1 Biyi nkpranchi wa nji Galatiya! Nghaa nye gyuru yi? Kusi mbi nye wa kpan Yeso kristo ri konkron ka kuu. 2 Ikya riri nye me wa meri minye yi. Bi fe Yuu Izhi ritu hu doka Musa nye ka ritu kpanyɨme ri tre riwa bi wo? 3 Bi gbuchi ti-u ri Yuu Izhi ko zizan bi wa bi ri kre wu ri gbengbren mbi? 4 Iya riwa bi ti-a a he kukulu nye? ka bi ti ya nyi bran kukulu nye! 5 Izhi no yi Yuu wan nga bi ti kyawa wa de sisiri ritu doka Musa nye, ka bi wo tre dindi nye ko bi ri kpa nyɨme?

6 Nghamba nye Ibrahi: <<A kpa nyɨme ri Izhi, ritu ngamba nye Izhi a kɨma-u ti nji ri dindi kusi wan.>> 7 A he riwa bi to ri wawa wa kpa nyɨme ri Izhi wa he miri Ibrahi nye. 8 Rimi mbe Izhi nye wa tre ri Izhi ri ngɨzhi wawa wa ran he nji Yahuda ran ye ri nkon ritu kpa nyɨme. Sisenmu wa la tre raro ri Ibrahi ri,<<Ritu wen nye mgbumgblu me wawu wa fe lɨbu dindi.>> 9 Wawa wa kpa nyɨme waka ti lɨbu dindi sro riwa iwa Ibrahi nji ri wa a yosron ri Izhi.

10 Wawa wa yo sron ri doka Musa wa wawa wa lanyu ri wa, ritu a he rimi mbe ri,<<Inji riwa a ran kri ri kya riwa a he rimi doka riwa Musa ngaan ri mbe wan ran a he nji riwa Izhi lanyu ri wu nye.>> 11 A kri ri ra gbende ri injo ran ri fe lɨbu riwo Izhi ritu hu doka ran tsede,<<Inji riwa ari ti dindi ritu kpa nyɨme ri Izhi nye ri son si.>> 12 Doka ran he ritu yo sron ran, ritu a tre,<<Inji riwa a ti ndu riwu ritu wan nye ari son ri si.>> 13 Kristo kpata chuwo rimi ila nyu ri doka Musa riwa a he la nyu ritu mbu, ritu a he rimi ngaa ri,<<Inji riwa kpan-u ri konkron, a he nji riwa wa la nyu riwu.>> 14 Wati rinyi ritu no ndindi ti riwa wano ibrai nofe wawa wana he nji Yahuda ran zu riwo kristo Yeso, kita nga riwa yo sron mba riwa wa ka tre Izhi.

15 To, imiri vayi no wen me tsra kyari ri yi ri son ri bla vi. Bibi riwa inde wa kau zi njo ran yo kyari cha ran. 16 Ika tre dzi wa tre ri Ibrahi nye nga nji ri rimi wan. Itre Izhi ran tre ri<<Wa gɨzhi ran,>>Nufi wanji Ama<<Ri gɨzhi wen,>>Nufi nji riri riwa a he kristo. 17 Ingye kya riwa me tre-en, doka nyi ri wa a ye kugon ri se gbigba nza ri setra, a ran gban tre riwa wa kadzi mgbamgbanmu riwa a ri kau chuwo ran. 18 Inde ide nyi ye zu ri doka nye ka ara ye ri nkon ika tre zi ri Ibrahi riwa Izhi a de ran ama ritu ika tre zi riwa Izhi a ti ri Ibrahi nye a no de nyi. 19 A he ngamba wa ngɨzhi doka ye ritu ngye? Wa ti ritu no tsro ri kya riwa wa ti ran he ri nkon ran wa zi doka ritu no kri hi ri vi riwa wa ngɨzhi Ibrahi ri ye, ritu ika tre zi a Izhi a ti ri Ibrahi nye. Doka wandu Izhi nye wa ngɨzhi ye, ri Musa riwa a he ri tsutsumba. 20 Inji ri tsutsumba ran he ritu riri ran ama Izhi he riri nye.

21 Zizan doka Musa ri kawan ri ka tre zi riwa Izhi? Onhon! Nde nji kpa doka riwa ari kpawa chuwo ko ngaan ran mɨlan son wan ti ran son zhanzhan kusi Izhi. 22 Ama itre Izhi tre ri mgbumgblume he rimi meme ti, ide riwa wa ka tre dzi ritu yo sron Yeso Kristo riwa wa no wawa wa kpa nyɨme. 23 Ama kafi no vi yo sron no ye doka a tre ta zi ka wa bre shitan tse iyo sron riwa ari ye zhuu raa. 24 Imba ki hu doka tse riwa Kristo a ye ritu riwa ki he dindi kusi Izhi ri yo sron. 25 Zizan riwa ivi ri yo sron ri Yeso ye ki ran he riwo doka ngaran.

26 Bi he miri Izhi wawu mbi ri yo sron rimi Yeso Kristo. 27 Ritu biyi wawu wawa wa son yi ri ima rimi Kristo zizan wa suu tsro Kristo ri yi. 28 Itre nji Yahuda ko wawa wa ran to Izhi ran ko gran ri wawa wa ran he gran ran, ko ronron ko mba wawu mbi bi he riri ri Yeso Kristo. 29 Inde bi he wa Kristo bi he wa gɨzhi Ibrahi nga bi kpa kya riwa Izhi ka zi iri ari ti.