेल जु एक खास मुख्‌यु छे, सरग दुत मारी मदत करने आयु, हेरेसी मे फारस राज मां एखलुत रय गुयु,✝10:13 उजेंता बुले 12:7 14 ने हय मे तुसेक समजाड़ने आय रयु, की आकरी दाहड़ाम तारा माणसे पर काय वीतसे। काहाकी जो सपनो तु देखलु‌ छे, चो थुड़ाक दाहड़ा पछेन पुरो हय जासे।

15 तत्‌यार चु माणुस मार सी असी वात कह्‌यु, तत्‌यार मे धरती भीणी मुंहडो कर्‌यु ने हुगु रय गुयु। 16 तत्‌यार माणसेन अवल्‌यात साय काहनुक मारा हुटड़ा काजे छीम्‌यु, ने मे मुंहडो उघाड़ीन बुलने बाजी गुयु। ने जु मार अगळ उबु हय रवलु, तीनुक मे कह्‌यु, ए मारा मालीक सपनान वजे सी मेसेक दुख हयो, ने मारेम काय बी ताकत नी रय। 17 हेरेसी मारा मालीकेन जु पावर्‌यु, आपणा मालीक साते कसु वात कर सके? काहाकी मारा डील मां नी ते काय ताकत रय, ने नी काय मारेम जीव रयु।

18 तत्‌यार माणसेन तसु देखायतेलु, ने मेसेक छीम्‌यु ती मेसेक हीम्‌मत आप्‌यु। 19 ने चु कह्‌यु, "ए मारा भगवानेन लाटेक‌ला पुर्‌या, मां बीहें, तुसेक सांती आपो, तु काठु रव, ने तु हिम्‌मत राख।"

जत्‌यार चु मेसेक कह्‌यु, ती मेसेक हिम्‌मत आप्‌यु, ए मारा मालीक हय कव, काहाकी तु मेसेक ताकत आपाड़्‌यु।

20 तत्‌यार चु मेसेक कह्‌यु, तु ते जाणे की मे तार धड़े काय लेणे आय रयु? हय मे फारस देसेन मुख्‌या सी लड़ाय करने पछु जाय्‌स, ने जत्‌यार मे लड़ाय करने जाय्‌स, ती युनान देसेन मुख्‌यु आवसे। 21 अळतेन जी छाचली वात खरला-सासतुर मां लिखली छे, ची मे तुसेक देखाड़ीस, तीनु मुख्‌यान वीरुद, तुंद्‌रा मुख्‌या मीकायेल काजे छुड़ीन अळी मार साते रवणे वाळा मुख्‌या कुय नी हय।