1 Ndʉʉghɔfii, mbəŋ-ɔŋ ndə mɔ bɛ wo-njaa-chaŋ Tiekətʉ bʉʼka mɔ tʉʼ fɔ̀ʼ tʉ ɔŋ, nɔ tʉʼ kwèʼhə bii mbɔ məchimbi-yii kə́ gɛ̀ haʼ nukə imɔʼ ghɔŋbə fia ndə bə kə tíi bii ndə mətə́nə chɔ. 2 B̈ii lʉ̀ ŋwɔŋ-yii sê ndə ntɛhə inchəŋ ghɔŋbə buɔnəbə, bɔŋleʼ kə́ yá fyii, kə́ bɛ́ŋ wotəmiyɔŋ ndə ntɛhə ndə ɔ bɛ ndə mədʉ̀ʼ ŋkʉ̂ʉ-a tʉ ɔŋ. 3 B̈ii kə́ kɔ̀ɔtə ndə məfúu ŋwɔŋ-yii mu LyʉʉhəNyiikə nə fyiighʉ́ənə.

4 Bʉʼʉ nɔ bɛ mbʉə imɔʼ bɔŋleʼ kie LyʉʉhəNyiikə imɔʼ, haʼ ndə bɛ mbyu kənu imɔʼ ndə məyʉ́əʼnə ndəŋ ghɔ ndʉʉ ndə Nyii kə tíi bii. 5 Nɔ bɛ mbyu Tiekətʉ imɔʼ, məmɔ̀ʼfyii imɔʼ, luu məfì muu imɔʼ, 6 leʼnə Nyii imɔʼ ndə ɔ bɛ Tie bʉə bənchəŋ, kə́ gìe kətʉ bʉə-bi bənchəŋ, kə́ fɔ̀ʼ mu bʉə bənchəŋ bɔŋ-kə́-leʼ chí mu bʉə bənchəŋ. 7 Bɔŋ wotəmiyɔŋ mu bʉʼʉ nɔ tʉʼ kie buuŋjyu-Nyii haʼ ghʉə ndə Klai kʉ̀ʉ ndə məkɔ́ tʉ ɔŋ. 8 Ŋwɔʼnə Nyii nɔ ghɔ̀ŋ ndʉʉmɛ mbɔ,

"Ndʉʉ ndə ɔ kə kóʼ kweghɔʼ, ɔ lʉ̀ nuɔ bəŋgwìa chɔ̂ kóʼ nə bɔŋ bɔŋleʼ kɔ́ kɔkə tʉ bʉəməsʉʉ."*

9 Məghɔ̀ŋ mbɔ ɔ kə kóʼ kweghɔʼ bɛ mbuka yaʼkɛŋ mbɔ ɔ nɔʼ kə fəŋ shíʼ gɛ̀ mu sê? 10 Mbəŋ-ɛŋ ndə ɔ kə shíʼ nɔ bɛ haʼ mbəŋ-ɛŋ ndə ɔ kə kóʼ gɛ̀ kweghɔʼ dɔ̀ŋnə tə tíŋ yuo mbɔ ɔ chʉʼ bɛ ndə yəŋbə inchəŋ. 11 Nɔ bɛ mbəŋ-ɛŋ ndə ɔ kə séʼ bəbɛʼbʉə ndə məbɛ bəlɔntəŋNyii, bəbɛʼbə ndə bʉəyʉkəŋgieNyii, bəbɛʼbə ndə məbɛ bʉə lɔ̀ʼ ntəŋjyujyu, bəbɛʼbə ndə məbɛ bəbasto ghɔŋbə bʉə dàhə mbʉ kəŋgie, 12 ndə məshʉ̀tə bʉə-Nyii ndə mbʉ fɔʼɔ-Nyii, mbɔ bɔ̂ŋ chʉʼ bɔ́ mbʉ mbʉə-Klai. 13 I bu bɛ haʼ nɔ tə ndʉʉ nə kʉ̀ʼnə ndə bʉʼʉ bənchəŋ bu nə bɛ nukə imɔʼ ndə məmɔʼfyiihə-ʉʼʉ ndəŋ Klai bɔŋleʼ kínə VaaNyii, tʉ bʉʼʉ nə tə̀ŋ, tə bɛ nə wo ndə Klai bɛ yɔŋ inchəŋ. 14 I nɔ bɛ nɔ bʉʼka bʉʼʉ məkóʼ káa vaavaa, lɛɛŋhə-muu-kə kə́ bɛ̀ʼ bʉʼʉ gháhə kɔ́ bəviabəvia, fʉʉkə kə́ bɛ̀ʼ bʉʼʉ kə́ bɛ ntɛ-bənu-hə ndə bʉə mənaa ghɔŋbə bʉə fə́ʼhə bʉə tʉʼ dàhə ntɛntɛhə, kə́ bɛ fiatə ndə məfə́ʼhə bʉʼʉ. 15 Ndə mətə̀nə ndəŋ shʉəŋ mu ŋkʉ̂ʉ, bʉʼʉ nɔ kie ndə mə-kə́-kʉ̀ʼ ndəŋ fiatə inchəŋ mu mbəŋ-ɛŋ Klai ndə ɔ bɛ tʉ-mbʉ-chɔshi-kə. 16 Kə́ bɛ ɔ ndə yəŋ-mbʉə-bə inchəŋ chyúnə ndəŋ ɔŋ nə yuhəbə ndə bə kɔ́ tʉ ɔŋ, ndʉʉ ndə mbyu kəyəŋ təmiyɔŋ tʉʼ fɔ̀ʼ yi-yə-fɔ̀ʼ jyujyu nɔ, i chìi mbʉ mbʉə kə́ kóʼ, bɔ́ ŋwɔŋ-ɛŋ mu ŋkʉ̂ʉ.

17 Nduɔ yie-Tiekətʉ, nɔʼ m̈ɔ shyùu tyunəkə-i mbɔ b̈ii leʼ kie ndə mə-kə́-chìi ntɛ-bənu-hə nə bʉə ndə bɔ̂ŋ gòʼ təmə bɛ́ŋ Nyii tʉʼ chìi nə ŋkwɔʼtə njʉnjʉ-yʉə fɛ. 18 Tʉkə-ʉə nɔ nə bɛ i chíenə, bɔ̂ŋ nɔʼ fyú hə mu fia-Nyii ndə ɔ̃ kɔ́ məchímbi bʉʼka byuu-ndaa-kə, chìi ndə bɔ̂ŋ kə shʉ́əhə fyiihə-ʉə. 19 Tʉkə-ʉə nɔʼ yə́ŋhə, bɔ̂ŋ kɔ́ ŋwɔŋ-yʉə ndə nu-nyàatəŋwɔŋ-bə ntɛntɛhə, kie ntɔmə ndə mə-kə́-fɔ̀ʼ nu-nyàatəŋwɔŋ-bə təmiyɔŋ. 20 Bɔŋ kaa ntɛ nɔ ndə bə kə dàhə bii te Klai fɛ! 21 B̈ʉʼʉ lʉ̀ mbɔ bii nɔʼ kə yʉ́, bə bɔŋleʼ dàhə bii nə shʉəŋ te nə wo ndə Jiso bɛ yɔŋ, 22 nɔ b̈ii mɛ̀ʼ nduɔŋ nuʼ ndə i kə fəŋ bɛ mu mbʉə-bii, b̈ii kə́ chìi nubə nə yɔŋ, ndə ĩ kə́ bʉ́əhə bii, bʉʼka nu-bʉəbʉə-bə ndə b̈ii kə kʉ̀ʉ ndə məfɔ̀ʼ i fə́ʼhə bii, 23 lʉ̀ fyii fefe ghɔŋbə ndaa fefe. 24 Bii bɔŋ kie ndə məmɔ̀ʼ gwo mbʉə fefe ndə bɛ finə-Nyii, kə́ bɛ ndyʉndyʉ nə shʉəŋ bɔŋleʼ bɛ tʉ́ʉnə.

25 Nɔ, ndʉʉ ndə bii nɔʼ mɛ̀ʼtə lɛɛŋkə, ẅotəmiyɔŋ mu bii nɔ kie ndə mə-kə́-gìe shʉəŋ tʉ wo-kətoʼ-e bʉʼka bʉʼʉ nɔ bɛ nə yəŋ-mbʉə-bə ndə i bɛ ndəŋ mbʉə imɔʼ. 26 Tʉʉ-a byʉ́ʼ, kə a mə bɔŋ chìi bʉ̂ʼʉ fɛ, kə a mə mɛ̀ʼtə chichi bùu chusii-ɔ tʉʉ-a kə́ bíe ibyʉ́ʼnə fɛ. 27 Kə bii mə kɔ́ saa tʉ Debulu ndə məfə́ʼhə bii fɛ. 28 Wo ndə ɔ tʉʼ lʉ́ʼ kə ɔ mə leʼ lʉ́ʼ fɛ, bɔŋ ɔ̈ kə́ fɔ̀ʼ nə shʉəŋ nə yi-yə ghɔkə chʉʼ kie fɔkə ndə məkɔ́ tʉ wotəmiyɔŋ mu bii ndə ɔ gòʼ təmə kie fɛ. 29 Kə ŋgie-bʉəbʉə-kə mə fyú chu bii fɛ, b̈ii bɔŋ kə́ kwə́ʼ haʼ ntɛ-bəŋgie-hə ndə bəkɔ i bɔ́ yəŋkə bɔŋleʼ bʉ̀ʉ ndə ntɛ kəyəŋ-ɛŋ, mbɔ i chʉʼ gwè nə bʉʉ tʉ bʉə ndə bɔ̂ŋ tʉʼ yʉ́.

30 Kə bii mə chìi tʉʉ kəLyʉʉhəNyii byʉ́ʼ fɛ, kə́ kwɛ́nə mbɔ nɔ bɛ cheʼ-Nyii-kə ndə ɔ chèʼ bii nə yɔŋ, ndə mədʉ̀ʼ mbɔ ɔ bu chʉ̀ʼ tʉkə-ii ndəŋ ndyiʼtə-kəchî-kə.

31 B̈ii fyúhə kechʉʼ mu fyiihə-ii inchəŋ, fyiighɔ́ʼnə, tʉʉbʉə, chyuutə, leʼnə məgìe nu-bʉəbʉə-bə kətʉ wo, leʼnə məmʉ̀ʉ bʉ̂ʼʉ te wo mu fyii-a, 32 b̈ii dʉ̀ʼ buuŋjyu tʉ ŋwɔŋtə-ii, kie fyii búɔnə, kə́ sʉ̀fyiihə-ii hə ndəŋ bʉ̂ʼ-bəbɛʼbʉə-tə, haʼ ndə Nyii kə sʉ̀fyii-i hə ndəŋ bʉ̂ʼtə-ii tíŋ hə bɔ̌ŋ Klai.