1 Ringamba biyi miri vayi, ritu nchon losron Izhi ri ta me bre yi: ka ngambi no Izhi iwawu ka ide ri wu, yo sron mbi rimi ndu wan nga no sisron. Rinyi nye he gbre ri kpunji riwa a he no yi ti. 2 Ran ban tu mbi ka bi he wa mgbumgblume nyi ran, ama no Izhi no sran yi rimi sron mbi ran sran sron mbi. Imba nye bi to ti Izhi nga kya riwa a bi nga bi ri si-u sron nga ran tsra.

3 Ngha ritu de riwa Izhi ka no wen me la kongaa rimi mbi: Ran tika ritu ngambi bran han bibi riwa a he no yi ti ran. tsede bi ka tika ran tsra, nga bi ri bla ri ngambi ri bibi yosron riwa Izhi ka no yi. 4 Ki he ri gbre kigbu rimi kpa riri, nga ko gbre ritan he ri ndu wan. 5 Ri ngamba nye, ko ri riwa ki kigbu, ki he kpa riri rimi kabrutu ri Kristo, nga ki nga ri ngambu ka igbirekankan rimi kpa riri. 6 Ngamba a he riwa ki ti ndu ide kankankan ka bibi ndindi ti riwa Izhi kano ta. Ka ide mbu he riwa ki tre tre Izhi nye, ki ti-u tsra ri bibi yosron riwa ki he ri wu; 7 ka a he riwa ki ti ndu nye, ki ka ti ndu; ka a he riwa ki tsro nye ki ka tsro; 8 ka ide mbu he riwa ki nghɨron wari nye, kika ti-u. Inji riwa ari de kyari ka de ri sron riri; nji riwa a he ri gbengbren no ti ndu ri senkpa; nji riwa a tsro reresron ri wari no ti-u ri srom riri.

9 No Nyime no he kpunji. Ka mbi ri kya riwa a he meme, bi ri vu kya riwa a bi. 10 Nyime ngambi bran ka wa hu Izhi, nga bi ri no ngambi mkpen. 11 Ti ndu bran nga bi ri ran ti sankon ran. Hu Izhi ri sron riri. 12 No yosron mbi no no yi kinklan sron, vu sron rimi kongye riwa ari kpa sron mbi time, nga bi ri ran bre Izhi ran bla vi. 13 Ga wa kpi mbi ri mgbrombi wa hu Izhi, nga bi ri kpa tsren ri ko mbi.

14 Bre Izhi no tilibu sro wawa wa no yi yaa; ran la nyun ri wa ran. 15 Ti kinklan sron ri wawa wa ti kinklan sron, nga bi ri ti shnji sron ri wawa wa ti shnji sron. 16 Kima ngambi he riri ri ko nga. Ran nzu tu ran, ama he ri reresron. Ran ban tu wen ri wu he ri wiwiri ran. 17 Ka injo ti meme ti ri wu, ran ti meme ti zhula ri wu ran. Ti kongye riwa konga ri tre ri a bi. 18 Ti kongye bibi riwa bi kii ri sikpa ri konga. 19 Wa kpan won, ran ti kya zhula ran, tsede no fu Izhi no ti-u ri wu. Ritu Imbe Izhi tre ri, <<Bachi a tre ri wawu ri ti zhula, wawu ri han zhula.>> 20 Tsede, bibi riwa imbe Izhi tre ri,<<I wa kpan fu wen iyon ri ti wa, wuka no wa ri; ka ilama ti wa, no wa ima no wa so; ritu i wu ti nganyi wu no shan ti wa.>> 21 Ran no meme ti no dzan gbengbren wen ran; tsede wu han gbengbren meme ti ri ndindi ti.