Daniel 7

दानीयलेन साहरे आपसान दरसनेन बारामां देखाड़नु

चार जानवर्‌यान बारामां दानीयलेन दरसन

1 बेबीलोनेन राजु बेलसस्‌सरेन पेहला सालो मां, दानीयल राती एक सपनो ने दरसन देख्‌यु। तत्‌यार चु चो सपनो लिख्‌यु, ने तीनी वातेन मतलब बी बताड़्‌यु। 2 दानीयल जो कह्‌यु की, मे राते ज सपनो देख्‌यु,

की एक मटला दर्‌यान आड़े-धड़े आंधी चालने बाजी रय। 3 तत्‌यार दर्‌या मां सी चार मटला-मटला जानवर नीकळ्‌या, जे एक दीसरा सी अलग-अलग हतला।✝7:3 उजेंता बुले 13:1; 17:8 4 पेहलो टीड्‌डो नाहारेन तसो हतलो, ने तेरा पाखड़ा घुवड़ान तसा हतला, ने मेसेक देखते-देखते तेरा पाखड़ा उखाळ देदा, ने चु जागा मां ती उठीन, माणसेन तसु पायेन साहरु लीन उबु हय गुयु, ने तीनाक माणसेन डील आप देदा।

5 अळतेन मे एक अळी जानवर देख्‌यु, चो रीछड़ान तसो हतलो, ने एक हेट्‌यु उबु हय रवलु, ने तेरा मुंहडा मां दातेन ईचमां तीन पासळी हतली; ने माणसे कवतेला की, उठीन बेसकु सीकार खा।

6 तेर पछेन मे एक कावा अळी नींगा करीन देख्‌यु, की चो जानवर एक चीतर्‌या-नाहारेन तसो छे। ने तेरा आसा पर चिरलान तसा चार पाखड़ा छे, ने तीना जानवर्‌यान चार मुणका हतला, ने आपसो आखो हक तीना जानवर काजे आप देदु।✝7:6 उजेंता बुले 13:2

7 अळी मे तेरे पछेन मे एक सपना मां नजर नाख्‌यु ने देखीन कह्‌यु, ने एक चवथो जानवर छे, चो बेसको ने बीहाड़े ने ताकतवाळो छे; ने तेरा मटला-मटला लुहड़ान दात छे, चु आखो काय खाय जाय ने कटका-कटका कर देय, जो बची जाय तीनाक पाय तळे रंदळी देय। चो आखा पेहला जानवर्‌या मां सी अलग छे, ने तेरा दस सींगड़ा छे। 8 मे तीनु सींगड़ा काजे धीयान सी देख्‌यु ती काय देख्‌यु की तींद्‌रे ईचमां सी एक अळी नान्‌लो सींगड़ो नीकळ्‌यो, ने तीना सींगड़ान ताकत सी तीनु पेहला सींगड़ाम सी तीन सींगड़ा उखाळ्‌या, अळतेन मे जो देख्‌यु की हीनु सींगड़ाम सी माणसेन डुळान तसो, ने मटाय्‌न वात बुलने वाळो मुंहडो हतलो।

जलेमका जीवतेला रवणे वाळान दरसन

9 मे देखतु-देखतु आकरी मां जो देख्‌यु की राजगाद्‌या मेकला छे, ने एक आड़ा-बुड़ा मां सी एक बस्‌यु, तींद्‌रा पुथल्‌या बरप सांय धवेळ्‌ळा उजळा हतला ने मुणकान कान्‌या उजेळान तसा ने तींद्‌री राजगादी आकठान तसी ने तींद्‌रा चाटका हुड़ु-हुड़ु धपतेला आकठान तसा देखायतेला।✝7:9 उजेंता बुले 20:4; 1:14 10 तीना जमाना टेमे धड़े सी आकठीन धार नदी सी नीकळीन उहणे बाजी रवली, अळतेन हजारु माणसे आपसी सेवा चाकरी करने बाजी रवला, ने लाखु माणसे तेर अगळ हजुर हतला; अळी नीयाव करने वाळी बठ गुयु ने किताप्‌या खुली गुय।✝7:10 उजेंता बुले 5:11; 20:12

11 तीनी टेमे तीना सींगड़ान खुदेन मटाय्‌न अवाज सामळीन देखतु रयु, ने देखते-देखते आकरी मां देख्‌यु की तीना चोवथा जानवर काजे मारी नाख्‌या, ने तेरा डील काजे धपतेला आकठाम नाख देदा ने धपाड़ देदा। 12 बाकी बचला दीसरा जानवर्‌यान हक हापकी लेदा, बाकुन तीनुक थुड़ाक दाहड़ा अळी जीवतेला रवणेन हुकुम आप्‌या।

13 मे राते एक दरसन देख्‌यु, ने देखु, माणसेन पुर्‌या साय काहनुक सरगेन वादळा पर बसीन आवतेलु देखसु, ने चे तीना डाहला धड़े पुग्‌या, ने तीनाक चे तेरे धड़े लाया। 14 तत्‌यार तीनाक असो राज, सेक-सींगार ने राज आपलो छे, ने भाती-भातीन कुळीन माणसे ने राज-राजेन माणसे ने भाती-भातीन बुली बुलने वाळा ने आखी कुळीन माणसे तेरा हक मां रवे; ने तेरो राज जलम लक टणको, ने तेरो राज खत्‌तम नी हवणे वाळो ठेहरसे।

सपनान मतलब बताड़नु

15 मे दानीयल जो सपनो देखलु हेरेसी मे घाबराय गुयु, ने बेसकु उदास हय गुयु। 16 तत्‌यार जे माणसे धड़े उबा हय रह्‌ला, तींद्‌रे मां सी एक धड़े जाय्‌न मे तीनी आखी वातेन मतलब पुछ्‌यु, ने चु जो कंयन मेसेक तीनी आखी वातेन मतलब बताड़्‌यु। 17 तीनु चार मटला-मटला जानवर्‌यान मतलब चार राज*7:17 राजु छे, जो धरती पर पयदा हवसे। 18 बाकुन मुखी माणसे चुखला माणसे देस काजे हात करसे, ने जलमकात तींद्‌रा हकवाळा बणीन रवसे।✝7:18 उजेंता बुले 2:5

19 तत्‌यार मारा मन मां जी वीच्‌यार आय की तीना चोवथा जानवरेक बी जाणी लम, जो दीसरा तीनु सी आंग्‌ये ने बेसको हतलो, ने तेरा दात लुहड़ान ने नखड़्‌या पीतळेन हतला, चु आखो काय खाय जातलु, ने छेदर्‌या-छेदर्‌या कर देतलु, ने बचला काजे पाय सी रंदळी नाखतेलु। 20 अळतेन तेरा मुणकान दस सींगड़ान भेद जाणनेन, ने तीनु दस सींगड़ान ईचमां नीकळन्‌या तीन सींगड़ा भेद जाणनेन हर आय। चो दस सींगड़ान ईचमां नीकळन्‌यो सींगड़ो ते बीहाड़े असो ने बेसको वारु देखायतेलो, तेरा डुळा हतला ने मुंहडा बी हतलो, जो मटाय्‌न वात बी करने बाजी रवलो।

21 अळतेन मे देख्‌यु की, चो सींगड़ो चुखला माणसे साते लड़ाय करीन तीनी टेमे तक ताकतवाळो हय गुयो।✝7:21 उजेंता बुले 13:7 22 तत्‌यार लक चु जलमकु राजु नी आयु, ने आखाम जुरभर्‌या भगवानेन चुखला माणसेन खरलु नीयाव नी बस्‌या, ने चुखला माणसेक राज जड़नेन टेम नी आवी।

23 चु जलमकु राजु मेसेक कह्‌यु, तीना चवथा जानवर्‌यान मतलब, एक चोवथु राज छे। चो धरती पर आय्‌न आखा राज ती अलगुत रवसे, जो राज आखी धरतीक रंदळीन छेदर्‌या-छेदर्‌या कर देसे। 24 तीनु दस सींगड़ान मतलब जो छे की, तीना राज मां सी दस राज नीकळसे, ने अळतेन एक अळी दीसरु राजु आवसे, चु पेहला राजा सी अलगुत भातीन रवसे, चु तीनु दस राजा माय्‌न तीन काजे आपसा हक मां कर लेसे।✝7:24 उजेंता बुले 17:12 25 ने चु डाहला मुख्‌या भगवानेन वीरुद मां वात कह्‌से, ने तीना डाहला मुख्‌यान चुखला माणसे काजे कुची देसे। ने चु आखो काय टेम ने कायदा काजे ने तीहवार बदलनेन वात करसे, भगवानेन माणसे साड़े तीन साल लग चे आखो आपसा हातेम कर देसे। 26 बाकुन, तत्‌यार नीयाव करन्‌या बठसे, ने आपसो आखो राज हापकीन खत्‌तम कर देसे, ने आखो सारी देसे, ने जां लग की तेरु पतु बी नी चाले। 27 सरगेन आखे जागे सी धरतीन आखा राजवाड़ा ने राज जुरभर्‌या भगवानेन भगत काजे आपणेम आवसे, तींद्‌रो राज जलमको राज रवसे, धरतीन आखा राजा लक तींद्‌री सेवा करसे, ने तींद्‌रा हुकुम मानसे।

28 तीनी वातेन बारामां मे हंय कय देदु, बाकुन मे दानीयल मन मां बेसकु घाबरायतु रयु, ने मे बीही गुयु, ने हीनी वातेक मे मारा मन मां राखी र्‌यु।