1 Biyi wa kpan won, rinyi he mbe ri haha riwa me no yi me ngan rimi mbe wa nyi ngamba ritu no ran taka ri yi ritu no yi mɨlan taka ritu kya wanyi. 2 Me wa no yi taka bi ri to kya riwa wa la tre Izhi wa tsitsri wa tre mgbamgbanmu, nga kya riwa Bachi riwa a kpata chu wa a tre dzu ri nyu wa ndu Izhi. 3 Ri gbuchi, me wa me ri taka ri yi ri rimi kre vi, nji wari wa he riwa wa nza wari ti ko meme ngye riwa wa wa. 4 Rinyi nye ri he janyu mba,<<A kadzi ri wawu ri ye ko a he minyi? Wa ti wa timbu wa kuu-e ama ko ngaa kawan he bibi riwa a he zhu ri vi riwa wa ti mgbumgblume.>> 5 Wa ti rinye wari kamba ri kpunji riwa Izhi a de sisen muu, nga shu imba meme riwa Izhi ti wa, a ti meme ri ima, iima ka kagon nme. 6 Imba ka tindu ri nchn ima-a nye ran vu mgbumgblume iwu hi ngawan. 7 Ritu tre Izhi-a nye ishu ri meme wawa wa he zizan wa ka-u dzi ri gben wu riwa wa ti-u dzi ri gben wawa wa ran kpa Izhi ran hi chachu riwa wa bla tre, riwa wa huu wa ri wu.

8 Ama bi yi miri vayi ran kpa wurusu ri kya nyi ran, ivi riri a he ka ise ngo ri ri Bachi nga see ngo ri a he ka ivi riri kusi Bachi. 9 Bachi ran ri ti rererimi kya riwa a kadzi ri wawu ri ti ran, tsede ari vu sron ri yi a ran ri wa no ko ri no kuu ran, ama no ko ngan no ka meme ti chuwo. 10 Ama ivi riwa Izhi ri ye ka nji ri yibi. Chachu wan ishu ri ka la ri raan mgbamgban, wa kya wa wa rimi wa wa gon wa meme ri kyawa wawa wa he rimi wan wa kado.

11 Tunde ko ngye riwa a kagon mbu ri shan kado, ko milan ki bibi ri tsitsri nga son bibi riwa wa hu Izhi. 12 Bi ki ri gben vi ye Izhi, ivi-a ri ngɨzhi dzi shu ri wuru ye, ko ngye ri shan ritu gbaji wuru. 13 Ama ki gben kya riwa Izhi ka dzi: ri shu sisa nga meme sisa bubu riwa ndindi ti he ri koo.

14 Ri ngamba, biyi wa kpan won, ritu bi gben kyawa wanyi no wa ye, mɨlan ki bi ri ti kya riwa a tsra ritu no Izhi ri to yi ri tsitsri chachu riwa kristo ri bru ye, bibi ri wa Izhi ri to ri bi he ri son ri sikpa ri wu. 15 Taka ri ivu sron riwa Bachi ri ta a he ritu ki fe kpachuwo, bibi riwa vayi mbu Bulus ngan ri yi ri wiwiri riwa Izhi no. 16 Rimi mbe Bulus riwa a ngan wawu a ngan bibi wan nye riwa a ran la wa ritu kyawa wanyi, kyawa wawa wa ngan rimi mbe wan, wa he ri yaa to riwa wawa wa ran to kyari ran, nga wawa wa ran vu sron mba ran wa la tre riwa a ran tsra ran, bibi riwa wati rimi mbe wari riwa a ngɨzhi wa yo ri kuu.

17 Ritu ngamba biyi miri vayi tu nde bi to kyawa wanyi-e mɨlan ki riwa bi ran hu tre wa meme ti bi joku rimi nkon mbi. 18 Ama son ndu ran gbron rimi ndindi ti nga too riwa Bachi, nji riwa ari kpata chuwo Yeso Kristo no nkpen no he wawa, zizan hi ri kre wan, no he ngamba.