1 हइ दाऊद कर टोरवा उपदेसक कर बचन हबै, जउन यरुसलेम कर राजा रथै। 2 उपदेसक कथै, "बेकार हबै, बेकार हबै, बिलकुन बेकार सब कुछ बेकार हबै।" 3 मनसेन के अपन ऊ मेहनत लग काहिन फायदा होथै, जउन उन बेरा कर तरी मेहनत करथै। 4 अक्ठी पीढी जथै, अउ दूसर पीढी आथै, पय भुंइ हरमेसा बने रथै। 5 बेरा निकरथै अउ बुडथै, अउ अपन निकरै के दिसा के पल्ला जल्दी लउट जथै। 6 हवा दक्खिन के पल्ला लग बहथै, अउ उत्तर छो घूम जथै ऊ घूमथै अउ बहत रथै, अउ अपन परिधि हे लउट आथै। 7 सब नदिया समुन्दर हे मिलै हबै, ता समुन्दर नेहको भरथै जउन जिघा लग नदिया निकडे हबै उहै छो फेरै लउट जथै। 8 सगलू बात मेहनत लग भरै हबै, मनसे एखर बिस्तार नेहको कर सकिन अउ आंखी देखके भरपूर नेहको होथै, अउ न कान सुनके संतुस्ट होथै। 9 जउन हुइ चुके हबै ऊ फेरै होही, अउ जउन कुछ बन चुके हबै ऊ फेरै बनही, अउ हइ बेरा के तरी कउनो बात नवा नेहको हबै। 10 का असना कुछ हबै जेखर बारे हे कउनो कहि सकिन, देखा? हइ कुछ नबा हबै, हइ इहां पहिले लग हबै, बोहत पहिले लग रथै अउ हइ हमर टेम लग आगू इहां रथै। 11 पुरान बातन के कुछ सुरता नेहको रखथै, अउ इहां तक आमै बाले पीढिन के उन मनसेन कर दवारा सुरता नेहको करे जही, जउन उनखर अनुसरन करथै।

12 मै उपदेसक यरुसलेम हे इस्राएल कर राजा रथों। 13 मै अपन मन लगायों कि जउन कुछ आकास कर तरी करे जथै, ओखर भेद दिमाक लग सोंच बिचार के मालुम करव, हइ बडा दुख कर काम हबै, जउन भगवान मनसेन कर निता ठहराय हबै कि ओहमा लगे। 14 मै उन सगलू कामन के देखों जउन बेरा के तरी करे जथै, देखा उन सगलू बेकार अउ माना हवा के पकडे के हबै। 15 जउन टेडका मनसे हबै, ऊ सिध्धा नेहको करे जाय सकथै, अउ जउन काम हबै, उके गिने नेहको जाय सकथै। 16 मै मन हे कथो, "देख जउन मोर लग यरुसलेम हे राज करत रहिन, उनखर मसे मै बोहत दिमाक बाले हुइ गय हबन, मै बोहत सारे दिमाक अउ ग्यान कर अनुभव करे हव।" 17 अउ मै अपन मन हइ जानै लग लगायों, कि दिमाक कर भेद काहिन हबै, अउ पागल पन अउ मूरख काहिन हबै, ता मोके जान पडिस कि हइ हवा के पकरै कर जसना हबै। 18 काखे बोहत दिमाक के संग बोहत दुख होथै, अउ जउन अपन ग्यान बढाथै, ऊ अपन दुखो बढाथै।