1 Bii nɔʼ kə fəŋ kwú mu mɔ̀ʼmbɛ ghɔŋbə bʉ̂ʼtə 2 ndə bii kə fəŋ tə́nə chɔ, kə́ tòʼ ndəŋ fia-kəwʉʉnəmbi-tə, kə́ chìi nubə gɛ̀ hə bɔ̌ŋ fɔŋ-wokwɛʼtəŋ-kəlyʉʉhəbʉəbʉə ndə ɔ tʉʼ sɔ́ʼ lyʉʉhəbʉəbʉəbə mu yuo, kə́ bɛ ntɛ kəlyʉʉhə ndə i tʉʼ fɔ̀ʼ mu mbʉə bʉə ndə bɔ̂ŋ tʉʼ kwɛ̀ŋhə tʉ Nyii. 3 Bʉʼʉ bənchəŋ nɔʼ nə bɛ haʼ ndə bɔŋ, kə́ fɔ̀ʼ nubə ndə bɔ̂ŋ tʉʼ fɔ̀ʼ bʉʼka ntɔmə ndə i kə bɛ mu fyii-bʉʼʉ, kə́ fɔ̀ʼ nubə ndə mbʉə-yʉʼʉ kʉ̀ʉ ghɔŋbə ndaahə-ʉʼʉ, bʉʼka yɔ̄ŋ-yə, bʉʼʉ nɔ nə kie ndə mənyíɛ ŋgʉəʼ bʉʼka tʉʉbʉə-Nyii haʼ ndə bəʼ-bʉəməsʉʉ-kə, kə kie ndə mənyíɛ. 4 Bɔŋ bʉʼka Nyii kie tʉvyiikə daa, bʉʼka ŋkʉ̂ʉ yɔ́ŋyɔ́ŋ ndə ɔ kʉ̀ʉ bʉʼʉ chɔ, 5 buŋ ndʉʉ ndə bʉʼʉ nɔʼ kə kwú mu bʉ̂ʼtə-ʉʼʉ, ɔ chìi bʉʼʉ bʉ̀nə kie məchímbi bʉʼʉbə Klai, bʉʼka buuŋjyu bə nɔʼ kwáa bii. 6 Ɔ chìi bʉʼʉ bʉ̀nə kóʼ kie məchímbi bʉʼʉ bɔŋ, dùʼhə bʉʼʉbə Klai Jiso mɔ̀ʼ mu njəŋ-yuo-hə. 7 Ɔ nɔ kə chìi yɔ̄ŋ-yə mbɔ kʉ̂ʉ bɛ ndə mbi inchəŋ ndə i bíe bəshʉ gwè nɔ, bʉə chʉʼ nyíɛ ndə ɔ nɔʼ dʉ̀ʼ fɔŋ buuŋjyu-i tʉ bʉʼʉ təmə liʼ-i ghɔ fɛ nə nuʼ jyujyu tíŋ hə bɔ̌ŋ Klai Jiso. 8 Bʉʼka buuŋjyu-Nyii ndə ɔ dʉ̀ʼ tʉ bii, nɔ kwáa yɔŋ kwáa bii bʉʼka bii mɔ̀ʼfyiihə-ii ndəŋ Jiso Klai. Kaa fɔʼɔ-yii fɛ, nɔ kɔ-Nyii-kə, 9 kaa bə bʉʼka fɔ̀ʼ fɛ bʉʼka wo mə yi kə́ kwɛ̀ŋ fyii-i. 10 Bʉʼʉ nɔ bɛ ghɔ-fɔ̀ʼ-Nyii-kə, ndə ɔ chìi, bʉʼʉ bɛ fefe tíŋ hə bɔ̌ŋ Klai Jiso mbɔ bʉʼʉ kə́ fɔ̀ʼ fɔʼɔ-jyujyu-tə ndə ɔ nɔʼ kə shʉ̀tə bəshʉ tʉ bʉʼʉ ndə məfɔ̀ʼ.

11 Kə bii mə lèʼnə mbɔ mbəŋ-yii ndə bə kə bí bii təmə bii kə bɛ bʉə-Juu fɛ, bʉə ndə bə gòʼ təmə nɔʼ fɔ̀ʼ bɔŋ fɛ, kə́ tíi bii nə "bʉə ndə bə nɔʼ fɔ̀ʼ bɔŋ" buŋ ndə nɔ, nɔ nə bɛ nukə ndə bə fɔ̀ʼ mbʉə-bɔŋ nə ghɔ-woməsʉʉ-kə. 12 B̈ii kə́ kwɛ́nə mbɔ kə bɛ ndʉʉ-ghɔ̄ le, biibə Klai kə bɛ mɔʼɔ fɛ, bə nɔʼ kə fyúhə bii mu bʉə-Nyii, bʉə-Isilɛ, bii kə kie nukə ndə məchìi mu ŋkaa-Nyii-mə ndə i kə kie ŋkɔʼnə muŋgɔ fɛ, bii kə́ chí mu kəwʉʉnəmbi nə bʉə ndə bɔ̂ŋ kie yəŋ-yʉ́əʼnə-kə fɛ təmə kínə Nyii fɛ. 13 Bɔŋ nduɔ, mu Klai Jiso mbəŋ-yii ndə bii kə fəŋ bɛ dɔdɔ, nɔ bɛ ŋkəŋŋkəŋ bʉʼka fɔbʉəkə-i.* Bəkɔ bə kíahə yəŋkə-ɔ̄ŋ ghɔ mbɔ bʉʼka kwu-i ndə i kə fɛ̀ʼndɛŋ kətʉ-bʉʼʉ.

14 Bʉʼka nɔ bɛ mbəŋ-ɛŋ bɛ fyiighʉ́ənə-yʉʼʉ, ndə ɔ nɔʼ chìi bʉʼʉ bəbûu, bɛ mbyu wo-imɔʼ bə́ʼtə lʉʉ-búɔ-kə ndə i kə wɔ̀ʼtə bʉʼʉ nə kwu-i. 15 Ɔ byùutə ŋkʉʉŋkʉʉ ndə i kə bɛ mu bʉʼʉ nə kwu, ndə i gwè bʉʼka nuʼ-bʉə-Juu ghɔŋbə bəŋkahə-bi leʼnə bɛŋtə-i, mbɔ ɔ chʉʼ chìi wo fefe imɔʼ ndə nuɔ-bʉə-tə ibûu ndə məgwè nə fyiighʉ́ənə mu bɔŋ. 16 Tíŋ hə bɔ̌ŋ kwu-i ndə ɔ kə kwú ndəŋ tyʉntɔɔnəkə, ɔ yí ŋkʉʉŋkʉʉ ndə i kə bɛ mu bʉʼʉ, chìi bʉʼʉ fúu ŋwɔŋ-yʉʼʉ ndə məbɛ mbyu wo-imɔʼ bɔŋleʼ fúu bʉʼʉbə Nyii. 17 Ɔ gwè lɔ̀ʼ ntəŋjyujyu ndə ĩ gwè nə fyiighʉ́ənə tʉ bii ndə bii kə bɛ dɔdɔ leʼnə bʉə ndə bɔ̂ŋ bɛ ŋkəŋŋkəŋ. 18 Tíŋ hə bɔ̌ŋ mbəŋ-ɛŋ, bʉʼʉ bənchəŋ nɔʼ kie fia ndə məgɛ̀ tʉ mbʉ Tie nə Lyʉʉhəkə imɔʼ.

19 Nɔ nduɔ, mbəŋ-yii ndə bii gòʼ təmə bɛ bʉə-Juu fɛ, leʼbie bʉə-mətòʼ fɛ, təmə kə́ bɛ ndɔ-fɔŋ-kə fɛ. Bɔŋ bii nɔ bɛ vâa sê lɔʼɔ bii bəbʉə ndə bɔ̂ŋ nə bɛ bʉə-Nyii leʼnə nchinjaa-Nyii-hə. 20 Bii nɔ bɛ njaa-ɛ ndə bə bɔ́ŋ ndəŋ yiesê ndə bɛ bəlɔntəŋ-bi ghɔŋbə bʉəyʉkəŋgieNyii-bi ndə Klai Jiso nə mbəŋ-ɛŋ bɛ mbʉ ŋgoʼ-fûu-njaa. 21 Mbʉ bəsɔʼɔ njaa inchəŋ nɔ gwè fú ndəŋ ɔŋ, kóʼ bɛ njaafɛ̀ʼndɛŋNyii ndə i bɛ ŋkʉʉ tʉ Tiekətʉ. 22 Tíŋ hə bɔ̌ŋ mbəŋ-ɛŋ, bii bɔŋ ghɔŋbə bəbɛʼbʉə nɔʼ fúu ŋwɔŋ-yii bɔŋ ndə məbɛ njaa ndə Nyii bu kə́ chí muŋgɔ nə Lyʉʉhəkə-i.