1 Nɔ, bəliŋ-bɔŋ, ndə mɔ kʉ̀ʉ bii daa bɔŋleʼ kə́ gwía bii, bii kə́ bɛ tʉʉjyu-ɔ bɔŋleʼ kə́ bɛ ŋgʉʼʉ-ɔ, b̈ii tə́nə shʉ́əshʉ́ə mu Tiekətʉ, bʉə ŋkʉ̂ʉ-bɔŋ.

2 Mɔ nɔ tʉʼ fʉ̀ʉtə Udia ghɔŋ Siŋtɛki mbɔ b̈ɔ̂ŋ kie ŋgiekə imɔʼ bʉʼka bɔ̂ŋ bɛ bʉə-Tiekətʉ. 3 Mbəŋ-aŋ ghɔ ŋkɛŋ wo kəwu-ɔ, mɔ nɔ tʉʼ kʉ́ʉ mbɔ ä kwáa bəke-bɔ̄ŋ, bʉʼka bɔ̂ŋ nɔʼ fɔ̀ʼ baʼa bɔŋ mɔʼɔ shʉ́əshʉ́ə ndə məlɔ̀ʼ ntəŋjyujyu leʼnə Klʉmɛ leʼnə bəʼ-bʉə-kə ndə baʼa bɔŋ kə́ fɔ̀ʼ mɔʼɔ, ndə yietə-ʉə bɛ mu ŋwɔʼnə ndə yie-bʉə-tə ndə bɔ̂ŋ nɔʼ kie məchímbi tíŋ hə bɔ̌ŋ Jiso Klai bɛ muŋgɔ.

4 T̈ʉʉtə-ii kə́ bʉ̀ʉ təvɛʼtəvɛʼ ndə bii bɛ mu Tiekətʉ, mɔ bìʼ ghɔ̀ŋ mbɔ, ẗʉʉtə-ii kə́ bʉ̀ʉ. 5 B̈ii chìi b̈ʉə bənchəŋ kínə mbuɔnəbə-ii. Tiekətʉ nɔʼ kə́ŋhə. 6 Kə bii mə kə́ lə̀ŋnə ndə nubɛʼkə təmiyɔŋ fɛ. Bɔŋ ndə nubə inchəŋ b̈ii kə́ gháaNyii bíʼtə fɔkə tʉ ɔŋ ndə bii byúu, bɔŋleʼ kə́ bíʼtə tʉ ɔŋ nə ndɔ mu fyiihə-ii. 7 Kaʼ bii fɔ̀ʼ yɔ̄ŋ-yə, bii kie fyiighʉ́ənə ndə i gwè hə kəghɔ-Nyii, ndə i bɛ ŋkʉʉ ndə nubə inchəŋ ndə bəkɔ woməsʉʉ kwɔ̀ʼtə, i bu yá ndaahə-ii ghɔŋbə ŋkwɔʼtə-yii tʉ́ʼ, ndə biibə Klai Jiso tʉʼ tòʼ mɔʼɔ.

8 Ndə məlìʼtə, bəliŋ-bɔŋ, nɔ bɛ nubə nɔ ndə bii kie ndə kə́ kwɔ̀ʼtə nubə ndə bɛ shʉəŋ, nubə ndə i kie kuŋhə chɔ, nubə ndə i bɛ ndyʉndyʉ, nubə ndə i bɛ tʉ́ʉnə, nubə ndə bʉə kʉ̀ʉ, nubə ndə i gwè nə yie jyujyu. Kaʼ nubə bɛ ghɔ ndə i bʉ̀ʉ daa, kaʼ nubə bɛ ghɔ ndə bəkɔ bii kɔ́ ŋkɛŋ yie jyujyu chɔ, b̈ii kwɔ̀ʼtə ndə mələ́ŋhə fyiihə-ii nə nubə-ɔ̄ŋ. 9 Nubə ndə bii nɔʼ yétə, fí, yʉ́ bɔŋleʼ nyíɛ kəghɔ-mɔ, b̈ii kə́ fɔ̀ʼ nubə-ɔ̄ŋ, ndʉʉmɛ Nyii, ndə ɔ̃ kɔ́ fyiighʉ́ənə, bu bɛ bii bɔŋ mɔʼɔ.

10 Tʉʉ-ɔ nɔ tʉʼ bʉ̀ʉ mu Tiekətʉ yɔ́ŋyɔ́ŋ mbɔ lʉ̀ hə ŋgʉʼʉ, bii nɔʼ bʉ̀nə bìʼ kie fia ndə mədʉ̀ʼ ŋkʉ̂ʉ-yii tʉ mɔ. Kaa mbɔ bii nɔʼ kə káa ndə məkʉ́ʉ ndə məkwáa mɔ fɛ, bɔŋ nɔ kə byúu bə fia. 11 Kaa mbɔ mɔ tʉʼ ghɔ̀ŋ mbɔ mɔ byúu fɔkə nduɔ fɛ, bʉʼka mbɔ mɔ nɔʼ yétə ndə məyá fyii-ɔ ndə ŋgwɔ kənu təmiyɔŋ ndə mɔ nyíɛ ŋwɔŋ muŋgɔ. 12 Mɔ nɔʼ yétə ndə mədùʼ nə vaa-kəfɔ məniʼ byuunɔ nə yi yɔ́ŋyɔ́ŋ-yə. Ndə nubə inchəŋ leʼnə nukə təmiyɔŋ, mɔ nɔʼ yétə ndaa ndə mədùʼ nə fɔ-yɔ́ŋyɔ́ŋ-bə byuunɔ dùʼ nə jyʉʉ, ndə mədùʼ nə buŋmbi byuunɔ təmə fɔkə fɛ. 13 Bəkɔ mɔ fɔ̀ʼ nubə inchəŋ tíŋ hə bɔ̌ŋ mbəŋ-ɛŋ ndə ɔ tʉʼ kɔ́ mɔ nə ghʉəʼkə. 14 I bɔŋ nɔ kə bɛ nu-jyujyu-kə ndə bii kə fɔ̀ʼ ndə məkwáa mɔ ndʉʉ ndə mɔ kə kə́ nyíɛ ŋgʉəʼ. 15 Mbəŋ-yii, bʉə-Filibai, bii nɔ kínə mbɔ ndʉʉ ndə bii kə fəŋ yʉ́ ntəŋjyujyu, ndʉʉ ndə mɔ kə lɔ̀ hə Masɛdonia, chɔshibɛʼ kə bɛ ghɔ ndə bɔ̂ŋ kə fúu nuɔ baʼa bɔŋ ndə mə-kə́-kɔ́ bɔŋleʼ fí fɛ, yaʼkɛŋ haʼ bii. 16 Buŋ vɛʼ ndə mɔ kə bɛ Tɛsalonika bii tə́ŋ ŋkwaa kɔ́ tʉ mɔ, tə bìʼ kɔ́. 17 Kaa mbɔ mɔ tʉʼ kʉ́ʉ mbʉ kəkɔ fɛ, bɔŋ mɔ nɔ tʉʼ kʉ́ʉ bə bʉʉ ndə i tʉʼ ŋíi mu kwo bii bʉʼka mbʉ kəkɔ.

18 Mɔ nɔʼ kie fɔbə inchəŋ ndə mɔ kə́ kʉ́ʉ, buŋ kie yɔ́ŋyɔ́ŋ. Mɔ nɔ kie i yɔ́ŋ tə daa, nduɔ ndə Ebaflɔdito nɔʼ gwè nə kɔkə-ii tʉ mɔ nɔ. Nɔ bɛ kɔkə ndə yɔ̂ʼkə-i lùŋ bʉ̀ʉ daa tʉ Nyii, fɔ-fɛ̀ʼndɛŋ-jyujyu-bə ndə Nyii bɛ́ŋ, i bɔŋleʼ bʉ̀ʉ shʉ-ɔ. 19 Nyii-ɔŋ bu kɔ́ fɔbə tʉ bii inchəŋ ndə bii tʉʼ byúu mu fɔŋ kəyəŋ lə̂ŋ-ɛŋ tíŋ hə bɔ̌ŋ Klai Jiso. 20 Tə Nyii, Tie-yʉʼʉ məgʉ́ə bɛ yi-yə təmə liʼ-i ghɔ fɛ. Ï bɛ haʼ nɔ.

21 B̈ii gìe tʉ bʉə-Nyii ndə bɔŋ nɔʼ bɛ́ŋ Klai Jiso bənchəŋ. Bəliŋ-bʉʼʉ ndə baʼa bɔŋ bɛ mɔʼɔ nɔ tʉʼ gìe tʉ bii. 22 Bʉə-Nyii ndə bɔ̂ŋ bɛ fɛ̄ŋ bənchəŋ nɔ tʉʼ gìe tʉ bii, bɔŋ fɔŋ ɛŋ kə́ bɛ bìbə ndə bɔ̂ŋ bɛ ntoʼ fɔŋ Luŋ. 23 Tə Jiso Klai Tiekətʉ-yʉʼʉ dʉ̀ʼ buuŋjyu-i tʉ bii.