1 Ame Bulus nye me ngan mbe nyi ri no-u,

Ame vren ri ndu Kristo Yeso, rimi gbengbren Izhi iyo sron mbu riwu nye a no wen senkpa me ngan.

2 Me ngan mbe nyi ri no-u a wu Timoti ivren won riwa a he ritu wu yo sron ri Kristo. Me bre Izhi riwa a he Timbu, nga Bachi mbu Kristo Yeso no ti ndindi ti ri yi, ri losron nga sisron.

3 Riwa me ran wa me ri hi ri meme Makidoniya, me fen wu ton ri no son ri nchon gbu Afisa, ritu riwa wu dzu wa tsro tre ri che no wa ka chuwo, 4 no wa ran wuu vi rimi la njo tre ri kuklu nga riwa gɨzhi mba ran. Bibi kyawa wanyi ri ngɨzhi janyu ye ran kpa ndu Izhi kukri. Ritu indu Izhi ri wa wawa wa kpa nyɨme riwu. 5 Me layi tre nyi ritu no wa hu Izhi wawu no wa he ri nyɨme riwa a zhu ri tsitsri sron, ri sron kinklan, nga kpanyɨme ri kpunji. 6 Ama wawa wa tsro tre ri che wa ka tre tre Izhi chuwo wari ri tre kyawa wawa wa ran he nkon ran, 7 Wa wa no nji no wa tre ri wawa wa he wa tsro doka Musa, ama wa ran to kya riwa wa tre ritu wan ran.

8 Ki to ri doka Izhi a bi inde wa mɨlan-u hu wari tindu ri wu. 9 Izhi ran de doka ritu wawa wa hu tre wan ran, ama a de ritu wawa wa ran hu doka nga wari ri wa tre, nga wawa wa ran to Izhi ran, wari he rimi meme ti, Izhi de doka ritu wawa wa ti meme ti wari ri tsri Izhi, ritu wa wuu wa ti ri wa yi mba. 10 Ri wawa wa wa wamba nji, nga ri ronron wawa wa kru ngamba, imba wawa wa kru ngamba ngawen, ri wawa wa vu nji reri wa, nga wawa wa tiche nga wawa wa sho gon wache, ri wawa wa ran hu jaji tsro riwa Izhi ran, 11 itsro nyi a tsra ri itsro raro riwa Izhi no wen, wawu nye me tsro wa.

12 Me ngiri ri Kristo Yeso Bachi mbu riwa a no wen senkpa ran chu wen ritu dindi ti won no wen ti ndu ri wu. 13 Ko riwa me he nji riwa me tre kyawa meme ritu Izhi, meri no wa hu Yeso Kristo yaa, ama Izi ka losron ri me, me ran ti ritu ka me ran kpa Yeso ri ran. 14 Ama Bachi mbu to losron won bran bran ri yosron, ri nyɨme riwa a he rimi Kristo Yeso.

15 Itre nyi iche ran he rimi wan ran, ritu Yeso ye ri mgbumgblume nyi ritu riwa a ri ka wa meme ti chuwo ri wa, ama me ti meme ti han ko nga. 16 Ama Izhi a losron ri me, ritu nganyi nye Yeso a tsro mgbumgblume wawu ri wawu Izhi he nji riwa ari losron ri wanji wan, rinyi ri tsro wawa wa kpanyɨme riwu ritu ngamba nye wa fe vri hi ri kre vi. 17 No chu riwa ari he ritu kpanchi hi ri kre vi nga chu riwa a ran kuu ran, riwa ri chu riwa wana to-u ran, riwa wawu nye he Izhi riri, ari kpa gbre ran fe mkpen, no he ngamba.

18 I vren won Timoti, ikya riwa me la ri no ti a he bibi kya riwa wa la tre Izhi wa la-u ritu kya riwa wu ti, tindu ri tre nyi no he kpi ku riwa wu tindu ri wa, 19 ngɨzhi kpanyɨme wen wuri ti kya riwa wu to a bi. Bla vi nji wari wana ri nyɨme wa ri ti kya riwa a bi ran, ritu ngamba nye wa ran kpanyɨme ri Kristo ran. 20 Rimi mba nye wa Himinayas ri Alekzanda wa ti bibi wan nye me kawa no meme nji no ti wa yaa no wa ka meme tre ritu Izhi chuwo.