1 Ran yira rinkon nji ngan ran, tre riwu bibi riwa wu tre ri tiwen. Ban mirinze bibi riwa wu ban miri vayi wen, 2 Hu ri chanchon mba bibi riwa wu hu ri yi wen, nga nze mba bibi ri wa wu ban miri vayi wen ran taka meme ti kyari ri wa ran.

3 Zon mba wa kɨbo wa kpunji wawa wana he ri ronron riwa wa dzon wa ran, bi ri no wa mkpen mba. 4 Ama ka iwa ri kɨbo riwa a he ri miri, ko imiri miri wan, no wa ran tsro ri wawa wa hu Izhi ri bibi riwa wa milan ri ya yi mba ko iyi yi mba. ri ngamba nye wato ri wa bru ri han kya riwa iyi mba ti riwa ikya riwa Izhi ri wa no ta ki ti nye mba. 5 Iwa ri kɨbo riwa a ran he ri njo ran nga njo ran he riwa ari dzon wu ran, ari yo sron wan ri Izhi, ari sondu bre Izhi bla vi no dzon wawu. 6 Ama iwa ri kɨbo riwa a ran ti kya riwa a ran he rimi nkon Izhi ran, a he ka nji riwa a kuu ko a he ri sii. 7 La wa hu Izhi tre nyi ritu mba wa kɨbo no wa ran he kya riwa wa ran kran wa ran. 8 Inde nji riwa a ran dzon miri vayi wan, a zizan wako wan ran nji mba ri tre dzu nyu a ran ri tre gra sron ran a han nji riwa a ran kpa Izhi ran ri meme ti.

9 Ran yo nde wa ri kɨbo riwa a gran ronron gran riri ran, riwa a ran he ri se setanren rimi nde mba wa kɨbo ran, 10 no he wa riwa a to ari ti kyawa wa dindi ari mɨlan miri ngɨzhi, ari kpa wa tsren, ari zon wawa wana he ri kyari ran, ari ngla dza wa tsitsri ndu Izhi, ari zon wawa wa he ri yaa ran ri ti ndu wa ndindi.

11 Ran yo mba wa kɨbo wawa wa don ri senkpa ri rimi chanchon mba wa kɨbo ran ritu ka ikpa mba wulunde riwa wa timbye raro, irimiren riwa wati iri wa tindu ri Kristo waka ka chuwo, 12 ritu ngamba Izhi ri no wa yaa ritu wa ran ti kya riwa wa ka dzi ri wa ti ran. 13 Ri ngamba wa gra rimi son ri kukulu, wari ran gra ri ko ri ko a ran he son kuklu nkankshe ran, ama wa he wa kran, wari son nyu rimi tre riwa a ran bi ran, ka wa tre kya riwa a ran he wamba ran. 14 Ritu ngamba, me ŋoron mba wa kɨbo wawa wa senkpa ri no wa gran wari ngiji, wari mɨlan ko mba ti, ri ngamba wa ran no memenji nkon no wa tre tre meme ritu mba ran. 15 Ritu ko zizan imba wa kɨbo wari wa senkpa wa kɨma gon ti Izhi-e.

16 Ka iwa riwa ari hu Izhi a he ri mirivayi mba wa kɨbo, wawu nye he riwa ari dzon wa ri ngamba nye indu ri he huri ri wa hu Izhi ritu ngamba wa hu Izhi wa fe dzon wawa wa ran he ri wanjo riwa wa dzon wa ran.

17 Wa rinkon tre Izhi wawa wa tindu riwa a bi, no wa no wa mkpen branbran, a zizan wawa wa tre tre Izhi nga tsro tre wan. 18 Bibi riwa wa ngan rimi mbe Izhi,<<Ran son ntan ri nyu lando ka a he rimi ndu chan kpu ran.>>A bi no wa han nji ri wa a tindu. 19 Ran nyɨme no wa ngiji bla tre rinkon nji ri ndu Izhi ye kusi wen ran, ran kpa ran tse wa shada wa he hari ka itra. 20 Yira wawa wa ti meme ti ngaan no mgbron mba no wa ti sisiri ti meme ti.

21 Me bre wu ri kusi Izhi, ri Kristo Yeso, ri mirindu Izhi riwa wa zhu wa, mɨlan hu doka nyi, ran nyɨme ri nji ri han ri ran.

22 Ran chichi no njo ndu ran tse wu tsra kpanyɨme wan to rimi Kristo, Ka a ran he ngamba ran, meme ti wan ri hon tu wen. a wu ngawen son rimi tsitsri.

23 Ran so ima ri kankshe ran, so vi ima riwa a ti shɨbi-u ri wɨlo konkron inabi, ritu lilo wen riwa wu lo bla vi.

24 Memeti wari ri he ri rira, ka wana hi ri bubu bla tre ri ran. Ama iwa wari wa ran ri to wa ran tse ka a son bran ko wa to-u. 25 Nghamba nye wa kyawa wa ndindi wa he rira riwa ko ngaa ri to, ngamba nye wari wati riwa wa ran ri to wa zizan ran tse a ban vi hi kusi ko wa to-u.