1 Inji riwa ari wa ran he rinkon ri tra Izhi a chu ndu riwa a bi han, rinyi he jaji tre nye. 2 Rinkon ri tra Izhi no he ri ndindi ti, no he ri waa riri, no he ri rere, no son kpen, no he nji ri vutu wan, nji ri kpa tsren ri ko wan, ari to tsro tre Izhi ri nji, 3 nji riwa a ran ri so kyawa wa huwa ran, a ran nji ri wanyu ran, a ran nji ri janyu ran nga a ran he nji riwa a to ro nkren ran. 4 No he nji riwa ari milan ko ngɨzhi, ran no miri wan no wa wo tre wan wari no mkpen. 5 Inde nji riwa a ran to ngɨzhi ko wan ran ari tise ran to ngɨzhi wa nji ri tra Izhi? 6 No ran he nji riwa a kpa Izhi sisa ran, ritu no ran he nji riwa ari ran chonkpon ran, ko rimi bibi yaa riwa meme nji ti-a ran. 7 No he nji riwa nji wa nyɨme-u, no he nji riwa wa ran he wa hu Izhi ran no wa kpa nyɨme ri wu ritu no nji no wa ran tsiri no gra rimi che riwa meme nji ran.

8 No wa dzon ri tra Izhi ngawen no wa he ri sron ndindi a ran wa wanyu ran. No wa ran he wa so hi nga wa nkren bran bran ran, 9 no wa ngɨzhi tre ri yosron mba riwa Izhi no wa ri sron riri. 10 No wa tsra wa ri ko wa ri no wa ndu, ka wa tsra, wa ran to wa ri meme zren ran ko waka no wa ndu.

11 Imba mba ngawen no wa he mba wa sron ndindi, no wa ran he wa kran nji ran, ama no wa he wawa wa vu tumba ri kpunji tre bla bubu. 12 Inji riwa ari dzon tindu ri tra Izhi no he nji riwa a he ri waa riri, no he nji riwa ari milan ngɨzhi miri ri ko wan wawu. 13 Ka wa dzon tindu ri ko Izhi wawa wa mɨlan ndu ti wa no wen nkpen bran bran ritu ngamba wa fe senkpa bran wari ki kusi nji ri sron riri wari la wa yo sron mba rimi Kristo Yeso.

14 Ama me yo sron rimi vi nyi ri me ye ri wu me ngaa riwu ritu, 15 ka me ran chichi ye ran, imbe nyi ri no-u to bibi riwa a bi no nji no wa to bibi riwa wa ti ri tumba rimi tra Izhi, wawu nye he tra Izhi riwa a he ri sii, riwa a he igla nga nchi tra riwa a he kpunji tre. 16 Aran he kya riwa wa hon kpa nyɨme ri nchon tre riwa Izhi ŋɨran rita ran:

a ye rimi kpa nji,

wa tsro-u ri a he vren Izhi ri kpunji dzu ri wo Yuu,

nga miri ko Izhi wa to,

wa tre tre wan bla bubu wawu,

nji waka kpanyɨme ri wu ri tre wan,

waka ban wu hi ri shu rimi mkpen.