1 Ri ngamba, biyi miri vayi won, wawa me nyɨme yi nga bibi riwa me ti vi hari me ran to yi ran! Bibi riwa bi no wen kinklan sron, nga bibi riwa me kpo ngawon ritu mbi! Biyi ki gbengben rimi son mbi ri Bachi.

2 A wu Yudiya nga Sintiki, bubwo mbi, me bre yi, nyɨme ri ngambi ka miri vayi rimi sombi ri Bachi. 3 Nga a wu ngawen, ikpan ndu won ri kpunji, me wa wuri dzon mba wanyi; ritu wa dzon wen bran rimi la tre Izhi, nga ri Kleme ri wawa wa ngbɨron ndu won, wawa nde mba he rimi mbe Izhi ri vɨri.

4 Bi sundu ran ti kinklan sron rimi kabru tu mbi ri Bachi. Me bru ri layi ti kinklan sron.

5 Tsro rere sron ri ko ngha. Bachi gon ri ye. 6 Ran taka ritu ko kyari ran, ama rimi bre Izhi mbi miyen Izhi kya riwa bi wa, sondu ran miyen ri ngiri ri sron. 7 Nga sisron Izhi, riwa a han bibi to riwa nji, ari kɨma sron wen dzi rimi kabrutu ri Kristo Yeso.

8 Ri kre wan, biyi wa kpan won, no sron mbi no sho ri kyawa dindi nga wawa wa he riwa wa gbre wa: kyawa wa kpunji, ri nkpen, ri tsitsiri, ro nyime nga ri gbre. 9 Ti bibi kya riwa mi tsro yi nga bi ri kpa ri wo won, kahu ri riwa me tre nga riwa mi ti. Nga wawu Izhi riwa a ano ta si sron ri he ri yi.

10 Rimi son won ri kabru tu ri Bachi a he kya ri kinklan sron bran ri mo riwa kugon riwa vi bran riwa wu bru he vi riwa wu tsro ri wu nyime wen. Mi ran ri miyen ri wu kawen ri nyime wen ngaran, wu ran he ri vi riwa wu tsro wen ran nyen. 11 Nga mi ran ri tre nganyin ritu wa kamba ri me ran, ritu mi to bibi riwa mi ngiri ri kya riwa mi he ri wu. 12 Mi to bibi riwa mi son ko ri riwa mi ran he ri kya ri ran nga bibi riwa mi son ri riwa mi he ri wa kyawa bran. Mi to tu kya wanyi bibi riwa ka mi hi kokutan, ri ko shitan, ko mi ri hwishi ko ka min ri son ri yon, ko miri he ri wu bran ko ka tsawen. 13 Mi he ri gbengbɨren riwa ko iya bibi tan ran ye, ri gbengbɨren riwa Kristo Non wen.

14 Ama a bi bran riwa bi dzon wen ri vi riwa mi he rimi ya. 15 Biyi wa nji Filibiya bi milan to riwa mi ka gbu Makidoniya don gbagbla ri vi bla Tre ri Dindi, ara biyi nye bi he wa hu Izhi riwa bi dzon wen; ara biyi nye be he wawa be dzon wen ri wa kyawa. 16 A han nkpa riri riwa mi ran he ri ri gbu Tasalonika be tru wa dzon ye no wen. 17 Aran he ritu mi wa miri fe wa kyawa ran; ama, mi wa no Izhi no tilɨbu sro yi ritu dzon riwa bi dzon wen. 18 Ngye gha mbe ri kongye riwa bi no wen nga a kigbu bran! Me he ri kongye riwa mi wa zizan riwa Abaforiditus ngɨzhi kyawa riwa bi no ye no wen. Wa he ka ide ri hwi raro riwa wa no Izhi, ti baan riwa a tsra nga ran si Izhi sron. 19 Nga Izhi ri no yi kyawa bran hu ri Kristo Yeso, Izhi ri no yi ko ngye riwa bi wa. 20 NO gbre he wa Izhi nga Ati mbu hi ri kre vi! No he ngamba.

21 Ichi hi ri ko nji Izhi ritan wawa wa he wa Kristo Yeso. Wa hu Izhi wawa wa he ri me ri nyi wa chi yi. 22 Wa nji Izhi wawu rinyi wa chi yi, azizan wawa wa he ri ko chu Kesa. 23 No dindi ti Bachi Yeso Kristo no he ri yi wawu.