1 Timóteo 6

1 Bʉə ndə bɔ̂ŋ nɔʼ bɛ́ŋ Nyii kə́ bɛ fʉəhə nɔ kie ndə məkɔ́ kuŋhə inchəŋ tʉ bətiefɔʼɔ-bʉə, bʉʼka bə mə-kə́-kwə́ʼ bʉəbʉə te yie-Nyii ghɔŋbə nubə ndə bʉʼʉ tʉʼ dàhə. 2 Bʉə ndə bɔ̂ŋ kie bətiefɔʼɔ-bʉə kə́ bɛ bʉə ndə bɔ̂ŋ nɔʼ bɛ́ŋ Nyii mə kə́ kwɔ̀ŋhə bɔŋ bʉʼka bɔ̂ŋ nɔʼ bɛ́ŋ Nyii ghɔ fɛ. Bɔ̂ŋ nɔ kie ndə mə-kə́-buŋ-fɔ̀ʼ tʉ bɔŋ jyujyu, bʉʼka bʉə ndə bɔ̂ŋ bu sii ndəŋ fɔʼtə-ʉə nɔ bɛ bʉə ndə bɔ̂ŋ nɔʼ bɛ́ŋ Nyii ghɔ, bɔ̂ŋ bɔŋleʼ kʉ̀ʉ bɔŋ daa.

Mədàhə nubə nə mbii leʼnə ŋkɛŋ kəfʉʼ

Dàhə ŋgie-shʉəŋ-bə-ɔ̄ŋ bɔŋleʼ kwèʼhə bʉə bənchəŋ ndə mətʉ́ʼ. 3 Kaʼ wo kə́ dàhə yi-kədɔŋ-yə, ndə i gòʼ təmə gɛ̀ ghɔŋbə ŋgie-kʉ̀ʼnə-bə ndə Jiso Klai Tiekətʉ-yʉʼʉ tʉʼ dàhə fɛ ghɔŋbə yi ndə i tʉʼ dàhə bʉʼʉ ndə məchí mbi ndə ntɛ ndə i bu kɔ́ kuŋhə tʉ Nyii fɛ, 4 təmə ɔ nɔ tʉʼ wùʼhə ŋwɔŋ-ɛŋ nə tʉʉ gʉənə təmə kínə nubɛʼkə fɛ. Ɔ nɔ tʉʼ mʉ̀ʉ nubə ndə i gòʼ təmə bʉ̀ʉ fɛ bɔŋ kə́ gwè nə bəŋʉʉ ghɔŋbə chyuutə te ŋgiebə, ndə i tʉʼ gwè nə məbàabʉʉ, ntɔŋntɔŋ, məbʉ́əhə yie-bʉə, leʼnə mə-kə́-ya nu-bʉəbʉə-bə kətʉ bʉə ndə i gòʼ təmə bɛ shʉəŋ fɛ, 5 leʼnə bəŋʉʉ təvɛʼtəvɛʼ ndə i tʉʼ gwè hə kəghɔ-bʉə ndə bə nɔʼ bʉ́əhə ndaahə-ʉə, təmə bɔ̂ŋ leʼ kie shʉəŋ fɛ. Bɔ̂ŋ nɔ kwɔ̀ʼtə mbɔ mə-kə́-chí mbi ndə ntɛ ndə ĩ kɔ́ kuŋhə tʉ Nyii nɔ bɛ fia ndə məkie kyʉə yɔ́ŋyɔ́ŋ.

6 Mə-kə́-chí mbi ndə ntɛ ndə ĩ kɔ́ kuŋhə tʉ Nyii nɔ chìi bʉʼʉ ndə məbɛ bʉə-kəfʉʼ, kaʼ tʉʉ-yʉʼʉ kə́ bʉ̀ʉ ndə fɔkə təmiyɔŋ ndə bʉʼʉ kie, 7 bʉʼka bʉʼʉ kə gwè nə fɔkə kəwʉʉnəmbi fɛ, təmə bʉʼʉ bɔŋ mə leʼ lʉ̀ fɔkə kəwʉʉnəmbi gɛ̀ nə yɔŋ fɛ. 8 Bɔŋ kaʼ bʉʼʉ kie fɔyubə ghɔŋbə ndyi ndə məmɔ̀ʼ mbʉə-bʉʼʉ, tʉʉ-yʉʼʉ kə́ bʉ̀ʉ. 9 Bɔŋ bʉə ndə bɔ̂ŋ kʉ̀ʉ fʉʼkə nɔ tʉʼ gwù mu nubə ndə i mùutə wo mbɔ ɔ gwù mu bʉ̂ʼʉ, kwú ndəŋ ŋkʉʼ nə nyaahə, bɔ̂ŋ nɔ tʉʼ leʼ kie ntɔmə ndəŋ fia-bənɔ̌ʼɔ-tə buŋmbi ndə bəkɔ i lə́ŋhə bɔŋ, chìi b̈ɔ̂ŋ byʉ́ʼ bɛ́ njʉnjʉ. 10 Bʉʼka ntɔ-kyʉə-mə nɔ bɛ fia ndə i gwè nə ntɛ-bənu-bʉəbʉə-hə inchəŋ. Bʉəbɛʼbə ndə bɔ̂ŋ kie ntɔmə-maa-ɔ̄ŋ fyii-bɔŋ, bɔ̂ŋ nɔʼ mɛ̀ʼtə ndə mə-leʼ-mɔ̀ʼfyiihə-ʉə ndəŋ Nyii, nɔʼ shùɔ ŋwɔŋ-yʉə nə ŋgʉəʼ yɔ́ŋyɔ́ŋ.

Ndyiʼtə-tʉ̂ʼ-Bɔɔ-kə

11 Bɔŋ tʉ mbəŋ-aŋ, wo-Nyii, nyʉ́ʉ nubə-ɔ̄ŋ. Kə́ kɔ̀ɔtə ndə məbɛ ndyʉndyʉ kə́-leʼ-chí mbi ndə ntɛ ndə i tʉʼ kɔ́ kuŋhə tʉ Nyii, mɔ̀ʼfyii-a ndəŋ Nyii, kie ŋkʉ̂ʉ, lyʉ̀ʉtə́nə, bɔŋleʼ kie mbuɔnəbə. 12 Gwúu yʉʼ byuʼu məmɔ̀ʼfyii ndəŋ Nyii. Bɔŋleʼ yá məchímbi təmə liʼ-i ghɔ fɛ tə́nə chɔ shʉ́əshʉ́ə ndə Nyii kə tíi a chɔ ndə a kə kwə́ʼ jyujyu te yɔŋ bəshʉ bʉə buŋmbi. 13 Mɔ nɔ tʉʼ kàhə a bəshʉ Ñyii, ndə ɔ kɔ́ məchímbi tʉ fɔbə inchəŋ, leʼnə Klai Jiso, ndə ɔ kə kwə́ʼ shʉəŋ ntaa ndʉʉ ndə ɔ kə bɛ bəshʉ Bɔŋtio Bale, 14 mbɔ ä tʉ́ʼ ŋkahə Nyii təmə kə́ nyàatə fɛ təmə bə kie nukə ndə məgìe te a bʉəbʉə fɛ tʉ Jiso Klai Tiekətʉ-yʉʼʉ yi kɛ̀ʼ ŋwɔŋ-ɛŋ. 15 Məgwe-e bu bɛ ndə ndʉʉ ndə Nyii dʉ̀ʼ, ndə ndʉʉ kʉ̀ʼnə. Nyii nɔ bɛ Nyii tʉʉjyu, kə́ gìe kətʉ fɔbə inchəŋ, kə́ bɛ Fɔŋ bəfɔŋ bɔŋleʼ kə́ bɛ Tiekətʉ bətiekətʉ. 16 Nɔ bɛ haʼ mbəŋ-ɛŋ tətɛʼ ɔ ndə ɔ məkwú fɛ, kə́ chí kəyəŋ ndə kɛʼɛ bɛ chɔ təmə wo mə nə kə́ŋhə mbʉə ghɔ fɛ. Wo chʉʼ nə nyíɛ ɔŋ fɛ, təmə wo bɔŋ bɛ ghɔ ndə bəkɔ ɔ nyíɛ ɔŋ fɛ. Kuŋhə leʼnə ghʉəʼkə təmə liʼ-i ghɔ fɛ bɛ yi-yə. Ï bɛ haʼ nɔ.

17 Kàhə bʉə ndə bɔ̂ŋ kie fʉʼkə ndə fɔ-kəwʉʉnəmbi-bə-ɔ̄ŋ mbɔ bɔ̂ŋ mə kə́ dʉ̀ʼ tʉʉ gʉənə fɛ byuunɔ yʉ́əʼnə ndəŋ fʉʼkə ndə i mə tə́nə fɛ, b̈ɔ̂ŋ bɔŋ mɔ̀ʼfyiihə-ʉə bə ndəŋ Ñyii ndə ɔ tʉʼ kɔ́ fʉʼkə tʉ bʉʼʉ ndə fɔbə inchəŋ ndə i kɔ́ tʉʉjyu tʉ bʉʼʉ. 18 Kàhə bɔŋ ndə mə-kə́-fɔ̀ʼ fɔʼɔ-jyujyu-tə, ndə məkie fʉʼkə ndə fɔʼ-jyujyu-tə, kə́ leʼ yɔ̀ʼ ghɔkə-ʉə, gyʉ̀ə fɔbə ndə bɔ̂ŋ kie kɔ́ yi-bəbɛʼbʉə-yə. 19 Kaʼ bɔ̂ŋ kə́ fɔ̀ʼ nɔ, bɔ̂ŋ kə́ lə̀ŋ fʉʼkə ndə i bu bɛ yʉʼ yiesê tʉ bɔŋ ndə mbi ndə i tʉʼ gwè, mbɔ bɔ̂ŋ chʉʼ kie məchímbi ndə bɛ ŋkɛŋ ɛŋ.

20 Timɔti, shʉ̀tə yá fɔkə ndə bə nɔʼ kə chɔ̀ʼhə kɔ́ tʉ a ndə ya-yə. Bìa ŋwɔŋ-aŋ ndə kwə́ʼ kənjuɔnə ndə i gòʼ təmə kə́ kɔ́ kuŋhə tʉ Nyii fɛ. Bɔŋleʼ fyúhə ŋwɔŋ-aŋ mbʉə bʉə ndə bɔ̂ŋ tʉʼ ghɔ̀ŋ mbɔ bɔ̂ŋ kie ndaa bɔŋ kwəʼ-yʉə kə́ bʉ̀nə gɛ̀ ŋkʉʉ. 21 Bəbɛʼbʉə nɔʼ mɔ̀ʼ nubə ndə bʉə mɔ̀ʼfyiihə-ʉə chɔ bɛ́ bʉʼka bɔ̂ŋ nɔ kə́ gɛ̀ hə bɔ̌ŋ fia-bənɔ̌ʼɔ-maa-tə-ɔ̄ŋ.

N̈yii dʉ̀ʼ buuŋjyu-i tʉ bii bənchəŋ.