1 ꞌËn nuibakë xukëantu, ënëx ka bëtsi pain inshaxun amiribishi inshatëkënkë kirika ꞌikën, a bana rabënubi kana mi ꞌësëkin upiokin sinamisatan, min mi upiokin sinanti kupí.

2 Kamina unanti ꞌain Diosan kaiskë profetakama bëtsi nëtë bërama kia bana, kamina sinanti ꞌain; nukën ꞌIbu Jesucristo an nukë ꞌiëmikë ꞌain apostolkama ka bana a kamina sinanti ꞌain.

3 Ësoi ikin kamina ꞌunanti ꞌain: Ënë nëtëkama anun këñuti ꞌitamainun ka bëtsi unikaman ꞌaisama ñu ꞌatishi kuë́ënti ꞌikën, usakin ꞌai ka mitsumi kuaiti ꞌikën.

4 Atux ka kananti ꞌikën: —¿Uisa kara Cristo ka utëkënti ꞌikë kia bana ax ꞌik? Nun papakama ka bamakëxa, ꞌaibi ka kamabi me unio ax ꞌiasabi ꞌikën.

5 A unikaman ka sinantisama tania bërama ka nëtë naí ꞌimainun me ꞌiakëxa, Diosan aín banainshi menua chikiña aish ka baka anu bëribi ꞌikën.

6 Usa ꞌain ka a bakabi chaíira ë́kin kamabi me këñuakëxa;

7 ꞌaibi ka naí ꞌimainun me barí anu bëribi ꞌikën, usa ꞌain ka Diosan banabi nan ai manë tsin këñuti ꞌikën, tsínbi ka në́nuxun ꞌaia, aín nëtë ꞌikëbëtan an ñu ꞌaisama ꞌakë kamakëñubi.

8 Usa ꞌain ën nuibakë xukëantu kamina manutima ꞌain, nukën ꞌIbun ka achúshi nëtë a mil barisa isia ꞌimainun ka mil baritia ax achúshi nëtësa ꞌikën.

9 Nukën ꞌIbu anka ax kiasabi oí unuxun ꞌaia, ꞌaibi ka rairinën ka panatia kixun sinania, an ka bënë́kima kamabi unixa bamaima ꞌië́ti ka Diosnan kuëënia.

10 Anuan nukën ꞌIbu uti nëtë ka an ñu mëkamakë uni banaima ukësa kuatsini uti ꞌikën. A nëtën ka naí nëtëti ꞌikë achúshiti kushíira banakëbë ka anu ꞌikë kamabi ñu a tsin në́ënkë ꞌiti ꞌikën. Me ꞌimainun anu ꞌikë kamabi ñu ka Diosan nëtënki këñukë ꞌiti ꞌikën.

11 Usa ꞌain ka kamabi ñu kë́ñuti ꞌikën, mitsux kamina ꞌuchañuma Dios rabi upí tsóti ꞌain.

12 Dios uti nëtë kananuna kainti ꞌai, usa ꞌain kamina mitsun bënëkin ñu upí ꞌakin kushiki kainti ꞌain, a nëtën ka kamabi naínu ꞌikë ñu këñubi tsi rëkirukë aín xananbi këñuti ꞌikën.

13 Nukaman kananuna kainin naí ió ꞌimainun me ió ñuiki Diosan nukë ka a kaini, anu ka ñu ꞌaisama ꞌaima ꞌiti ꞌikën.

14 Usa ꞌain ën nuibakë xukëantu, ënë ñu kainki kamina kamabi ñu Diosan iskëx upí isanan ꞌuchañuma nuibanani bukuti ꞌain.

15 Kamina ꞌunanti ꞌain bënëkima, nukën ꞌIbu kainti an nu ië́miti, ënë bana ñuikinribi ka nukën xukën Pablonën Diosan sinamikëxun kirika kuënëoxunkin nu kaxa,

16 Pablonën ka ënë banakama ñuikin an kuënëo kirika kamanu nu kaxa, ꞌaibi ka rairi kirikanu nun kuaisama tëëira ꞌikën, usa kupin ka unin kuatima an ñu unama kupí bëtsiokin ñuixunia, ꞌimainun ka bëtsi kuënëo banaribi ꞌatimaki ñuixunia a kupin ka Diosan tëmëramiti ꞌikën.

17 Usa ꞌain, ꞌën nuibakë xukëantu mitsun kamina ënë ñukama ꞌunan, usa ꞌain kamina bëruankati ꞌain, paranki mitsu ñu atima amikëx min akë ñu a ëni min sinan kushima iti ꞌikën.

18 Usa ꞌainbi kamina nun ꞌIbu Jesucristo an nu ië́mikë a unanti ꞌain, nuibanani cha inun kanikin. ¡Aín nëtë pënë́iira anu xënibua ꞌaibi abë ꞌiti ꞌain! Ashi.