1 Ndə məlìʼtə ndʉʉmɛ, bəliŋ-baʼa, baʼa nɔ tʉʼ fʉ̀ʉtə bii bɔŋleʼ kə́ kwèʼhə bii yie-Jiso Tiekətʉ mbɔ haʼ ndə bii nɔʼ kə yétə kəghɔ-baʼa ntɛ ndə bii kie ndə mə-kə́-chí mbi ndə məkɔ́ tʉʉjyu tʉ Nyii, haʼ ndə bii tʉʼ chìi, b̈ii kə́ fɔ̀ʼ haʼ nɔ tə buŋ biʼ fɔ̀ʼ yɔ́ŋyɔ́ŋ. 2 Bii nɔ kínə nukə ndə baʼa kə kàhə bii tíŋ hə bɔ̌ŋ Jiso Tiekətʉ. 3 Nyii nɔ kʉ̀ʉ mbɔ bii bɛ ŋkʉʉ, bii kɛŋ bìa ŋwɔŋ-yii ndə ntɛ-bəsəŋ-hə inchəŋ. 4 Ɔ nɔ kʉ̀ʉ mbɔ ẅo bii təmiyɔŋ kínə ntɛ ndə ɔ kie ndə mətʉ́ʼ ŋwɔŋ-ɛŋ* bɛ ŋkʉʉ bɔŋleʼ kie kuŋhə chɔ. 5 Ɔ kie ndə məkie ntɔmə fyii-ɔ yɔ́ŋyɔ́ŋ ndə məchí ghɔŋ ibɛʼ-yə wo ndə bʉə ndə bɔ̂ŋ gòʼ təmə bɛ bʉə-Juu fɛ təmə kínə Nyii fɛ. 6 Ndə nukə-ɔ̄ŋ, kə wo məmɔ̀ʼ bɛ́ tʉ liŋ-iŋ byuunɔ yú ɔ chɔ fɛ bʉʼka Tiekətʉ nɔ bɛ wo ndə ɔ bu bʉ̀nə tyú nubə-ɔ̄ŋ inchəŋ haʼ ndə baʼa nɔʼ kə́ shyíi bii, bɔŋ kə́ bìʼ shyùu tyunəkə-ii. 7 Bʉʼka Nyii kə tíi bʉʼʉ ndə mə-kə́-nyàatə ŋwɔŋ fɛ bɔŋ mbɔ b̈ʉʼʉ bɛ ŋkʉʉ. 8 Nɔ, wo ndə ɔ tɛ́ŋ nukə-ɔ̄ŋ tʉʼ tɛ́ŋ bə woməsʉʉ fɛ, ɔ nɔ tʉʼ tɛ́ŋ bə Nyii ndə ɔ kɔ́ Lyʉʉhəkə-i tʉ bii.

9 Nduɔ, te ŋkʉ̂ʉ tʉ bəliŋ-bii, wo leʼ kie ndə mə-kə́-nyɔ̀ʼ tʉ bii fɛ, bʉʼka Nyii nə mbəŋ-ɛŋ nɔʼ dàhə bii ndə məkʉ̀ʉ ŋwɔŋtə-ii. 10 Bɔŋ kə́ bɛ ntɛ ndə bii tʉʼ fɔ̀ʼ tʉ bʉə ndə bɔ̂ŋ nɔʼ bɛ́ŋ Nyii bənchəŋ mu Masɛdonia, baʼa bɔŋ-kə́-leʼ kwèʼhə bii, bəliŋ-baʼa, mbɔ b̈ii bìʼ fɔ̀ʼ yɔ́ŋyɔ́ŋ, 11 kə́ kɔ̀ɔtə ndə mədùʼ məchəŋ, ẅo kə́ gwía yi-yə tʉkə, kə́ fɔ̀ʼ nə ghɔkə-i haʼ ndə baʼa kə mɔ̀ʼ tʉ̂ʼ tʉ bii. 12 Kaʼ bii kə́ chìi mənɔ, bii kie yie jyujyu kəghɔ-bʉə ndə bɔ̂ŋ gòʼ təmə nɔʼ bɛ́ŋ Nyii fɛ, bii bɔŋleʼ kie ndə mə-kə́-yʉ́əʼnə ndəŋ wo ndə məchimbi-yii fɛ.

13 Bəliŋ-baʼa, baʼa nɔ tʉʼ kʉ́ʉ mbɔ bii kínə shʉəŋ te bʉə ndə bɔ̂ŋ nɔʼ kwútə bʉʼka bii mə gòʼ vínəvínə ndə bʉə ndə bɔ̂ŋ gòʼ təmə kie yəŋkə ndə məyʉ́əʼnə ndəŋ ghɔ fɛ. 14 Bʉʼka bʉʼʉ bɛ́ŋ ŋgie-shʉəŋ-kə mbɔ Jiso kə kwú bʉ̀nə kóʼ, bʉʼʉ nɔ bɛ́ŋ ghɔ mbɔ tíŋ hə bɔ̌ŋ Jiso Nyii bu bʉ̀nə gwè nə bʉə ndə bɔ̂ŋ nə kə kwútə nɔʼ kə mɔ̀ʼfyiihə-ʉə ndəŋ ɔŋ.

15 Nukə ndə baʼa tʉʼ dàhə bii chɔ nduɔ, nɔ bɛ ŋgiekə ndə i fyú hə chu-Tiekətʉ, mbɔ bʉʼʉ ndə bʉʼʉ bu yi bíe mbi ndəŋ chîkə ndə Tiekətʉ bu bʉ̀nə gwè chɔ, kʉʉ fəŋ gɛ̀ bəshʉ bʉə ndə bɔ̂ŋ nɔʼ kwútə bɔ̂ŋ buŋ yi bìatə fɛ. 16 Bʉʼka Tiekətʉ nə mbəŋ-ɛŋ bu shíʼ gwè hə yuo nə gyʉʉ sɔ́ʼ kəyəŋ, nə gyʉʉ-wontəŋkwɛʼtəŋNyii, bə bɔŋleʼ tʉ́ʉ gyʉəʼə-Nyii. Ndʉʉ-ghɔ̄ nɔ, bʉə ndə bɔ̂ŋ kə bɛ́ŋ Klai buŋ kwú, bu fəŋ kóʼ. 17 Ndʉʉmɛ, bʉʼʉ ndə bʉʼʉ bíe ŋɛnə, bə buŋ jɔ̀ bʉʼʉ bɔŋ mɔʼɔ mu kəmbɔʼ bʉʼʉ bɔŋ bìatə Tiekətʉ mu yuo. Nɔ, bʉʼʉ bu bɛ bʉʼʉbə Tiekətʉ chɔ gɛ̀gɛ̀. 18 Nɔ, b̈ii kwèʼhə ŋwɔŋtə-ii nə ŋgiebə-ɔ̄ŋ.