1 ꞌËnë kirikanëx ka Jesusan rarakama ꞌia ꞌikën, David ꞌimainun Abrahamnën rëbunki ka Jesucristo ꞌiakëxa. Jesucristonën rarakama ka ënë unikama ꞌiakëxa:

2 Abraham an ka Isaacnën papa ꞌiakëxa. Isaac ax ka Jacobnën papa ꞌiakëxa. Jacob an ka Judá ꞌimainun aín xukëantun papa ꞌiakëxa.

3 Judá an ka Fares ꞌimainun Zérah aín papa ꞌiakëxa, Tamar aín tita ꞌiakëxa. Fares an ka Esromnën papa ꞌiakëxa. Esrom an ka Aramnën papa ꞌiakëxa.

4 Aram an ka Aminadabnën papa ꞌiakëxa. Aminadab ax ka Naasonën papa ꞌiakëxa. Naasón ax ka Salmonën papa ꞌiakëxa.

5 Salmón an ka Booznën papa ꞌiakëxa, Rahab aín tita. Booz an ka Obednën papa ꞌiakëxa, Rut aín tita. Obed ax ka Isainën papa ꞌiakëxa.

6 Isaí an ka David, áxa ꞌapu ꞌi ë, aín papa ꞌiakëxa. David ax ka Salomonën papa ꞌiakëxa, aín titan ka Uriasnëan kasunan xanu ꞌiakëxa.

7 Salomón an ka Roboamnën papa ꞌiakëxa. Roboam ax ka Abíasnën papa ꞌiakëxa. Abías ax ka Asanën papa ꞌiakëxa.

8 Asa an ka Josafatnën papa ꞌiakëxa. Josafat ax ka Joramnën papa ꞌiakëxa. Joram an ka Uzíasnën papa ꞌiakëxa.

9 Uzías ax ka Jotamnën papa ꞌiakëxa. Jotam an ka Acaznën papa ꞌiakëxa. Acaz ax ka Ezequiasnën papa ꞌiakëxa.

10 Ezequías an ka Manasésnën papa ꞌiakëxa. Manasés ax ka Amónën papa ꞌiakëxa. Amón an ka Josiasnën papa ꞌiakëxa.

11 Anuan Israel unikama Babilonia nëtënu buanti ꞌurama ꞌain ka Josiasnën Jeconías ꞌimainun aín xukënkama bëchiakëxa.

12 Babilonianu unikama buankë ꞌixun ka Jeconíasnën Salatiel bëchiakëxa. Salatiel ax ka Zorobabelnën papa ꞌiakëxa.

13 Zorobabel an ka Abihudnën papa ꞌiakëxa. Abihud ax ka Eliaquimnën papa ꞌiakëxa. Eliaquim an ka Azornën papa ꞌiakëxa.

14 Azor ax ka Sadocnën papa ꞌiakëxa. Sadoc an ka Aquimnën papa ꞌiakëxa. Aquim ax ka Eliudnën papa ꞌiakëxa.

15 Eliud an ka Eleazarnën papa ꞌiakëxa. Eleazar ax ka Matanën papa ꞌiakëxa. Matán ax ka Jacobnën papa ꞌiakëxa.

16 Jacob an ka Josenën papa ꞌiakëxa. Josenën ka Maríanën bënë ꞌiakëxa, an ka Jesusan tita ꞌiakëxa. Jesucristo Mesías kakë a.

17 Abrahamnua kuanx ka David sënën aín rëbunki catorce ꞌiakëxa, Davidnua ka bëtsi non Babilonia nëtënu israelita unikama ubankë ka catorce ꞌain rëbunki ꞌiakëxa, anuax ka bëtsi catorce ꞌain rëbunki Cristo bakënti ꞌiakëxa.

18 Aín tita Jesucristo bakënti ka ësa ꞌiakëxa: María aín tita ax ka Josenën binuxun ꞌunanti okë ꞌiakëxa, abë́ ꞌisama pain ꞌaish nukën Papa Diosan Bëru Ñunshin Upitan ꞌimikëx túñu ꞌiakëxa.

19 José ax ka upí uni ꞌiakëxa, usa ꞌixun ka unë́xun María uibi kakima katëtima kupin ënti sinankëxa.

20 Usakin sinaniabi ka nukën ꞌIbu Diosan ángel achushinën namamikin José kakëxa: —José Davitan rëbunki rakuëkima kamina María min xanu ꞌinun biti ꞌain, aín tuá ax ka nukën Papa Diosan Bëru Ñunshin Upitan ꞌimikë túkë ꞌikën.

21 María bakënia, kamina aín tuá Jesús kakin anëti ꞌain. An ka kamabi uni aín ꞌuchanua iëmiti ꞌikën.

22 Diosan aín Profeta kasabi oi ka ꞌiakëxa:

23 —Xanu achúishi unibë ꞌikëma pain ꞌaish ka túñu ꞌitankëx bakë́nti ꞌikën. Aín tuá ax ka Emanuel kakin anëkë ꞌiti ꞌikën.

Emanuel kikë ax ka Dios ka nubë ꞌikë kikë ꞌikën.

24 Namati bësukin ka nukën ꞌIbu Diosan ángelnën kakësabi oki Josenën María aín xanu ꞌinun biakëxa.

25 Unibë ꞌikëma pain ꞌaish, aín tita bakënkë ꞌikë ka, Josënën a tuá Jesús kakin anëakëxa.