1 हइ सब मै मन लगायके सोंचा कि हइ सगलू बातन के भेद पाहुं, कि कउन मेर नेक अउ हुसियार मनसे अउ उनखर काम भगवान के हाथ हे हबै, मनसे के आगू सबमेर के बात हबै पय ऊ नेहको जानथै कि ऊ माया हबै या बैर। 2 सगलू बात सब के निता एकै जसना होथै, नेक होय या बेकार, निक्खा, सुध्द या असुध्द बलि चढामै बाले या बलि नेहको चढामै बाले, जउन दसा निक्खा मनसे के हबै ऊ पापी मनसे हबै जउन अपन किरिया के पूर करथै ओखर दसा उहै हबै, जउन किरिया के उलंघन करथै। 3 जउन कुछ बेरा के तरी छो करे जथै, ओहमा हइ अक्ठी दोस हबै, कि सगलू मनसेन के अक्ठिन दसा हबै, अउ मनसेन के मन हे बुराई भररे हबै, अउ जब तक उन जिन्दा रथै उनखर मन हे पगलाय रथै, एखर बाद उन मरेहर हे जाय मिलथै। 4 पय जउन सब जिन्दा हे हबै, उके आसा हबै, काखे जिन्दा कुकरा मरेहर बघवा लग बढके हबै। 5 काखे जिन्दा तो एतका जानथै कि उन मरहीं, पय मरेहर कुछु नेहको जानथै अउ न उनके कुछु अउ पलटा मिल सकथै, काखे उनखर सुरता मिट गय हबै। 6 उनखर माया अउ बैर अउ उनखर जलन नास हुइ चुकिस, अउ जउन कुछ बेरा के तरी करे जथै ओहमा हरमेसा के निता उनखर अउ कउ हिस्सा नेहको होही। 7 अपन रास्ता हे कढ जा, अपन रोटी खुसी लग खाय कर, अउ मन हे सुख मानके अपन अंगूर के रस पीय कर, काखे भगवान तोर कामन लग मगन हुइ चुके हबै। 8 तुम्हर बन्डी हरमेसा साफ रहै, तुम्हर मूंड हे हरमेसा तेल लगे रहै। 9 भगवान बेरा के तरी भुंइ हे बेकार जीवन के जेतका रोज दय हबै, ओहमा अपन पिरिय डउकी के संग जीवन के खुसी मना, काखे जीवन हे इहै तुम्हर हिस्सा हबै, जउन मेहनत तुम भुंइ हे करथा, ओहमा इहै तुम्हर हिस्सा हबै। 10 तुम्हर हाथ हे जउन काम आबै, उके पूर सक्ति लग करा काखे अधलोक हे जिहां अपन मिरतू के बाद तुम जइहा, न काम हबै, न बिचार उछो न ग्यान हबै अउ न दिमाक हबै। 11 फेर मै भुंइ हे देखों कि तै दउर हे तेज दउरै बाले अउ लडाई हे सूबीर जीतथै, न हुसियार मनसे रोटी पाथै न समझै बाले डेरा, अउ न परवीनन हे अनुगरह होथै, उन सब टेम अउ संयोग के वस हे हबै। 12 काखे मनसे अपन टेम नेहको जानथै, जसना मछडी दुखदाई पानी हे अउ चिरइया जाला हे फसथै, ओसनेन मनसे दुखदाई टेम हे जउन उनखर हे अचानकै आय पडथै अउ फंस जथै।

13 मै बेरा के तरी हइमेर के दिमाक के बात देखे हबै, जउन मोके बडी जान पडथै। 14 अक्ठी नान लग सहर रथै, जेहमा चुटु हस मनसे रथै, अउ कउनो बडा राजा उके चढाई करके उके घेर लेथै, अउ ओखर बिरुध्द बडा झगडा करथै। 15 पय ओहमा अक्ठी दालिद हुसियार डउका पाय गइस, अउ ऊ उस सहर के अपन दिमाक के दवारा बचाइस, तउमा कउनो ऊ दालिद डउका के सुरता नेहको रखथै। 16 तब मै कथो, अगर दालिद के दिमाक बेकार समझे जथै अउ ओखर बचन कउनो नेहको सुनथै तउमा पराकरम लग दिमाक निक्खा हबै। 17 हुसियारन के बचन जउन धीम-धीम कहे जथै, उन मूरखन के बीच परभुता करै बालेन के चिल्लाय-चिल्लाय के कहै लग बोहत सुने जथै। 18 झगडा के हथियारन लग दिमाक निक्खा हबै, पय अक्ठी पापी बोहत लग भलाई के नास करथै।