1 Vâambuɔ, bʉʼka bii bɛ fɔkə imɔʼ biibə Tiekətʉ, b̈ii yʉ́ chu bətie-bii, nɔ bɛ nukə ndə i kʉ̀ʼnə. 2 Bə nɔ nyɔ̀ʼ mu ŋwɔʼnə-Nyii mbɔ, "Kɔ́ kuŋhə tʉ naa-aŋ ghɔŋ tie-a." Nɔ bɛ fəŋ ŋkahə nɔ ndə i kie ŋkɔʼnə, 3 "mbɔ nubə inchəŋ chʉʼ bʉ̀ʉ tʉ a, a bɔŋleʼ chí kəwʉʉnəmbi dɔ̀ŋnə." 4 Bətie-vâa, kə bii mə kə́ byìi tʉʉ vâa-bii fɛ, b̈ii chìi b̈ɔ̂ŋ kóʼ nə nuʼ ghɔŋbə tʉ̂ʼ-Tiekətʉ.

5 Fʉəhə, b̈ii yʉ́ chu bətiefɔʼɔ-bii nə faakə ghɔŋbə ŋgwonəkə kəwʉʉnəmbi-fɛ̄ŋ nə fyiihə-ii inchəŋ, fi nə bii tʉʼ chìi tʉ Klai. 6 Kə bii mə kə́ yʉ́ chu-yʉə bə ndə məfàa shʉ ndʉʉ ndə bɔ̂ŋ bɛ sê, mbɔ bɔ̂ŋ chʉʼ kə́ tíi yie-yii jyujyu fɛ, bii bɔŋ kie ndə məbɛ ndə vâafɔʼɔ-Klai, kə́ fɔ̀ʼ nukə ndə Nyii kʉ̀ʉ, mu fyii-bii, 7 kə́ fɔ̀ʼ nə mu fyii jyujyu tʉ Tiekətʉ, kaa tʉ woməsʉʉ fɛ, 8 kə́ kínə mbɔ nu-jyujyu-kə təmiyɔŋ ndə wo tʉʼ fɔ̀ʼ, nɔ bɛ haʼ yɔŋ ndə ɔ bu bʉ̀nə kie kəghɔ-Tiekətʉ, kə ɔ bɛ fʉə, kə ɔ gòʼ təmə bɛ fʉə fɛ. 9 Bətiefɔʼɔ, b̈ii kə́ chìi haʼ nɔ, kaa məfyúhə shʉ-yii, kə́ kínə mbɔ mbəŋ-ɛŋ ndə ɔ bɛ Tiefɔʼ-yʉə bɔŋ-kə́-leʼ bɛ yii-yə ghɔ, nɔ bɛ yuo, təmə bɔŋ kyinə túhə shʉ fɛ.

10 Ndə məlìʼ, b̈ii tə́nə shʉ́əshʉ́ə mu Tiekətʉ, kə́ shʉ́ə bə nə ghʉəʼkə-i. 11 B̈ii mɔ̀ʼ fɔ-chɔ̂-Nyii-bə inchəŋ mbʉə bii, i chʉʼ kwáa bii ndə mələ́ʼ mənaa Debulu. 12 Bʉʼka bʉʼʉ tʉʼ gwúu byuʼu bə bʉʼʉbə bʉəməsʉʉ fɛ, bʉʼʉ nɔ tʉʼ gwúu byuʼu bʉʼʉbə bʉə njəŋ kədɔŋ, kə́ gwúu byuʼu bʉʼʉbə lyʉʉhəbə ndə bɔ̂ŋ tʉʼ sɔ́ʼ nə bəfɔŋ njəŋ kədɔŋ, kə́ gwúu bʉʼʉbə ghʉəʼ-bʉəbʉə-bə ndə bɔ̂ŋ bɛ mu njəŋ-yuo-hə. 13 Nɔ, b̈ii mɔ̀ʼ fɔ-chɔ̂-Nyii-bə inchəŋ mbʉə-bii, mbɔ i chʉʼ yi kwáa bii ndə mətə́nə ndə mbi bʉəbʉə, ndʉʉ ndə bii nɔʼ mɔ̀ʼ inchəŋ, b̈ii tə́nə shʉ́əshʉ́ə. 14 Nɔ, b̈ii tə́nə shʉ́əshʉ́ə, kɔ́ʼ kwɔ-shʉəŋ-kə kəlyuʼ-bii, mɔ̀ʼ fɔ-chɔ̂-bə ndə məkyʉ̀hə fyiihə-ii nə yɔŋ, kə́ bɛ mətə́nə ndyʉndyʉ, 15 takwubə-ii, kə́ bɛ məshʉ̀tə ŋwɔŋ-yii ndə məgɛ̀ nə ntəŋjyujyu ndə i gwè nə fyiighʉ́ənə. 16 Ndə nubə inchəŋ, b̈ii chɔ̀ʼhə ŋgɔŋ-chɔ̂-hə-ii kɔ́ ghɔʼ kə́ bɛ məmɔ̀ʼfyii ndəŋ Nyii, kə́ bɛ fɔkə ndə bəkɔ i kwáa bii ndə məyùʼ mənyɔ ndə i fyú hə ndəŋ ghʉ̂ʉ ŋwɛŋ ndə bəkɔ Wo bʉəbʉə mɔ̀ʼ bii nə yɔŋ. 17 B̈ii kwóhə ghʉʉkə kətʉ-bii kə́ bɛ ŋkwaa ndə i gwè hə kəghɔ-Nyii, bɔŋleʼ yá setə-chɔ̂-kəLyʉʉhəNyii-kə ndə bɛ ŋgieNyiikə kəghɔ-bii. 18 B̈ii kə́ gháaNyii təvɛʼtəvɛʼ haʼ ndə LyʉʉhəNyiikə tʉʼ ŋɔ́ʼhə shʉ-yii, nə ntɛ-məgháaNyii-hə inchəŋ bɔŋ-kə́-leʼ fʉ̀ʉtə Nyii. B̈ii kaa nə tʉbə-ii ghɔʼ, lyʉ̀ʉtə́nə ndə mə-kə́-gháaNyii tʉ bʉə-Nyii bənchəŋ. 19 Bɔŋleʼ kə́ gháaNyii tʉ mɔ ghɔ mbɔ b̈ə kɔ́ ŋgiebə chu mɔ ndə məghə̀ŋ fyii ndʉʉ ndə mɔ tʉʼ kɛ̀ʼ nubə tʉ bʉə ndə bə kə lə̀ŋ mu ntəŋjyujyu. 20 Bə nɔ nə kɔ́ʼtə mɔ nə bəchaŋ bʉʼka mɔ bɛ ntyukətʉ-Jiso Klai kə́ lɔ̀ʼ ntəŋjyujyu-ɔ̄. B̈ii gháaNyii mbɔ m̈ɔ lɔ̀ʼ mbʉ ntəŋ nə fyii shʉ́əshʉ́ə ndə ntɛhə ndə mɔ kie ndə məlɔ̀ʼ.

21 Ndə mə-leʼ-chìi ghɔ bii kínə ntɛhə ndə mɔ bɛ ghɔŋbə ntɛ-kənu ndə mɔ tʉʼ fɔ̀ʼ, Taikiku liŋ-ɔŋ ndə mɔ kʉ̀ʉ ɔ daa bɔŋleʼ kə́ bɛ wo ndə ɔ tʉʼ fɔ̀ʼ tʉ Tiekətʉ nə fyii-i imɔʼ, bu shyíi bii nə nubə inchəŋ. 22 Mɔ nɔ tʉʼ tə́ŋ ɔŋ tʉ bii bʉʼka luu-ɔ̄, mbɔ bii chʉʼ kínə ndə baʼa bɛ, ɔ bɔŋleʼ kwèʼhə bii.

23 Nyii mbʉ Tie ghɔŋbə Jiso Klai Tiekətʉ, kɔ́ fyiighʉ́ənə tʉ bʉə-Nyii bənchəŋ, chìi bɔŋ kʉ̀ʉ ŋwɔŋtə-ʉə bɔŋleʼ mɔ̀ʼfyiihə-ʉə ndəŋ Jiso. 24 Tə Nyii dʉ̀ʼ buuŋjyu tʉ bʉə bənchəŋ ndə bɔ̂ŋ kʉ̀ʉ Tiekətʉ-yʉʼʉ Jiso Klai nə ŋkʉ̂ʉ təmə liʼ-i ghɔ fɛ.