1 Bəliŋ-baʼa, mbəŋ-yii nɔ kínə mbɔ məgwè ndə baʼa kə gwè nyíɛ bii kə bɛ njʉnjʉ fɛ. 2 Bii nɔ nə kínə ntɛ ndə bə nɔʼ kə kɔ́ ŋgʉəʼ tʉ baʼa bɔŋleʼ mɔ̀ʼ tʉvyiikə-aʼ mu Filibai baʼa buŋ gwè tʉ bii mu Tɛsalonika. Bɔŋ ndə bə kə chɔ́ŋhə baʼa yɔ́ŋyɔ́ŋ, Nyii-yʉʼʉ kɔ́ baʼa nə fyii ndə məshyíi bii nə ntəŋjyujyu ndə i gwè hə kəghɔ-ɔ. 3 Bʉʼka məkwèʼhə ndə baʼa kə kwèʼhə bʉə kə bɛ mɔ̀ʼmbɛ fɛ byuunɔ i kə bɛ ndə luu bʉəbʉə fɛ, byuunɔ baʼa nə kə́ kɔ̀ɔtə ndə məfə́ʼhə wo fɛ, 4 baʼa bɔŋ nɔ nə kə́ kwə́ʼ haʼ ndə Nyii kə kʉ̀ʉ mbɔ baʼa kwə́ʼ, bʉʼka mbɔ ɔ nɔ nə lɛ́nə baʼa, baʼa kʉ̀ʼnə ndə məkɔ́ mbʉ ntəŋjyujyu tʉ baʼa. Baʼa kə́ kwə́ʼ ndə məchìi tʉʉ woməsʉʉ bʉ̀ʉ fɛ, bɔŋ bə ndə məchìi tʉʉ-Nyii bʉ̀ʉ ndə ɔ kə kíi ŋkwɔʼtə-yaʼ. 5 Bii nɔ kínə jyujyu mbɔ baʼa kə gwè tʉ bii nə ŋgie-ndoʼtə-bə ndə məfə́ʼhə bii fɛ, byuunɔ gwè nə ŋgiebə ndə mə bɔ̀ŋ ntɔmə-aʼ chɔ fɛ. Bəkɔ Nyii nú gwù yaʼ. 6 Baʼa kə́ kʉ̀ʉ məgʉ́ə bə kəghɔ-woməsʉʉ fɛ, təkɔmə mbəŋ-yii byuunɔ bəbɛʼbʉə fɛ, 7 buŋ ndə bəlɔntəŋ-Klai, baʼa nɔ kə kie ndə məbíʼtə hə kəghɔ-bii, baʼa bɔŋ nɔ kə bɛ nə vâambuɔ mu bii. Ndə ŋkwê vaa ndə ɔ tʉʼ nyùuhə bɔŋleʼ lɛ́nə vâa-bi, 8 nɔ, bʉʼka ŋkʉ̂ʉ ndə baʼa kə kie tʉ bii daa, fyiihə-aʼ kə bʉ̀ʉ ndə məgyʉ̀ə bə haʼ ntəŋjyujyu tʉ bii ndə i gwè hə kəghɔ-Nyii fɛ, i kə bʉ̀ʉ ghɔ ndə məgyʉ̀ə məchimbi-yaʼ bʉʼʉ bʉʼka baʼa nɔ kə kʉ̀ʉ bii daa.

9 Ndə ŋgie-shʉəŋ-kə, bəliŋ-baʼa, bii kwɛ́nə ntɛ ndə baʼa kə fɔ̀ʼ bɔŋleʼ nyíɛ ŋgʉəʼ. Baʼa nɔ nə kə́ fɔ̀ʼ ndʉʉnəchî ghɔŋbə ndʉʉbətyuʼ bʉʼka mə yi bɛ bɛʼkə tʉ wotəmiyɔŋ, ndə baʼa kə́ lɔ̀ʼ ntəŋjyujyu-Nyii. 10 Bəkɔ biibə Nyii nú gwù-yaʼ mbɔ ntɛ ndə baʼa kə lʉ̀ ŋwɔŋ-yaʼ mu bii ndə bii nɔʼ bɛ́ŋ Nyii, baʼa nɔ nə tʉ́ʼ ŋwɔŋ-yaʼ tʉ́ʉnə, bɛ ndyʉndyʉ, təmə kie kwɔtəkə mbʉə-baʼa fɛ. 11 Bii nɔ kínə mbɔ baʼa nɔ nə lʉ̀ wotəmiyɔŋ mu bii haʼ ndə tie-vaa lʉ̀ vâa-bi le. 12 Baʼa nɔ nə kə́ kwèʼhə bii, kə́ yá fyiihə-ii, kə́ lyuu bii mbɔ b̈ii kie ntɛ məchímbi ndə i bu kʉ̀ʼnə tʉ Nyii, ndə ɔ tíi bii mu sɔ́ʼ-ɛ ndə məgwè lʉ̀ yi-yə yʉʉ mu məgʉə-e.

13 Baʼa bɔŋ kə́ kɔ́ ndɔ təvɛʼtəvɛʼ mbɔ ndʉʉ ndə bii kə yʉ́ ntəŋ-Nyii, ndə bii kə yʉ́ hə kəghɔ-baʼa, bii bɛ́ŋ, təmə bɛ́ŋ bə ndə ntəŋ ndə i gwè hə kəghɔ-woməsʉʉ fɛ, bɔŋ lʉ̀ ndə ntəŋ ndə i gwè hə kəghɔ-Nyii, ndə i kɛŋ bɛ yɔŋ. Ŋgiekə-ɔ̄ŋ bɔŋ nɔ tʉʼ leʼ fɔ̀ʼ mu mbʉə-bii ndə bii nɔʼ bɛ́ŋ Nyii. 14 Bəliŋ-baʼa, ntɛ-kənu ndə i kə fyú tʉ bii nɔ bɛ haʼ ntɛ ndə i kə fyú tʉ bəchɔshi-Nyii mu Judia ndə bɔ̂ŋ bɛ mu Klai Jiso. Bii nɔ nə nyíɛ mbʉ ntɛ-ŋgʉəʼ ndə bɔ̂ŋ kə nyíɛ kəghɔ-bʉə-Juu. 15 Bʉə-Juu-bɔ̄ŋ, bɔ̂ŋ nɔ nə yí Tiekətʉ ndə bɛ Jiso ghɔŋbə bʉəyʉkəŋgieNyii, jə̀ŋ baʼa fyúhə mu bɔŋ bɔŋleʼ chìi tʉʉ-Nyii byʉ́ʼ. Bɔ̂ŋ bɔŋleʼ chyʉ́nə tʉ bʉə bənchəŋ. 16 Bɔ̂ŋ kə́ byùutə baʼa ndə məkwə́ʼ tʉ bʉə ndə bɔ̂ŋ gòʼ təmə bɛ bʉə-Juu fɛ, bʉʼka Nyii mə yi kwáa bɔŋ. Nɔ bɛ ntɛ nɔ ndə bɔ̂ŋ kóʼhə bʉ̂ʼʉ ndəŋ bɔŋ tə i dìenə tə daa ndəŋ fʉʼ ndə Nyii nɔʼ kə shʉ̀tə. Bɔŋ kə̂lìʼtə, tʉʉbʉə-shʉ́əshʉ́ə-Nyii nɔʼ shíʼ ndəŋ bɔŋ ntaa.

17 Ndə baʼa, bəliŋ-baʼa, ndʉʉ ndə bə kə wɔ̀ʼtə baʼa mbʉə bii ndə kʉʉkə məniʼ, nə mbʉəhə-ʉʼʉ təmə bɛ nə ŋkwɔʼtə fɛ, baʼa kə́ gwía ndə baʼa nɔʼ bɛ́ bii, kə́ kɔ̀ɔtə mbɔ bʉʼʉ bʉ̀nə bìʼ nyíɛnə shʉtə-ʉʼʉ. 18 Baʼa nɔ nə kə́ kʉ́ʉ ndə məbʉ̀nə bìʼ gwè nyíɛ bii, mɔ nə mbəŋ-ɔŋ Bɔɔ, kɔ̀ɔtə tə bìʼ kɔ̀ɔtə, təmə Sata bɔŋ mɛ̀ʼtə baʼa chɔ fɛ. 19 Bʉʼka fɔkə ndə baʼa tʉʼ yʉ́əʼnə ndəŋ ghɔ byuunɔ tʉʉjyu-yaʼ byuunɔ ŋgʉʼʉ-yaʼ ndə baʼa bu nə kwɛ̀ŋ fyiihə-aʼ chɔ ndʉʉ ndə Jiso Tiekətʉ-yʉʼʉ bu yi bʉ̀nə gwè chɔ, bɛ ka? Kaa bii fe? 20 Bʉʼka bii nɔ bɛ məgʉə-yaʼ leʼnə tʉʉjyu-yaʼ.