1 Nɔ bɛ ŋgie-shʉəŋ-kə nɔ ndə bəkɔ wo mɔ̀ʼfyii-i ndəŋ ghɔ mbɔ kaʼ wo séʼ ndə məbɛ ntəŋbəshʉ mu chɔshi təmə ɔ nɔ séʼ yʉʼ fɔ̀ʼ. 2 Nɔ, ntəŋbəshʉ mu chɔshi nɔ kie ndə bɛ wo ndə bə mə yá nukə kətʉ-ɔ bʉəbʉə fɛ bɔŋleʼ bɛ wo ndə ɔ kie mbyu woke imɔʼ. Ɔ nɔ kie ndə məbɛ wo ndə ɔ tʉʼ kwɔ̀ʼtə nukə jyujyu buŋ fɔ̀ʼ bɔŋleʼ kə́ bɛ wo ndə ɔ̃ yá ŋwɔŋ-ɛŋ. Ɔ nɔ kie ndə məbɛ wo ndə b̃ə kɔ́ kuŋhə tʉ ɔŋ, bɛ wo ndə ɔ̃ chʉ́əʼtə tʉ bʉə-mətòʼ bɔŋleʼ bɛ wo ndə bəkɔ ɔ dàhə. 3 Ɔ kie ndə məbɛ mbuuməndʉʼ fɛ təmə kə́ bɛ wo ndə t̃ʉʉ-i byʉ́ʼ ɔ ŋɛ̀nə ntɔŋntɔŋ fɛ. Ɔ bɔŋ kie ndə məbɛ wo búɔnə, kie ndə məbɛ wo mɔ̀ʼ təchyuu fɛ, təmə bɛ woməntɔ kyʉə fɛ. 4 Ɔ nɔ kie ndə məbɛ wo ndə ɔ̃ lɛ́nə njaa-ɛ jyujyu bɔŋleʼ bɛ wo ndə vâa-bi tʉʼ yʉ́ chu-i, kə́ kɔ́ kuŋhə tʉ ɔŋ, 5 bʉʼka kaʼ wo gòʼ təmə kínə mə lɛ́nə njaa-ɛ fɛ, ɔ bu lɛ́nə bʉə mu chɔshi-Nyii ntɛ təka?

6 Ɔ kie ndə məbɛ wo ndə ɔ bíe bɛ́ŋ Nyii bɛ́ŋ fɛ byuunɔ, təmə bəkɔ ɔ kɔ́ ŋaʼtəkə mbʉə-ɔ, b̈ə yi chʉ̀ə ŋkwɛ-ɛ bʉəbʉə nə yi-Debulu-yə. 7 Ndə məbìʼ gɛ̀ nə shʉbə, ɔ nɔ kie ndə məkie yie jyujyu kəghɔ-bʉə mbi bʉʼka ɔ mə yi kie tʉvyiikə, gwù ndə shʉʼ-Debulu-kə.

8 Bəŋgʉə ghɔ mu chɔshi nɔ kie ndə məbɛ bʉə ndə bɔ̂ŋ kie nuʼ jyujyu, təmə kə́ gìe ŋgiebə ibûu fɛ, təmə kɔ́ ŋwɔŋtə-ʉə ndə ndʉʼ-nu-yɔ́ŋyɔ́ŋ-mə fɛ byuunɔ kə bɔ̂ŋ mə bɛ bʉəməntɔ kɔ́ fyiihə-ʉə ndə nu-kyʉə-kə ndəŋ fia-bʉəbʉə-tə fɛ. 9 Bɔ̂ŋ nɔ kie ndə məyá ŋgie-shʉəŋ-Nyii-kə ndə ɔ nɔʼ kɛ̀ʼ tʉ bɔŋ te məmɔ̀ʼfyii ndəŋ Klai tə́nə chɔ nə ŋkwɔʼtə tʉ́ʉnə. 10 Bə nɔ kie ndə mə-fəŋ-yúotə bɔŋ, kaʼ bɔ̂ŋ tə́nə, b̈ɔ̂ŋ fɔ̀ʼ nə bəŋgʉə.

11 Bəke bəŋgʉə* ghɔ, nɔ kie ndə məkie kuŋhə, təmə kə́ bʉ́əhə yie-bəbɛʼbʉə fɛ, bɔ̂ŋ kie ndə məbɛ bʉə ndə bɔ̂ŋ tʉʼ yá ŋwɔŋ-yʉə, kə́ gìe shʉəŋ ndə nubə nchəŋnchəŋ.

12 Ŋgyʉə mu chɔshi nɔ kie ndə məkie mbyu woke imɔʼ, kə́ lɛ́nə vâa-bʉə ghɔŋbə nchinjaa-yʉə jyujyu. 13 Bʉʼka bəŋgʉə ndə bɔ̂ŋ fɔ̀ʼ jyujyu sii-yʉə nɔ bu bɛ kuŋhə ndə i bu gwè hə kəghɔ-bəbɛʼbʉə bɔŋleʼ sii ndə məkwə́ʼ nə fyii tə̀ŋnə te məmɔʼfyiihə-ʉə ndəŋ Klai Jiso.

14 Mɔ nɔ tʉʼ kwɔ̀ʼtə mbɔ kʉʉkə məniʼ m̈ɔ gwè nyíɛ aŋ, mɔ bɔŋ kə́ nyɔ̀ʼ nubə-ɔ̄ŋ tʉ a mbɔ, 15 kaʼ mɔ tùu, a kínə ntɛ ndə wo kie ndə məlʉ̀ ŋwɔŋ-ɛŋ mu njaa-Nyii, ndə bɛ chɔshi-Nyii ndə ɔ bɛ ghɔ, bɔŋ-kə́-leʼ bɛ mbʉ ntəʼə ghɔŋbə yiesê ndə i tɔ́ŋ mbʉ shʉəŋ. 16 Kɛŋ leʼ shʉəŋ, ntɛ-ŋguu-hə ndə bə kə lə̀ŋ hə kəghɔ-bʉʼʉ bə bɔŋ nɔʼ kɛ̀ʼ nduɔ te məchímbi ndə ntɛ ndə ĩ kɔ́ kuŋhə tʉ Nyii nɔ fɔŋ ɛŋ. I nɔ bɛ mbɔ,

Jiso nɔ nə kɛ̀ʼ ŋwɔŋ-ɛŋ ndə woməsʉʉ,

LyʉʉhəNyiikə nɔ kə dʉ̀ʼ mbɔ ɔ la bɛ ndyʉndyʉ.

BʉəntəŋNyii nyíɛ ɔŋ,

bə lɔ̀ʼ yie-e mu lɔʼ-bətə̂ŋ-tə.

Bʉə buŋmbi bɛ́ŋ ɔŋ mu kəwʉʉnəmbi,

bə lʉ̀ ɔ kóʼ gɛ̀ nə nɔŋ kəyəŋ məgʉ́ə.