1 ꞌËx Simón Pedro, Jesucristonën apostol ꞌianan, aín bana upioki ñuikë ꞌixun kana mi kain, Dios ꞌimainun an nu ië́mikë Jesucristo, an ka upí ꞌixun nux ami katamënu ꞌimiaxa.

2 Kamina biti ꞌain kamabi nëtën ꞌitsaíira upí tankin Diosan ꞌakinkëxun asabi kakin, nun ꞌIbu Jesucristo aribi ꞌunánti ꞌain.

3 Diosan ka aín kushi, anun tsónu nu ꞌinankëxa, ꞌimainun ka kamabi nëtën rabi tsóti nu ꞌimiaxa, usa ꞌain ka an nu kuënkin an ñu mëa chaíira a nu ꞌunamiana. Aín nëtë pënë́iira upíira anu ꞌinun nu ꞌimiti ꞌikën.

4 Ënë ñukama kupin ka ax kiasabi okin nu ꞌinanxa, kupíira ꞌimainun chaíira a kupin mitsux Dios saribi ꞌi ñu ꞌatimanuax chikikin ënë menu ꞌikë ñu ꞌatimakama ënun.

5 Usa ꞌain ka ami kushikin sinankë an upí ꞌixun; upiokin kuakë an nu unamikëx, upiti tsóti ꞌikë;

6 upiokin kuakin unanki aisa tankinbi tënëkë; an ka abi tënëti ꞌikë, tënëkë an ka upiokin ꞌakë a bënëkima munu ꞌati unamia;

7 munu akë an ka nu bëtsi nuibati unamia; kuë́ëni kamabi nuibananu Cristona ꞌai.

8 Mitsun nun ꞌIbu Cristo ꞌunánkë ꞌixun kamina ënë ñu kama ꞌati ꞌain. ꞌakin kamabi nëtën upiokin ꞌunani kamina, upiti tsóti ꞌain.

9 ꞌAibi ka uin cara usokin ꞌaima ax ka bëxuñu ꞌiana uria ꞌiskëmasa ꞌixun; manukin ꞌën ꞌuchakëkama bërama a ka tërë́nkë ꞌikë kixun sinanima.

10 Usa ꞌain kamina ꞌën xukëantu Diosan ka mi kuëanan kaisaxa, kixun sinani mitsux ami kushi nipakëtima ꞌain.

11 Usa ꞌain ka rabë́ rabë́ xëokakë xëkuë anun naíkamëonu kuanti an nu ꞌiëmikë nukën Ibu Jesucristo.

12 Mi kana ënkima ꞌunánkë ꞌikëbi sinami, ënë ñukama ꞌunánkë ꞌai asérabi anubi ꞌiti ꞌain.

13 ꞌËn tsokëpan ꞌixun kana ënë ñukama sinamiki ësëti ꞌain.

14 Nukën ꞌIbu Jesucristonën ka ꞌë ꞌunamiaxa bënëkinshi kana anun tsóti ënti ꞌain;

15 ꞌaibi kana ënkima ënë ñukama ꞌain ꞌëx bamakëbëtan sinanun.

16 Usa ꞌain kana aín kushi ꞌimainun nukën ꞌIbu Jesucristo utëkënti mi ꞌunamia, këmëkin sinanki ñuikima asérabi, nukën bërunbi iskë a ñuian.

17 Nunbi kananuna ꞌisanan kuakën aín papa Diosan ꞌain kushi pënëíira ꞌinani kía bana kuakën, —Ënëx ka ꞌën bëchikë ꞌikë ꞌitsaíira kuë́ënkin nuibakë a ꞌikën.

18 Nu kamabi kananuna naínua banaia kuakën, nukën ꞌIbubë kananuna aín bashi matá upíira anu ꞌiakën.

19 Ënën ka asérabira profeta kía bana a ꞌikën, a banax ka achúshi tirí bëankibukënua pë́ëkia, ax ka pëkarakëbë ꞌispa* min nuituax pë́ëkikësa ꞌikën.

20 Aibi kamina ënë ñukama sinanti ꞌain: uinu ꞌikë banabi ka abi sinankin kuënëoma ꞌikën. 21 Uinu ꞌikë profetanëxi ka abi sinani banama ꞌikën. Usai ꞌima ka, atux Diosan imikësa oishi banakëxa, atux ka Bëru Ñunshin Upitan imikë ꞌiakëxa.